شوقي اليك غلب يا أم در ومسح أية الظلام بالنور ده ليل الغربة كاتم اسرار وشوق الغربة نورو جهور جعلني في ومضه كالمسحور في دنيا نقية كالبلور وتركني أغني كالعصفور واشوف الدنيا لافة تدور وأمرني أطير وأحلق فوق أعدي بلاد .. وأعدي بحور وأرِك في (أبوعنجة) عند (الخور) وامشي (الطابية) ليها أزور وزي درويش أشيلو بخور وشارع شارع ألف وأدور وأهتف أقول بحب أم در وأريد ( أم در) وليها بدور وكل كرام بدوروا (أم در) ليهم أريد وليهم أدور ----------------- وزولاً بعشقِك يا أم در أكيد يا أم در بكون معذور ما انتِ الدرة للسودان وجناك بالحيل عليهو غيور بلد ولدوك بالتكبير وبالتهليل ووين (غردون) وكل مغرور أتاك ( المهدي) (بالنية) وزي النيل.. بكون مأمور وعطّر بالنضال سيرتك اخاء واباء بناها جسور رجالك من ربوع سودان وضعوا الساس ورفعوا السور رجالك وحدوا السودان لأغلي حروف غرسوا بذور شموخ زي (مرة) و(التاكا) بشر وخير ورحبة صدور نخيل وأبنوس ونقية نفوس بلد طيبة وربي غفور --------------- وقالوا مدينة مصنوعة !! وكم صنع الله جنة وحور حواري وأزقة وريحة طين تضارع في قلوبنا قصور جمال هادي وبدون ديكور وأصالة كنكهة الحلومر شوارعك جد حميمية وما بقدر أقول بالدور وأحبك من ( فتيح) (لاب روف) ولي...( كرري) وضعت زهور وبقيف في (الأربعين) وبلثم دربنا الكان علينا صبور وأريد ( لكدوك) و(حي الضباط) جدودنا الظبطوا للطابور و(موردة) في الرجال (بانت) هواها الدولة والدستور و (عباسيه) ليها بدور وبعز ( الامراء) والجمهور وبطوف في السوق وحول السوق وفي ( شارع الصاغة) أحلي شذور وبقيف في (مسالمة) بطري (غزال) و (بحي عرب) وبتمو مرور وفي ( شارع الدومة) بمشي أحوم وأقول (القلعة) ليها (بدور) وأحب (أم در) قديمة جديدة هناك الالفة ليها جذور (خليلك) غني للعزة ولي (عازة) وكنارك من (سَرور) مسرور (لواء أبيض) و(خريجين) طردوا غريب ذليل مقهور وفي التاريخ (هلال) و (مر يخ), أصلا أبوهم (القرقور) ----------------- وزولاً بحسدك يا أم در اكيد يا أم در بكون معذور ومهما جارت الأيام وقالوا عليك كلام الزور دي حكمة الله في الأيام تسر أزمان وتارة تجور ومهما طالت الألام بتمضي الظلمة بكرة تمر وبترجعي سيرتك الاولي وبجبر خاطرك المكسور و ليك العزة يا سودان عزيز فوق كل دكتاتور وزولاً بحسدك يا أم در أكيد يا أم در بكون معذور وزولاً بعشقك يا أم در اكيد يا أم در بكون معذور ضياء الدين مدثر رجب برلين - 2013 ابريل [email protected]