هو إجتماع سري سريع تم في الخرطوم والسيسي في طريق عودته من إجتماع الإتحاد الإفريق في مولابو غينيا وهبط بالطائرة في الخرطوم يحيط به طاقم متشابه من الحرس الأمني بنظاراتهم السوداء مثله تماماً كفلم (المختار) وكأنه تذكر محاولة إغتيال مبارك الغادرة في مطار أديس أبابا بتخطيط سوداني وإغتيال الأمريكي وسائقه فإيه المانع من تكرارها مرة تانية في الخرطوم وهي تعج بالمدججين بالسلاح والمليشيات وثلاثة لواءات من قوات ما بات يسمى بالدعم السريع، فالحذر واجب. ومن الحوارالسري العاصف السريع ، السيسي للبشير: يازول هيي هوي فتِح عينك دي كويس زي الفنجال أنا سكت ليكم كتيروالله تكتروا تقللوا بدل حلايب وشلاتين بس، نخش ليكم بورتسودان وسواكن وطوكر عديل وأساساً كلها من الأجزاء المتاخمة والرابطة لحلايب شلاتين السويس وأمامنا الآن ننظر لأوسيف فأحسن ليكم قفلوا خشومكم الكبيرة دي. أصلا البداية كانت: في الطائرة الملكية الخاصة ذات الطابقين والأجنحة الفندقية الراقية والتي إلتقى فيها جلالة الملك عبدالله ملك السعودية مع المشير(سابقاً تنازلاً للترشح) عبدالفتاح السيسي رئيس جمهورية مصرالعربية الجديد وهاك ياونسة كبارة: دولار،ريال إستثمار ودٌقاقة أخوان وإرهاب وإعدامات مهمة وجيران معدمين مشاكسين. وفي حكاية جيرانكم المفلسين وسليطين وكرهوا شعبهم البلد والدين ديل الفي جنوبكم ، قال الملك للسيسي شوف ليك طريقة ناجعة معاهم وأخرسهم في حكاية إنقلاب ..إنقلاب الملصقنها بيك دي وكمان مدعومين من قناة الهبر الجزيرة وما أدراك ما الجزيرة، وكأنهم أتوا على جناح طائر الديموقراطية المأمون في السودان المنكوب سنة 89م بديكتاتورية دينية متسلطة فاتت حد المعقول،ونحن ذاتنا وكل دول مجلس التعاون مكرهننا الإعلام والمرقة مرة مع القرضاوي وخطب ماأنزل الله بها من سلطان ومرة إتفاقيات في دوحة قطر لاتهدأ ولا تستقرويعاد تحميضها والترابي ماشي والترابي جاي وحتى الصادق معاهم ماقصر، ومرة يشحنوا سلاح لسيناء ومرة ذهب في الحدود ومرة شحنة الإمارات وشركات ضخمة في دبي ومرة بوارج إيرانية في السودان وكمان جابت ليها صواريخ بعيدة المدى ضد السعودية من بورتسودان، الناس ديل لازم تشوف ليهم حلل ولوكان ذكر تمساح ما مهم ونحن معاك قلباً وقالباً. والله نحن مازال الملك مواصلاً حديثه للسيسي حاولنا نصلح ونستثمر أراضيهم ونزرعها ليهم ونفيد ونستفيد وكنا نسمع كلامهم وشعاراتهم في الدين نصدق لكن لقينا عمائلهم مافي غير البلع والقلع والرشاوي والكوميشن والعمولات والفساد ما عندهم عمارفنستغرب وكل واحد فيهم عامل أب عرام،فهربنا فررنا ومرقنا بجلودنا زي شعبهم المسكين خرج بقضه وقضيضه تركه لهم و جري، وأقول ليك وما تكلم زول: أدونا أرض مليون فدان إغراءاً بتراب الواطة زي التقول لآعبين ليهم لعبة خطيرة كدة أودايرين يبيعوا السودان ويهربوا ماليزيا أو الصين، ولاد الملاعين ديل بيسووا في عملة كبيرة ودايرين يزوغوا ويورطونا مع الشعب الطيب ده، لكن إنت معاهم في الحدود ومحتل منهم حلايب وشلاتين وعاملين أضان الحامل طرشة وبيخافوا منك خوف الجن عشان كده توعدهم بالمزيد وهددهم وخليهم يمسكوا الدرب الصحيح. وسافر السيسي لغينيا الإستوائية وهويفكر في كلام الملك عبدالله وريالاته وبتروله والهاربين من أخوان مصر وعلاقتهم بالكيزان والخاذوق القاعد في جنوبه وخاصرته هذا ملياً. فقررالسيسي أن يعرج على البشير ويجري معه ذلكم الحوار العاصف: يابشير هوي سمعت إنكم شابكننا إنقلابيين ..