بالامس نجحت نفرة الحبيب الغالي معالي نائب رئيس الجمهورية الشفت حسبو ولعمري هي ليست الوقفة الاولى للرجل مع الرياضيين وليست الاولى له معانا وان كانت النفرة هذه المرة مخصصة لدعم مسيرة المريخ الافريقية الامر الذي لا يبعد عنها صفة القومية والوطنية لان المريخ هو الممثل الوحيد لهذا البلد الطيب اهله القاطعة كهربتو ومطلعة زيت ابو اهلو ده الزيت الزيت الطالع من قطوعات مبرمجة واخرى مخرمجة وكان اسمها الادارة المركزية بعد ان كان اسمها شركة النور فهل يحق لنا ان نسميها حالياً سوء ادارة النور؟ انا شخصياً لو محل وزير النور بستقيل واشرد عشان مافي عرق زول يزوزي بي ولو كنت محل سد مروي لهربت من لقاء زيت الناس الانعصرت سخانة تصحوا الصباح تلقوني انا كسد مروي مافي وتلقوا النيل منساب يمسح ذكريات فشل سد اتعمل فزع بقي وجع مع قطوعات الكهرباء مافي من ذكرى السد الا هدف كليتشي ولاسانا وبعض تياب النسوة المكتوب عليها السد وصدى هتاف يأتينا من بعيد السد السد الرد الرد فكان رد السد بليغا وكان همسا في الظلام. المهم. التحية لنائب رئيس الجمهورية مجدداً ومكرراً ودوماً والتحية لكل من شارك في النفرة حتى ناس عيب الزاد نحييهم برغم عيب سيدو المالي ايدو عند الدعم تحية خاصة جداً لجيمي الذي عودنا على مبادراته الكبيرة خمسمية مليون من والي التواطؤ دعما للمسيرة فهل يليق بكلمة تواطؤ ان تقبح الفقرة اعلاه؟ وتحيه اهمس بها في اذن الحبيب مزمل الذي فعل الحراك وحرك الفعل فكان التفعيل منه والاستجابة منهم والتبجيل للكيان. شكراً معالي السيد نائب رئيس الجمهورية ايها الناس بكرة نكون ان شاء الله وصحيفة الزعيم تدعوكم لمسابقة اجمل مانشيت لعدد السبت فكر في اجمل مانشيت لعدد السبت وارسله في رسالة نصية للرقم 0912119233 اذا فاز المانشيت بنزل في عدد السبت كمانشيت ويكرم صاحبه بمباني الصحيفة وله جائزة الشفوت اهل الابداع ننتظركم ومانشيتاتكم المدهشة المهم يوم كورتنا ضد اهلي عطبرة الحكام وحارس عطبره لابسين زي بعض يعني لولا زيوت ماستر المكتوبة على قمصان الحكام كان حارس عطبرة اعتبر الخمسة اهداف تسلل وكان رحنا فيها نحن وبمناسبة زيوت ماستر كرياضيين نحييها لانها تلاته سنين ترعى الحكام حالة اول رعاية فريق في الدوري الممتاز «الاهلي والاتحاد مدني» رعاية فريق مريخ المناقل بالتأهيلي المريخ العاصمي مباراتي وفاق سطيف الدعم لفرق النهضة ربك والنيل شندي في تأهيلي 2015 انشأت زيوت ماستر ملعباً للخماسيات بمدينة ربك بمواصفات عالمية لقطاع الناشئين يلعب عليه بالمجان رعاية قطاع الناشئين بمحليه ام درمان رعاية حكام مباريات الدوري الممتاز والتأهيلي وكأس السودان للعام الثالث على التوالي توفير 3 اطقم تحكيم من شركة بوما العالمية. وهي المبادرة الاولى من نوعها لقطاع مهمش ورعاية ورشتين تأهيليتين للحكام القوميين وهي رعاية مكلفة جداً ثمن الفانيلة الواحدة ما يعادل «850» جنيهاً سودانياً. اذن هي شركة صديقة للرياضيين نحييها على ما قدمته للرياضة والرياضيين ويا ليت كل الشركات الكبرى تضع بصمتها على خريطة المجتمع بالدعم والرعاية صحيا وثقافياً ورياضياً وتعليمياً نكرر شكرنا لماستر المهم بكرة كل القوة القلعة جوه الشفوت ما بتوصوا ولا اللاعبين بتوصوا برغم ان اللاعب اليومين دي زي شريحة الدفع المقدم محل ما رصيدك يكمل بقطع دايرين شحن قبل ما الرصيد يقطع طواااالي زمان اللاعب زي التلفون الخط تورجق بيهو الشهر كلو ما بقطع وبعد الشهر بديك فترة وبعد الفترة بديك استقبال شهر اسي الشرائح ديل جاهم نت كمان نت بالميقا والقيقا ما بزيدك دقيقة غايتو مليارات امس دي اشحنوهم بيها شديييييد ايها الناس نجحت النفرة امس امسكوا الخشب نفرة مريخاب تجار سوق ليبيا حاتدهشكم اكتر ابقوا معنا ايها الناس ان تنصروا الله ينصركم اها نجي لي شمارات والي الخرتوم اجعص خروف بي مليون واربعمية بتباع لينا يعني بمية دولار يا والينا افخم ساندوتش كاااك بي تمنيه وعشرين بتباع لينا يعني باتنين دولار يا والينا جالون الجاز باربعطاشر بالنسبة لينا يعني بي دولار يا والينا اها في دولة ارخص مننا؟ اقول ليك يا والينا عشان ترفعوا المعاناة عن كاهل مواطنينا انتوا بالدولار تصرفوا لينا ونحنا بالسوداني تلقونا اشترينا وتبقى اتحلت مشكلة مؤرقاكم ومزمنة لدينا سلك كهربا ننساك كيف والكلب قال: حليل لمن كنا بنمرق الشارع نجر ليك جيفة ندخل بيها البيت ..البيت كلو يكورك .. جر جر .. وما يعرفوا يشيلوا الجيفة يمرقوها كيف.. يقربوا يحنسونا عشان نمرقها.. الجريو قال ليهو جيفة يعني شنو يا بابا بوبي؟ وإلى لقاء سلك
