مهدادات الهلال والاجندة الخاصة محيناها ب (استيكة) الانتخابات القادمة انا خائضها خائضها في هذا العام سوف نكمل الملعب الرديف وملعب الخماسيات رئيس الهلال لا بد ان يدفع و50% من مزانية الهلال بندفعها من جيوبنا رغم افتتاحكم للمنشآت بحضور والي الخرطوم ..إلا ان الملعب الرديف وملعب الخماسيات الى الان لم يظهران؟. هذا كلام صحيح ...لكن ذلك بسبب التركيز في فريق كرة القدم ..لأن الهلال كان متقدم افريقيا..لكن نوعد قبل انتهاء فترتنا في هذه السنة ..نعمل الملعب الرديف ونعمل ملعب الخماسيات. وكمان في المستقبل في الدورة الجديدة ..اذا فزنا ان شاءالله نعمل (تجليس) للدرجات كلها. = الاندية السودانية عندها مشاكل كبيرة في الامكانيات المادية ...وفي موارد الدخل ..الخرطوم ذهب الي الامن الوطنى ..الاهلي الخرطوم اصبح تحت رعاية الجيش ...النسور الشرطة الي حد ما...في ظل هذه الاوضاع كيف تسيرون امور الهلال المادية ؟...خاصة وان هناك اشكاليات كبيرة ظهرت في المريخ بعد استقالة جمال الوالي؟. اذا تحدثنا عن تسيير الهلال وميزانيته ...نقول في البدء ...الاقطاب دعمهم مقدر ..وهم يشكرون عليه لكن في النهاية لن يحلوا لك مشكلة الميزانية ...دعمهم لو بالغ ...واصبحوا (ظرفين) دعمهم لن يتجاوز ال (20%) من ميزانية الهلال...ال (70%) مع موارد الهلال معلقة في رقبتنا..موارد الهلال ممكن تكون 30%...يبقى ال (50%) لازم يدفعها المجلس ..ورئيس النادي لا بد من ان يدفع ، ولا بد من توفير احتياجات. والهلال دا ..الما عنده مقدرات مالية كبيرة ما بقدر عليه ...ولا يفكر..ولم تكن لديك مقدرة مالية لن تدير الهلال اكثر من شهر...لو كسرت رقبتك ما بتفوت شهرين. = السلطة..ألا تدعم الهلال؟. السلطة كانت بتدعم ...لكن في الفترة الاخيرة ..ظهرت اولويات اخرى للحكومة ..وظروف البلد ما كانت بتسمح. = ماذا عن حقوق الهلال على اللاعب النيجيري فلانتاين؟. فلانتاين انا دفعت فيه 45 الف دولار...والكاردينال دفع 150 الف دولار...وان نشاءالله نفعّل هذا الفائل ..ونلاحق حقوقنا..يمكن انشغلنا في الفترة السابقة عن ذلك. = برؤيتكم انتم كمجلس ومن خلال خبرتكم ..هل فريق الهلال الحالي فيه نقص؟. الفريق كعناصر ..ولاعبين ما فيه نقص ...وما فيه اي مشاكل..تيم الهلال الحالي يمكن يكون محتاج لاعب ...لاعبين ...لكن بصورة عامة ما فيه نقص مزعج..وانا بثق في لاعبي الهلال وفي تميزهم لكن ممكن تضيف لاعب لاعبين في يونيو ..خاصة في حالة التأهل المراحل متقدمة في البطولة الافريقية ان شاءالله..وعندنا خارج الكشف (سيدي بيه) وهو اضافة حقيقية للهلال في الفترة القادمة واضافة قوية. = ماذا عن سيدي بيه؟..سمعنا عن مناوشات فيه؟. سيدي بيه لاعبنا بالقانون ..واستلم حقوقه كلها ومعانا مخالصة ...يمكن تكون في مناوشات فعلا ..لكن امره محسوم ..وهو الان بتمرن مع الهلال ..وسيدخل الكشف في يونيو. = مناوشات من وين؟. مناوشات داخلية ...وخارجية ..لكن موقفنا سليم..واللاعب في الحفظ والصون. = ماذا عن تسجيلات يونيو؟..وكيف هي ترتيبات مجلسكم لها؟...ساني وكانغا سوف تنتهى فترتهم. شوف نحن هسع الموضوع دا ما بنقدر نتكلم فيه ..نحن بنحترم قرار الجهاز الفني ..