ساخر سبيل يا الرخصة .. يا الموتر الفاتح جبرا أخبرنى شقيقى بأنه يود شراء (موتر فسبا) كيما يستغله فى مشاويره من وإلى أماكن عمله المتعددة إذ أنه يعمل بالأعمال الحرة : - لقيت ليا (موتر نضيف) عاوز أشتريهو من واحد وقال عاوز فيهو (2 مليون بالقديم) - والمشكلة وين؟ - لا مافى مشكلة بس عاوزك تمشى معاى بى عربيتك عشان أمتحن بيها عند ناس المرور عشان عاوز فى الأول أعمل ليا رخصة سواقة قبل ما أشترى الموتر بالفعل أخذ شقيقى معه (إتنين مليون وميتين ألف) على اساس أن إتنين مليون ثمن الموتر وميتين ألف هو الحد الأقصى (الذى يعتقده) لقيمة رسوم إستخراج الرخصة . وصلنا إلى مكان إصدار الرخص حيث قمنا بمقابلة الضابط المختص: - ياسعادتك الحقيقة عاوز أعمل ليا رخصة سواقة ملاكى وعاوز بس أعرف الرسوم والإجراءات بتاعتا - عندك رخصة قبل كده ولا أول مرة - أول مرة - طيب فى الحالة دى بتجيب لينا صورة فوتوغرافية وبتملأ الأورنيك ده وبتدفع الرسوم بتاعتو - ورسومو كم؟ - مية وسبعطاشر جنيه - خلاص كده ؟ دى الرسوم كووولها؟ - لا لسه .. بعد ده بتمشى لى واحدة من مدارس قيادة السيارات الأنحنا متعاقدين معاها تقوم تدرب معاهم شهر كده - وديل رسومهم كم ؟ - خمسميت ألف ! - خلاص بعد أمشى المدرسة دى أجى أمتحن وتدونى الرخصة كان نجحتا؟ - لا لسه .. بعد ما تنتهى من (مدرسة قيادة السيارات) بنوديك (أكاديمية المرور) بتاعت الشرطة عشان تتعلم ! - (فى إندهاش) : طيب أنا ح أمشى مدرسة قيادة السيارات عشان شنو؟ هم مش مفروض يعلمونى؟ - ناس مدرسة القيادة ح يعلموك العملى بس ! - وفى أكاديمية امرور ح تعلمونى شنو؟ - فى أكاديمية المرور طبعن ح نعلمك النظرى - وأكاديمية المرور دى رسوما كم ؟ - ميتين وتمانين ألف ! - وخلاص بعد ما أتم الكورس النظرى بتاع الأكاديمية ده أجى أمتحن وتدونى الرخصة كان نجحتا؟ - لا لسه .. لازم تمشى الفحص الطبى ويكشفو عليك عشان يعرفوك لائق طبياً ! - وده رسومو كم ؟ - .......................... - خلاص بعد كده كان ناس الفحص الطبى ديل لقونى لائق أجى أمتحن وتدونى الرخصة كان نجحتا؟ - لا لسه .. بتجينا هنا تدفع أورنيك خمسطاشر بتاع المالية !! - والكنتا بدفع فيهو داك شنو طيب ؟ - ديك رسوم بس ما بى أورنيك خمسطاشر - وطيب أورنيك خمسطاشر ده رسومو بى كم ؟ - رسومو مية تمانية وتسعين ألف - خلاص بعد ما أدفع أورنيك خمسطاشر ده أجى أمتحن وتدونى الرخصة كان نجحتا؟ - أيوااا ... كده ممكن تمشى تمتحن طواااالى بس بعد ما تدفع تااانى مية ألف ! - ودى بتاعت شنو كمان ؟ - خمسين ألف لإختبار (الخلف) وخمسين ألف لإختبار (الشارع) - أها وكان نجحتا فى الإتنين ح تدونى الرخصة ؟ - طبعن أكيد بس بعد ما تدفع دمغة بى خمسة جنيه !! كان الضابط يحكى وشقيقى يقوم بتدوين قيمة الرسوم على ورقة وضعها على رجله وما أن إنتهى حديث الضابط حتى بادره شقيقى قائلاً بعد أن قام بتضريب المسألة : - يا سعادتك يعنى هسه الرخصة بتكلف ليها زى مليون وميتين وشوية مش كده ؟ - أيوه بالضبط كده .. (مستطرداً) ده لو نجحتا من المرة الأولى عشان لو ما نجحتا من المرة الأولى فى رسوم ح تدفعا تانى زى رسوم الخلف والشارع ! - (شقيقى يبتسم فى مرارة) : تعرف يا سعادتك دى ما المشكلة ! - طيب المشكلة وين ؟ - المشكلة إنو فى الحالة دى الواحد يطلع الرخصة وإلا يشترى الموتر؟ كسرة : - نرجو من أخواننا فى الطيران المدنى أن يمدونا بتكلفة إستخراج (رخصة قيادة الأير بص) !! الرأي العام
