خليتا وراك خطوب في خطوب خليتا وراك الخربانة كُرب في كُرب حرب في حرب خُطب في خطب تعب في تعب رحلت في يومِ مبروك الأربعاء يوم إستجابة الدعاء لآخر الانبياء أياء محجوب خليتنا وراك وأنت رسول لطاغية لظالم لجهلول رسالتك وصلت أوعك تخاف ألم تقل حرية التعبير عبير ألم تكن ديمة للأغبش نصير ألم تكن قلبا كبير زولا نفاج لكل خير إلفة ومودة وقرقراب أيا محجوب خليتنا وراك فرقتك ما إغتراب انت القريب والناس قراب أيا شرفنا الباذخ ويا محجوب من العين نعم محجوب لكنك وين جوة القلوب جوة الفكر جوة في الأرض البكر وأرضنا زي مريم وزيها كم عامرة حنية طيبة النية تتصبر شوية لو تقدر عليه رحيل الشريف وداع الخريف أيا محجوب خليتنا وراك يا صاحب مطيرة بس تأكد أن بعدك من صياغنا ومن صياغك إسمك الختيتو فرهد عشب أخضر في الجناين في الشوارع نيمة نيمة في مصابيح المدينة في فوانيس الضواحي تملا كل الدنيا سيرتك إسمك الخلانا نقدر في ظلام الليل نعاين في ظلام ناس ديل نعاين أيا محجوب خليتنا وراك وبنقاوم كل حرامي يطل علينا في ليلة من ذات الليالي يجينا ما بين صاحي نايم مدفوع بأحلامو الغبية يسرق الناس والبهايم آخرتا هو البندم والدايرو ما بنتم كالعسكري الفراق أيا محجوب خليتنا وراك ما بين مقابر وبين زقاق بين كتمة كتمة ظلمة ظلمة وعتمة عتمة إلا لكن حارة حارة زنقة زنقة بيت وبيت إعصار إعصار خطوة بخطوة وإيد على إيد وسِلّم سِلّم ما بنسلم وشعب معلم أيا محجوب خليتنا وراك ودعتك الله يا محبوب ووعد أخير زي ما انت قلت قبيل بأيدي قوية نحفر أعمق نرمي الساس للسودان الوطن الحر مرفوع الراس للحرية بلا دورية ولا تفتيش ولا حق ينداس أيا محجوب خليتنا وراك وبأيدِِ عِلْيَة الرحمة الرحمة يا الله رحمة ربي تتولاك . خالد دودة قمرالدين [email protected]
