بسم الله الرحمن الرحيم قرقِر يا قُرقُر .. ورشرش بالدم ساحات الهم قرر ما اصيبك هم وقرقر في الملكوت قرقر ما تفوت والعن سكات الناس وانضخ جبهاتم بالدم واعفص بالذل خدود الكل ما تفرز زول اعفص .. الباعوك والخانوك والشيطان والبارود وكلب التابع والما نافع قرقر طربان واقدل نشوان وغازل زهرات الغيم وانزل في النيل مع وش الفجر وأذن في الناس القامو خلاص كايسنو خلاص وفتِّح شرفات الكون يا سيد العون يا زاهي اللون وفتِّح أنهار الدم واغسل .. اغسل أوجاع الهم وارسم بي أحمر عطرك وجوه الذم والناس الغم قرقر .. قرقر يا عم ملامح الصورة الفي عينيك .. الإيد الراجفة والدقن الزايفة والعين الخايفة والخلقة الهايفة وضحت بي الحيل حنشيلها دليل نسقيها صغارنا واحفظها كبارنا لي يوم الحسبة ما بنرحم قُربى لا جار لا صحبة وكل الظهرت فيهو ملامح الصورة الفي عينيك قرقر يا سيِّد وارقد بي سلام موعدنا النيل ووش الفجر بيناتنا كلام جهِّز سجادتك حنصلي وراك ... عروة علي موسى ،،، [email protected]
