[email protected] سلام يا اهلنا في كل مكان انكسر المرق واتشتت الرصاص المرة دي سمع وشوف , اقروا واسمعوا المسخرة البتشل الزول واقف طولو اللهم لا إعتراض على حكمك يا الله ,,, لطفك يااا رب [VIDEO=http://www.youtube.com//v/fheYyg2SJrQ]WIDTH=400 HEIGHT=350[/VIDEO] ((كشف نائب رئيس حزب الوفد لقناة فضائية مصرية ان ال100 الف فدان الممنوح من حزب المؤتمر الوطني للحزب في شمال السودان عبارة عن نواة لمليون فدان متفق عليه وقال انهم سوف يمنحون كل اسرة من اسر شهداء الثورة المصرية 10 الف فداااان !!!! )) المصيبة بقت اكبر من التصور واكبر من كل العقول واكبر من هدايا ماعز وأضحية عيد !!! سؤال ليك يا البشير جاوبوا ولو في سرك , بتقسم في مساحات البلد كأنها ملك حر ليك وورثة جاتك من اجدادك القدماء لشهداء مصر وشهداء بلدك كانوا فطائس ولا ما بشر ؟؟؟ بتعوضهم شنو القتلتهم وسحقتهم في دار فور والجنوب والشرق ووسط البلد ؟؟ ولا ديل ما اولاد المصارين البيض ؟؟ منو السبقك على سواتك دي .؟ تقطع في لحم اهلنا الحي وتتبوبر بيه لي ناس يضحكوا ويقرقروا علينا وما محتاجين اصلا للمساعدة , إلا كان لي مصلحة ليك وشيتا داسيهو من العالم , حتى ولو محتاجين نحن ذنبنا شنو ؟؟ بلدهم زاتها عوضتهم بي شنو ؟ ولا إنت يا الأجواد كتير الزاد يا المجوع بلدك على رؤوس الأشهاد , بتتبرع بي حقهم والرماد كال كل حماد بالبلاد... ليه حق المطنقع الإسمو توفيق عكاشة إنه يقول السودان عبارة عن اراضي ومساحات مصرية بي اهلها تابعين لي جنوب مصر. ولازم يلم الشمل آجلا أم عاجلا وليه حق يقول إنه ما بعترف بي دولة إسمها السودان ولا حكومة ولا رئيس ولا شعب سوداني, إذا كان رئيس السودان يتفسح كما يحلو له في حق الشعب الجيعان وعطشان , ويشيل ويكيل لي جيرانه المصاروة وغيرهم بعدما شبع هو وحاشيته ومطبلينه وما عرف زاتو يأذي شعبوا اكتر من كده كيف !! شعب ساكت وقبلان بي حكم الذل والهوان والملطشة !!!! رئيس يعمل في عمايله دي كلها غير مبالي من عواقب و تدهور إقتصاد البلد وهبوط قيمة الجنيه الخبت الدلجة من كم سنة ووصل تحت الصفر , والبلد هاملة هملة العدو , غاب منها التمساح ويقدل فيها الورل زي ما داير ويرقص زي ما داير , مجوع شعبه ومطلع روحه بالمرض والجوع والتشرد , ضارب بي كل القيم الإنسانية عرض الحائط , طالع لي شعبو بي سكاتو ده في ضهروا ومدلل كرعينه والباقي تحت مركوبه البصوقر ويتفوجج بيه وسط كل الشعب القبلان بالحالة المزرية دي !!! وفاكيها في روحو ومكبر مخو شوية ومطنش المحتجين عبر الأجهزة الإعلامية المختلفة من مواقع وصحف وغيرها ,, كل الحاجات البنسمع ونشوفها تحصل قدامنا , ما غريبة مدام الناس قبلانه وساكتة على اسوأ وضع مرا على البلاد , ونتوقع الكثير المثير , نتوقع بعد كده بيع اهلنا زاتهم بي لحمهم وشحمهم , ويجوا المصاروة وغيرهم يقدلوا في البلد القدموها ليهم هدية في طبق من دهب , وأسياد البلد يبقوا عمال تحتهم ,,,, هملت يا السودان ,, الكنت بالخير والفضائل مليان , وبعد ما نخ اكبر حزب في السودان بمشاركته للعصابة في الخراب البحصل للبلد تحت عيون العالم , بعد كده نقول حليلك يا السودان خلاص , إنكسر المرق واتشتت الرصاص متاوقة يا شعبنا الصامت كل صمت ثانية منك تعادل خراب سنة وموت اللآلاف من الأبرياء,, الناس دي إتشرت بي فسادها , وشعبنا مخدر ونايم في العوج . المصيبة لما يصحا يكون الفأس قطع روؤس كل الناس,, حسبي الله ونعم الوكيل يمهل ولا يهمل ودعتكم الله
