صديق عزيز شغال في ولايه الشارقه بالامارات العربيه المتحده يعمل مديرا لاداره تحصيل الديون في بنك مشهور. في خلال كم شهر كده قام رفت ليو عدد لا يستهان به من الموظفين الشغالين معاهو لاسباب مختلفه تتعارض مع قوانين العمل. نائب المدير كتب للمدير وقال ليو شوف لينا السوداني دا جنه ورفت الناس كلهم. المدير لقي انو القانون بديو الحق يرفت اي زول يشك فيو بدون تبريرات شفهيه او مكتوبه حتي للمدير نفسو. يعني زي العندنا في السودان مابنسميا المحاكمه الايجازيه. لمن ناداو في المكتب, المدير سالو ليه عملته كده, قال ليو " شوف. انا مامفروض بالقانون اسجل اي حالة فصلته فيها زول من العمل. بس عشان عارف الناس ممكن تتكلم, سجلته كل الحالات الاتخذته فيها قرارات زي دي. بعد شويه برسل ليك ايميل بي (كوبي) للنائب فيها الاسباب الحقيقيه الخلتني اعمل كده. تاني حاجه, اتحداك جيب اي زول رفتو وادرس حالتو, مش حاتشكرني عشان عملته كده, دا انته حاترحلو عديل كده. تالت حاجه انا مامستعد اشغل معاي زول مفروض يترفت, واذا اجبرتوني اعمل كده مع الاسف حاضطر ارفت نفسي." وطلع من المكتب. بلاي شوفو العلم دا كيف. زولنا دا في العقد الخامس من عمرو ومن حمله الماجستير من جامعه معترف بها دوليا. هسع بلاي السوداني الاصيل منو؟ ممكن اي زول يوريني الفرق بين سودانيه الراجل دا وسودانيه عبد الرحمن الخضر؟؟ يعني الببقي داك والي ماقادر يحسم امر ولايتو ودا مغترب مسكون بي الم الغربه بخدم في بلد تانيه وناس تانين شنو لو ماخاينه ساي؟ لمن عرفته تلفون الراجل اتصلت بيو في الشارقه وسالتو عن الواقعه حكاها لي بي حزافيرا. سالتو من رايو في (اللبع) بتاع ولايه الخرطوم والوالي وناسو الضربو القروش. بي كل ثقه في نفسو قال لي " تعرف ياصديقي. المسئوولين في السودان والناس الحولهم مع فقه الستره الدخيل علينا دا وحكايه احفظ كم سوره من القران, مابتودي البلد لي قدام لانو الناس ديل جلدهم بقي خشن بستحمل اي شي. كنته حا اقبض اي زول عندو علاقه بالموضوع دا واكون لجنه اقعدا في اكبر مكتب في الولايه واقفل عليهم الباب واقيف بره شايل صوت عنج. اي واحد ينتهي من التحقيق ويجي طالع ارصعو ليك 100 صوت افش غبينتي وغبينة الشعب المسكين دا. بعد داك اناديهم واقول ليهم تاني ماداير اشوفكم قدامي, وممنوع تدخلو اي مكتب حكومه ولا تجو ماشين بي جنبو ساي". يعيش المغتربين. معقول ياجماعه مكتب الوالي بقي زي ميدان جاكسون ختف عديل كده وهو ماعارف؟ ونحنا تعبانين وروحنا طالعه مالاقين ناكل غير الكل يوم معانا؟ والله حرام عليكم. البغيظ, قرينا في الاخبار ناس المؤتمر الوطني قالو الوالي ماحايستقيل وحايظل والي علينا لغايه السنه الجايه. نحنا مادايرنو ياخ حتي لو طلع لينا بترول عديل في ميدان المولد. داير يبقي لينا ذي بتاع الجزيره ويقول منتخب وديموقراطيه ورصه زي دي. مادايرنك يعني مادايرنك حتي لو بقيت القعقاع ابن ابي الصخر برضو بنكرهك و(كجناك). كيف تخلي ناسك ياكلو قروشنا؟ وحكايه انك ماعارف دي مش دليل فشل في اداره مكتبك؟ اها نحنا عرفنا المليارات دي, الماعرفنا كم؟ رساله اخيره للسيد الوالي. اكيد سمعته بي كوريا الجنب الصين البتمشي ليها طوالي ديك. بس سمعته بي العباره الكوريه الماتو فيها الطلبه؟ قالو رئيس الوزرا بتاعم قال ممكن يستقيل لانو فشل في حمايتهم من الغرق. هل سمعته بالاستاذ الانتحر الماقدر يعمل حاجه ينقذ بيها الطلبه المساكين الماتو وقال يحصلهم لانو حرام يكونو ميتين وهو حي؟ دايرين نذكرك انو الناس دي لا بتؤمن بي سيدنا محمد ولا بتصلي الصبح حاضر ولا مشت الحج قبل كده. تجي انته مكتبك اتلهطت منو مليارات متلتله زي دي وبتعاين في وشنا كل يوم بدون خجل وزي الماحصل حاجه وكمان داير تقعد للسنه الجايه؟ ياخ انته قلته لو الناس طلعت مظاهرات بتستقيل, يحصل الاكل دا كلو قدامك تقوم تصهين؟ لو استقلته, خير وبركه. ولو لا كمان, الفيك اتعرفت. Follow me in twitter@ elrazi_elrazi
