قبل حوالي الاسبوعين كدة فتحت جريدة محلية صينية. انا اصلا ساكن في مدينة ووهان الصينية واللتي فيها جالية سودانية "معتبرة" ! فتحت الجريدة فإذا بي ألقا خبر وش والي الخرطوم في حلتنا ويزور شركة دونغفنغ موتورز بيسوي في صفقة بتاعت باصات جديدة وصفقات محتملة للبنى التحتية .. يا راجل؟ ياخ انت عامل فيها أردوغان؟ هو أصلا في بنى فوقية عشان تجي تفكر في التحتية؟ دا كلام دا؟ طيب ياخي قول عوك, تجي وتمشي ساي كدة من غير لا تحية ولا سلام؟ إلا الزول يقراها في جريدة محلية بالصدفة؟ ما سمعت بكلام من حضر القسمة فليقتسم؟ ما أديتنا فرصة نعزمك بيتزا وكلاب حارة وباقي الرفاهيات الفطمتونا وعودتونا عليها. وبمناسبة البيتزا والهوتدوق أو كما قال حضرة الريس (الكلاب) الحارة. متشكرين جدا عشان علمتونا الحضارة وأدخلتو لينا وجبات فخمة في عهد الإنقاذ و أنقذتونا من الأكل (السيء) الكنا بناكلو قبل ما تجي حكومتكم الظريفة الطريفة دي. بس أنا نفسي أفهم وين بالزبط الرفاهية في سندوتش الهوتدوق دا! هل هو انو اللحمة الفيهو دي نفسها رفاهية ومفروض ما ناكل لحمة، أو أنو هي ما مشكلة لكن الرفاهية لمن نخت فيهو السلطة، أو انو مثلا عنصر الكتشب دا هو البرفه عن البياكلو؟ ولو كان فعلا الكتشب هو عنصر الفخامة في السندوتش، هل لو حذفناه السندوتش دا بيكون عادي ولا لسة برضو سندوتش فاخر. طيب خليك من الكلاب الحارة دي.. لو شلنا الجبنة من الصفائح الساخنة كيف (البيتزا)؟ وباعتبار انو الحكاية هي فلسفة ومنطق هل لو ختينا جبنة في الفول بتعتبر رفاهية أو ان كلمة "فول" بتحذف عامل الرفاهية؟ - تبقى الاسئلة الآتية تطرح نفسها: 1- هسي دا منظر شعب مرفه؟ وما علاقة الكلاب الحارة بالرفاهية؟ 2- في الخمسة وهجرين سنة الفاتو ديل اكبر انجاز للحكومة كان البيتزا والهوتدوق؟ 3- علاقة الهوتدوق برفع الدعم عن المحروقات شنو؟ 4- لو كل زول حلف يمين ما ياكل بيتزا تاني، هل سعر الجنيه بيتصلح والأسعار بتنزل وبتعفونا من رفع الدعم من المحروقات؟ 5- ألوف براميل النفط وملايين الدولارات اليومية الما داخلة في ميزانية الدولة، بالزبط ماشة وين؟ لو دخلت في الميزانية ممكن ناكل الهوتدوق؟ 6- ماا تتوقع انو يكون لون باصات الوالي الجديدة؟ 7- هل تتوقع انو باصات الوالي الجديدة سوف تعاني من ارتفاع اسعار المحروقات؟ ياسر عبدالرحمن حاج الخضر [email protected]