بسم الله الرحمن الرحيم أخونا د. عبد الرحمن الخضر تم إنتخابه لولاية الخرطوم لأنه مؤتمر وطني وليس لشخصه، وإن كان قد جاء فعلا عبر شخصيته وكاريزميته وإنحيازه للشعب فإننا ندعوه ليثبت ذلك وأن يترشح حتي في نطاق نقابة الأطباء البياطرة ليعرف قدره ومقامه دعكم من ولاية عدد سكانها أكثر من 10 مليون مواطن، وكذلك بروف حميدة أن يترشح فقط وسط جمعية إختصاصيي الطب الباطني . بروف مامون جاء بالتمكين والمصارين البيض وزيرا لصحة ولاية الخرطوم، ولكن قبل أن يتسنم كُرسي الوزارة إنتاشته أقلام جريئة لاتخشي في الحق إلا الله بما في ذلك أخونا د. محمد المعز حسن بخيت مُحذرا الوالي في جريدة آخر لحظة من تعيين بروف مامون لأن أبواب جهنم ستفتح عليه،والغريب أن د. المعز صار ناطقا بإسم الوزير، عجباً!! ذكرت الأستاذة إبتهاج العريفي في جريدة آخر لحظة عدد السبت 4/1/2014م، أن إستمرارية بروف مامون وزيرا لصحة الخرطوم قد تركت كثيرا من علامات التعجب والإستفهام؟؟!! مذكرات من كبار الإستشاريين و من أهل الولاء ضد سياسته ، صحافة كشفت وعرّت سياسته والتي هي دعوة حق أريد بها باطل، بل هو شخصيا ذكر أن المنصب قد أضر به أيما ضرر(السوداني) ونعلم أنه أكبر مستثمر في الطب تعليما وخدمات، فهل يمكن أن يكون حكما عدلا؟؟كلا وألف كلا، نتساءل ماهي أسباب الكنكشة؟ وجود مامون سبب صداعا وألما مُزمنا للسيد الوالي لدرجة أن حديث المدينة يتحدث عن موقعين أحدهما في شرق الخرطوم والآخر في شارع حوادث مستشفي الخرطوم ولكن بدون دليل، والعود كان مافيهو شق ما بقول طق؟!! يا جماعة الخير بروف مامون كما أسلفنا الحديث في مقالات سابقة له خطة واضحة المعالم لابد أن يُدركها كل من له قلب وضمير تجاه الصحة والإنسان ،، مامون جا عشان يجفف مستشفي الخرطوم من الخدمات ومن الأطباء خميرة العكننة للنظام وهم أكبر تجمع نوعي في منطقة وسط الخرطوم، وإمكن يكون الجماعة باعو أرض المستشفي قبُل زمن ، بس أسِع مامون بعمل في التشطيبات الأخيرة بإشراف الوالي المنتخب بالشعب !!؟ ولا إمكن الخضر زاتو ما عارف إنتخبوهو ليه؟؟ تقديم خدمات في جميع الأصعدة لصالح المواطن ومن ضمنها الصحة، البروف قال عاوز ينقل الخدمات للأطراف!! خلاص صدقنا وآمنا، طيب ليه إنت أنصاص الليالي تجي تعمل مرور وتصدر قرارات من أجل تجفيف المستشفي؟ إنتا خايف من شنو؟ مش القانون في صفك؟ والوالي مش منتخب؟ ليه ما تجي والشمس عز النهار وتصدر تلك القرارات؟؟ هل تستحي؟ أم إنك خايف من رد الفعل؟؟ قراراتك دي مش لصالح المواطن السوداني ؟ ولا إنتا ذات نفسك غير مُقتنع بها لأنها دعوة حق أريد بها باطل. يا بروف نُكرر للمرة المليون سياستك دي هي لتجفيف مستشفي الخرطوم وأخري ستتبعها لاحقا، نقابة مستشفي الخرطوم إعترضت ، وبعدين دي النقابة وتهتم بأمر المرضي ليه ما شاورتهم؟ ولا الإستعلاء والكبرياء والنرجسية؟ هل تعلم أن عدد إختصاصي الباطنية بمستشفي الخرطوم فقط 6 والبقية جامعات؟ ليه جففت جعفر إبنعوف؟ ليه جففت المخ والأعصاب بالشعب؟ وين أقسام المسالك البولية والأطفال وجراحة الأطفال والنساء والتوليد والنفسية والعلاج الطبيعي والمشرحة؟ أها ليه عملت تشويش علي قسم الباطنية بمستشفي الخرطوم وجبت إختصاصيين من إبراهيم مالك وبعد شوية من الأكاديمي الخيري ونهاية المطاف تمرقم كلهم وتصل إلي غايتك بقفل قسم الباطنية بالخرطوم؟أها أحاديث المدينة بتقول إنكم عاوزين تعملوا قسم للأنف والحنجرة بالأكاديمي ودا بداية لتجفيف المركز القومي بالخرطوم، يا خي إنتو لو بعتو أرض مستشفي الخرطوم قولوها عديل كده بدون المشوار الطويل دا وكل يوم تجي علي إستحياء ليلا وتمُر وتصدر القرارات التي في مُجملها تصب في صالح الخصخصة للقطاع الخاص؟؟ شي تاني أخبار تصاديق الصيدليات شنو؟ هل سيتم تغيير القانون الخاص بفتح الصيدليات؟ هل تم نقل بعض معدات النساء والتوليد من مجمع فتح الرحمن البشير؟ لي شنو؟ والهدف؟ معدات مستشفي أمبدة النموذجي إلي أين تم تحويلها؟ بعدين الأكاديمي الخيري دا حق الشعب السوداني وليس مملكة خاصة لجامعتكم، أها إنت تشيل وتردم وتبني وتصلح عشان شنو.؟ياهو براهو الشغال في الخرتوم؟ خافوا الله في حق الشعب السوداني؟ أها الإفتتاح السياسي للمجمع الجراحي بأمدرمان متين؟ بس ما تلحقوه أمات طه ومجمع عمليات حوادث النو؟ تغذية وتأهيل الأطراف، كلام سمح بلحيل، الشغل دا البنفذوا منو؟؟ الدكاترة طبعا!! قبل كم يوم أكتر من 3000 ألف طبيب كانو يحملون أوراقهم في حوش معرض الخرطوم الدولي ماشين يخلوا ليكم البلد !! إنتو بتسدو النقص الخطير كيف؟؟ ولا برضو مُصِر علي رأيك إنو الهجرة لاتزعجني وغير مُقلِقة؟ هل شاورت مجلس الوزير؟ هل شاورت المجالس الإستشارية؟هل راجعت وعلمت كم طبيبا هاجر منذ أن صرت وزيرا ؟؟ولا مش مهم؟؟خطتك من أجل توفير الرعاية الصحية الأولية ونقل الخدمة للأطراف ، أها بتين وكيف بتتنفذ؟ ومنو البنفذا؟ نديك معلومات إنتا والسيد الوالي المنتخب: الإختصاصيين المسجلين بالمجلس الطبي حوالي 6250 ، أها إنتا عندك كم في ولاية الخرطوم ؟ كما ونوعا وتوزيعا جغرافيا؟ مش سياستك عاوز تطوير الأطراف وخدمة المواطن وتقديم الخدمة في أقرب مكان لسكنه؟بس قول لينا كم؟ أنا أقول ليك: مستشفي الخرطوم التعليمي به 6إختصاصيي باطنية فقط من 1035مسجلين بالمجلس الطبي!!!، السيد مساعد ريئس الجمهورية قال هاجر في 2013 حوالي 9800 أستاذ جامعي! هل تدري كم عدد الأطباء بينهم؟ كلية طب سرت هاجر لها حوالي120 طبيب أستاذ جامعي، وإنت تجي ماري بالليل لتفقد أحوال صحة المواطنين؟؟ هل مشيت الأطراف؟ ياتو طرف دا العفرت بيهو كرعيك؟ الفتح وجبيل الطينة وقري وأمضبان والجزيرة إسلانج وعلي عبد الفتاح فيها كلها كم طبيب وكم إختصاصي؟ السيد الوالي إنها أمانة ويوم القيام خزي وندامة، ودوام الحال من المحال وفي ذلك اليوم لا ينفع مال ولا بنون إلا من أتي الله بقلب سليم ، وأنت والٍ منتخب لتخدم الشعب لا لتحكمه، فمتي تقف إلي صفه قبل أن يقف مُخاصما لك أمام الواحدالأحد وعندها لن ينفعك بروف مامون بل ستأتي فردا فماذا أنت قائل أمام رب العزة وتبريراتك لإستدامة بروف مامون وزيرا لصحة الخرطوم؟ مصلحة عامة أم كما أشار حديث المدينة؟؟ حاسب نفسك قبل أن تُحاسب، وحاسب نفسك اليوم فأبواب جهنم قدفُتحت عليكم بسبب سياسة بروف مامون وأنت داعم له دون حدود والكلام الليلة بي قروش بكرة بلاش وعندما ينكشف المستور إلي من تلجأ؟؟ يا دكتور الخضر مآسي الصحة التي حصلت في عهدكم وأنت مُتضامنا مع بروف مامون يلزمكم أن تتقدموا بإستقالتكم ، ماتت الزينة في الزيتونه، عملية ركبة خطأ في الزيتونه، الطفلة مناسك ماتت، ولادةإمرأة في كجرة في الشارع العام في العاصمة، توفت الطفلة أمل لعدم وجود حاضنة، توفي مريض المخ والأعصاب لعدم وجود إمكانيات و إسعاف بمستشفي يضاهي مشافي أوربا، مأساة أكثر من 60 مريض بسبب السودومونص كما قيل ولم تتحرك أو تُقدم إستقالتك!! عشوائية التخطيط والإفتتاحات السياسية، المأسي علي قفي من يشيل وإنت ووزيرك مكنكشين وكل واحد ساند التاني، بس لي شنو؟ مصلحة الشعب الإنتخبك ولا مصالح خاصة، إذا الشعب يوما أراد الحياة سيطيح بكم لأنه يملك حق إسداء النصح و عزلك ومحاسبتك وعقابك ، أليس كذلك لأنه إنتخبك،؟ ماذا فعلتم بتوجيهات السيد رئيس الجمهورية بخصوص إعادة الكشف الموحد لتنقلات الأطباء وحل أسباب هجرة الأطباء؟ ولا منتظرين نهاية التجفيف؟ ماذا فعلتم بتوجيهات السيد النائب الأول بخصوص مستشفي إبراهيم مالك، ولا راحت شمار في مرقة؟؟ كسرة:هل الأكاديمي صار جزءا لايتجزأ من جامعة مامون حميدة وأصبح الجيب واحد؟ماجدوي ما تم إفتتاحه سياسياولم يعمل حتي الآن؟ المجمع الجراحي لإمدرمان متي يتم إفتتاحه نظريا.؟ خطابك للأستاذة إشراقة كان سقطة بروتوكولية ودستورية تدل علي الإستعلاء ، أها خطابكم للتعليم العالي والبحث العلمي بخصوص الأكاديمية أسبابو شنو؟ ورد الوزارة ليكم شنو؟ التكرار بعلم كتير!! بعتو كم متر من مستشفي أبوعنجة للجامعة الأهلية؟ ليه؟ أليست هي أرضا مُخصصة لهدف؟ من أعطاكم حق التصرف؟ لماذا بعتم شرق النيل؟ كيف ومتين وبي كم وقروشو مشت وين ؟ستظل مستشفي جعفر إبنعوف محفورة في عقول الشعب السوداني مهما تضاءلت اللافته لأن بروف جعفر كان إنسانا قبل أن يكون طبيبا وكان أخلاقا وقيما ومباديء ومثل وعالما والعلماء ورثة الأنبياء، والأمم الأخلاق ما بقيت فإن ذهبت أخلاقهم ذهبوا،،،وسنظل نحفر في الجدار، فأما فتحنا كوة أومتنا علي سطحه من أجل هذا الشعب. يديكم دوام الصحة وتمام العافية والشكر علي العافية. [email protected]
