قصيدة جديدة للشاعر صديق ضرار يا عمر البشير غايظنى منك صمتك وانت بتشوف السوس بينخر تِحْتَك * * * يا عمر البشير أنا وانت أولاد دفعة ولازم أديك كلامَنْ سم يجَرِّى الدمعة البلد الوقعت دايرالا مننا رفعة وتنضيف شديد مِنْ مَنْ أشانوا السمعة * * ما يلقِّطوا ليك بعض الغلابة تشوفم ومن شدة التصفيق زاد الورم فى كفوفم ديل (تحتِ خَطِّ الفَقْرِ) فُوق لِكتُوفم بس من عشم فيكا صفُّوا صفوفم * * * ياهم حقَّ الفطور بيعانوا منُّو بشدة وشان ما يوصلوك ب: (يا عم وآخر شحدة) جايين لى لقاك بى كل حنان ومودة واسمع صوت هتافم ، يُورِيكَ خالية المِعدة * * * ما تسمع لى كلام النَذِلْ البٍضَحِِّّك ْفيكا يَغَمِّض ليك بى نبش الخراب عينيك واسمع لى كلامى وكلامى هو بِبَكِّيكا لكنه بِيَطَهِّرْ روحك وعند الله بيزكيكا * * * الغفران منَّ الله مو من البطانة الحولك البى اعتكافك يجاهروا وبى مغانم فضلك * * * ماشفنا منك زينة إلاّ ناسك تبجحوا فينا دُرْناك للصلاح ؛ يهديكَ ربنا ويهدينا نرفع شأن البلد إيديك على إيدينا لكن زى الشِباك حولك مضُوا وبَعَدوُنا * * * كيف تعزِل جميع الأمة مجتمعين شان رؤية حِزِب أفرادو معدودين كيفن تنضبط الشورى في إيدين من بالشريعة يغشوا ويتاجروا باسم الدين * * * عملا الفساد من حولك بيجمعوا مال كيفن يستقيم وزارة وتجارة تدخل بال ديل فى النهب مع البعض فى سجال ومصرين يكونوا وزراء ورجال أعمال * * * جات الإغاثة وناسك في الخلا اتلقوها فتحوا المخازن الخاصة ومن الثمين عبوها فرهدت الجيوب ولمليزيا بَوْوْ قدوها والناس التحت لو مقسومة ما بضوقوها * * * ورِّينى واحد فيهم تقول ود ناس فالحين ف الرَقِيص وفي نَبِيذْ الناس جايين من زبالة حثالة عفنة خلاص وكيف يرضيك يا عمر أَنْ أُمَّتك تنْدَاس [email protected]
