بلد مليانة حواتة.. النص..: صباحك يابلد تعمير .. عرق عامل ...صدق تاجر .. صوت ركشات ودرداقات .. كوارو حمير .. صباح يابلد قرآن.. تلاوة شيخ بعد تكبير .. وصوت حيران .. ستات شاي .. بتاع دكان.. طاولات عيش وكم فران .. صباحك يا وطن طالع .. وزيت طالع.. صفوف عربات مع الإستوب.. وبت بحشمة لابسة التوب .. ولافتة كبيرة في الشارع .. طفل ضائع ومتسول.. خفير للسوق . وصوت الطلبة والكمساري واقف فوق .. وشاب ح يقوم من المقعد عشان عمو.. بخفة وذوق. نهارك يا بلد آذان من الجامع ..وناس بي جنبو تتسول بتاع ورنيش يكشكش كش..كش.. وكم بائع بيتجول .. وست طعمية في الشجرة بعد ضل الضحى أتحول .. وصوت موتر يكورك ..ور..ور.. وبوكسي قديم بي مية دفرة ما دور .. وناس من بدري فارشة خضار .. تجيها الكشة بالدفار .. وصوت سمسار يجوط السوق عشان دينار وضل عصرية براد شاي .. ووسط الدائرة زول براي ..كلامو كبار.. ناس تحكي عن ام روابة وابوكرشولا ,وام درمان .. وناس تبكي.. وهي بتحكي .. عن الخرطوم وعن شيكان . وكم كافتريا في الشارع وصوت أنغام اغاني (الجان ) دا زول فنان.. كمان انسان .. بلد مليانة حواتة ...شباب رائعين .. بلد مليانة همباتة ..وناس ساكتين .. بلد مليانة رباطة ومنهوبين .. بلد مليانة مرتزقة وتجار دين .. بلد موجوعة في ذاتها وناس تائهين .. بلد مليانة صرافات وشحادين . بلد مليانة بالطلبة وخريجين .. بلد محتاجة لكل زول ومطاراتها مستفة يومي مغتربين.. بلد مليانة بالأشغال وناس عاطلين .... بلد جيعانة في روحها وتدي اللحمة مصريين.. بلد سايقاها بس بركات كرامات اولياء وصالحين .. بلد متناقضة للآخر بس محروسة بي يس.. الاول من مايو 2013 الهادي النعيم يس [email protected]