وممكن اي لاعب يفوت من الهلال لاعب كبير اذا رأي الجهاز الفني ذلك. يمكن سؤالك هذا الاجابة عليه بعد الكورة تكون واضحة ...نحن الان تركيزنا كاملا على مباراة الجمعة التى سوف تحدد احتياجات الهلال حسب رؤية الجهاز الفني...التأهل بفرض علينا اضافات جديدة من غير شك. بعد مباراة الجمعة هناك تقيّم شامل لفريق كرة القدم ...المحترفون ..الجهاز الفني. = المجلس ممكن يمشي؟. نمشي وين؟...نحن قاعدين ..والبحلم ان المجلس ممكن يمشي او ينحل يكون بخدع في نفسه ..ما في هزيمة ممكن تشيل ليها مجلس ..ونحن قادرين نتعامل في كل الظروف ..ومع كل الاحوال. = تقيّمك للمحترفين ...يمكن يكون هناك اتفاق تام على تراوري ..انت رأيك شنو في المحترفين؟. تراوري ما فيه كلام ..خرج سادومبا لاعب كبير ..وجاء بديل عنه تراوري وهو نجح نجاح كبير في الهلال مع احترامنا وتقديرنا لسادومبا. سنكارا..انا شايفو لاعب ممتاز من وجهة نظري ..لكن التقيّم حق الجهاز الفني في النهاية ..اكانغا لاعب مدرب وخيار غارزيتو ...ساني مستواه تراجع لكن في ظروف ادت الى تراجع مستواه...و لا بد من ساني ان يشد حيله لو عاوز يستمر في الهلال. = ماذا عن المشاريع المستقبلية في الهلال؟. عندنا الملعب الرديف وملعب الخماسيات ..والتجليس في المساطب الشعبية....فترنا الحالية سوف نكمل فيها الملعب الرديف وملعب الخماسيات وفترتنا الجديدة ان شاءالله عندنا التجليس وفندق الهلال والبرج في الجهة الجنوبية الغربية. = واضح انك تعزم على دخول الانتخابات ..كيف هو تخطيطك لها ؟..وهل سوف تكون هناك اضافات في المجلس؟. الانتخابات القادمة انا خائضها خائضها ما في ذلك شك..وسوف تكون هناك اضافات في المجلس ومراجعات شاملة. = هل في حشد للعضوية؟. نحن ما بنقول في حشد ..لكن في مريدين ..وانصار مقتنعين بك..والصندوق في النهاية سوف يفصل في ظل تنافس ديمقراطي. = انت زول بتاع مناشط ..كنت رئيس اتحاد الجمباز ...مع ذلك المناشط مهملة اهمال قاطع في الهلال؟. انا ما بتاع منشاط ..انا بتاع تخطيط...صحيح انا دخلت في اتحاد الجمباز ودخلت في الباسكت ..وفي اتحاد البلياردو ..في تراجع في المناشط هذه حقيقة ...لكن الاحداث والصراعات هى التى شغلتنا عن ان نحدث نهضة في المناشط. هذا اول مرة نتحدث فيها عن هذا الامر نصيبنا من فضائية الهلال 25% في الفترة الاولى بعد مباراة الجمعة سوف تتضح الرؤية للجميع = فضائية الهلال ماذا عنها؟. فضائية الهلال شغالة الحمدلله ..ماشي كويس ..وبدأ الان تعيّن الكوادر في الامارات ..وشركة الفجيرة مجتهدة ومراهنة على اخراج قناة جيدة. = الموقف المالي للقناة غير مفهوم؟. انا ح اقول كلام لاول مرة اقوله ..نحن هذه القناة لم نخسر او ندفع فيها قرش..وعندنا في القناة نسبة 25% من الارباح ..والنسبة بتزبد سنويا الي ان تصبح القناة ملك تام للهلال...وهذا مع الرسالة الاعلامية القوية للقناة. = ايضا تعاقدتكم مع المدرب والرؤية معه ..غير واضحة حتى الاون؟. نحن عارفين بنعمل في شنو؟..وعارفين موقف الهلال كيف؟..والموضوع دا خليه الان بعد المباراة ..سوف تتضح الرؤية للجميع...