إنقلابيين صحي الكلام ده!؟ ما حصل... ما حصل كيف وجرائدكم بتقول كده يازول وقنواتكم كل يوم تتكلم عن الرئاسة الشرعية المغتصبة من مرسي ،هوي فتِح عينيك دي كويس جداً زي الفناجيل أنا سكت ليكم كتير والله تكتروا تقللوا بدل حلايب وشلاتين نخش ليكم بورتسودان وسواكن وطوكر عديل أحسن ليكم قفلوا خشومكم الكبيرة دي وإنت عارف إنو الساحل وكل شمال خط 10 درجة وما حوله بل وحتى إهرامات البركل وآثار كرمة والكرو والنقعة والمصورات تحكي عن ذلك وكذلك إهرامات مروي والبجراوية جزء لايتجزأ من مصر من قديم الزمان. منو القال ليك الكلام الفاضي الفارغ ده يا أخوي السيسي، وكمان نحن عندنا حرية صحافة تكتب على كيفها. على كيفها ! ؟ كمان الملك بيكضب زيكم يازول وللا شنو!؟ علي باليمين كضاب وستين كضاب وأحلفلك بالطلاق كمان، ونحن ذاتنا كضب فينا وقال نصبنا صواريخ عابرة للبحر الأحمر ضد السعودية حسادة ساكت منو وفتن،أمشي تأكد براك بي نفسك وشوف كان عندنا صاروخ واحد ولو مثل صواريخ علب صفائح حماس المدخنة ديك عشان تآمن. وبعدين معاكم في سد النهضة الإثيوبي وتأييدكم له معاكسة لمصر فقط دون مبررات وبدون شروط وبدون فهم فلابد من قطع لسانكم الطويل هذا، فكلما نقول إتحسنتوا شوية تزيدوا كلام صرتو طويلي لسان وقليلي إحسان إنتو قايلننا زي شعبكم الفتران المغشوش ويأكل قرقوش ولعبتو عليهو وأكلتو بتروله وذهبه وأراضيه بدلاً من يأكل مما يزرع ويلبس مما يصنع أكلتو قرض وكمان دايرين تلعبوا مع المصرين دي مصر هبة النيل!؟ خلاص قول للملك رسلنا ليكم إناث الإبل والضان حتى ترضون وإنتو ما بنقصر معاكم في القطن والسمسم والعجول والخرفان المدغلبة للضحية وحكاية الموية دي بنشوف ليها طريقة. لا..لا..لا نحن مازي صاحبك مرسي وجماعته نا س لقف وأخونة وتمكين وعمولات ساكت نحن سوينا حد أعلى للمرتبات بين الوزير والغفير ما في فرق كبير ، بل تبرعت بنصف راتبي وكل ممتلكاتي حتى الوارثة من أبي مٌش زيكم ما في وطنية تبيعوا بلدكم لمصالح ضيقة ولمصالح تنظيم موهوم، إنتو حتى شعبكم طردتوه وهجرتوكفاءاتكم للصالح العام من أجل تنظيم الأخوان وآويتو المحكومين في مصر عندكم وبعتو الأرض فهرب الشعب أنا ما بصدقكم وأسع سمعت قالوا في مظاهرات عندكم تأييد لمرسي عينكم قوية ومفلسين، نحن وشعب السودان شعب واحد وما بنرضى له هذا الغلاء الفاحش والجوع فالسودان جزء لايتجزأ من مصر وما يصيبه يصيبنا بس إنتو ومرسي وجماعتكم مصيبتنا الحقيقية والقضاء المصري قال كلمته فيهم وإنتهى ،فأعمل حسابك. وفي المؤتمرالصحفي السريع تحدث السيسي برسالة عامة للشعب عن المياه وسد النهضة وإنو السودان جزء لايتجزأ من مصر وما بننساكم ، واللبيب بالإشارة يفهم. عباس خضر [email protected]