سوف تقنن العقودات مع المدرب والجهاز الفني كله بعد الكورة. = هناك كان اختلاف بينكم والمدرب في تحديد يوم المباراة؟. لم يكن هناك اختلاف بالمعني الواضح دا ...هو كان بفضلها يوم 7 ابريل ..لكن استجاب لرؤيتنا ..المدرب بصراحة طالب فقط بتأجيل مباراة الهلال والاهلي الخرطوم. = وماذا عن قطاع الكورة؟. نحن بنشيد بالقطاع ..خالد بخيت وابوشامة والكوارتي ..هذا القطاع بعمل الان منذ سنتين في الهلال..مستقر ..وشغال بصورة علمية ومنظمة. = ومجلسك ماذا تقول عنه ..هل راضي منه؟. عندنا اشكاليات بسيطة في المجلس ..لكن الكل مجتهد من اجل الهلال. = مباراة الجمعة ..ختاما عاوز تقول عنها شنو؟. نقول اولا ان المجلس جهّز الفريق للمباراة جيد ..هذا الامر ما عندنا فيه مشكلة. ثانيا نحن نقول ان الاقطاب داعمين ومساهمين. ثالثا الاعلام الهلالي ينبغي ان ينظر للاشياء التى هى امامه ..ويبعد عن شخصنة الهلال......ونحن بنعتبر ان اعلام الهلال قايم بدوره على اكمل وجه. رسالتنا لجمهور الهلال ..نقول ان جمهور الهلال جمهور كبير وعظيم ..والجمهور عارف دوره تماما..وبنقول للجمهور احتلوا المدرجات هي مفتوحة لكم ..الهلال يحتاج لكم في مباراة القمة ..ونحن رتبنا الاوضاع بصورة جيدة للجماهير في استاد الهلال ومقبرة الخصوم. اما اللاعبين فاننا في المجلس سوف نضاعف حافز التأهل وسوف يكون الحافز من المجلس بالدولار ..هذا من دون تحفيز بعض الاقطاب والافراد للاعبين. خلوا هيثم مصطفى في حاله هيثم مصطفي لاعب ذكي وعنده قبول لكن فنيا انتهى = بعد هذه الفترة ..ماذا عن هيثم مصطفى ...وكيف ترى انتقاله للمريخ؟. والله انا الموضوع دا ما بحب اتكلم فيه ..هو الان لاعب المريخ والحديث في حقه غير مجدي ..هيثم مصطفى خلوه في شغله ...هو اختار دربه ..والناس ما تقفل نفسها في الحتة دي. = بعد شطب هيثم مصطفى وانتقاله الي المريخ ..هل شعرت ان مشكلة الهلال انتهت حسب وجهة نظرك. انا ما بقول كان في مشكلة في الهلال في وجود هيثم ..ولكن بقول في تقارير فنية انا نفذتها فقط..وما عاوزين نستفز هيثم مصطفى الان ونقول مشاكل الهلال انتهت..ممكن نقول ان التقارير الفنية عملت استقرار في الهلال بصورة عامة. = هل في وجودك ممكن ان ينهي هيثم مصطفى مسيرته الكروية في الهلال كلاعب كورة. ممكن بشرط ان يعتذر اعتذار رسمي ...ممكن نعيده تكريما له ..وتأكيدا على اننا ما عندنا معاه مشكلة ..ومهم نقول ان اعادته ليس من اجل ان يلعب كورة او يقود الهلال ..وانما من اجل ان ينهي حياته الكروية في الهلال اذا اراد اللاعب هذا ..واعتذر عن الاخطاء التى وقع فيها. = هل ترى ان انتقال هيثم مصطفى للمريخ كان (خطأ) منه؟..وكان فقط من اجل الرد على البرير وغارزيتو. هذا امر يحدده هيثم مصطفى نفسه..وفي النهاية هو ادري بمصلحته. = بصراحة ..ماذا تقول عن هيثم الان؟. هيثم مصطفى كلاعب كورة افتكر ما كان سوف ينفع الهلال في شيء ...حسب الرؤية الفنية ..ولكن هيثم مصطفى لاعب في الاطار العام عنده قبول وذكاء وهو شخصية قيادية. = حوار الاستاذ الرشيد علي عمر مع هيثم في حبيب البلد هل هو الذي شطب هيثم مصطفى من الهلال؟. ما نأكده هو ان هيثم مصطفى شطبته التقارير الفنية ...الحوار ممكن نقول كشف اشياء كثيرة للراي العام.
