ماقبل الشروع فى الموضوع :- شاب ذهب لطلب يد فتاة وكانت بدينة جدا غالى والدها فى المهر ساله الشاب :- ليه ياعمى هوا الكيلو بكام ؟ شاب اخر لم يجد بدا من تلبية طلب اهله و اسرته بضرورة تغطية قدحه وعبر عن استيائه من الامر لاصدقائه الذين ذهبوا معه الى بيت العم وهناك وبينما كان احدهم يلومه :- يازول عليك الله قدح شنو كان تصبر شوية بدل الماسورة دى ياخى بت عمك دى شينة شناة مرة انا شفتها قبل كده ويستمر فى حديثه رغم كل محاولات اسكاته بشتى الطرق من العريس المرتقب و التى زادت عند مرور احدهم واقترابه منهم واخيرا صرخ بوجهه : ياخ ماتسكت ماتعمل لينا مشكلة ده ماابو القدح ذاتو ! ويحكى ان احداهن وهى جاية من الجامعة (سكاها كلب ) خافت وارتعبت وسقطت على الارض ومعها كتبها اتسخت ملابسها نهضت لتواصل الجرى ودخلت من اقرب باب مفتوح وبعدما قامت بالواجب علمت ست البيت بالقصة وبعنوان سكنها بعد ان دارت بينهما ونسة وحدث ان ابنها القادم من بلد الاغتراب لانجاز موضوع الزواج شاف البت وعجبتو وبعدها باسبوع كان عقد الزواج ويقال والعهدة على الراوى ان بنات الحلة اصبحوا يضعون خطط فيها رصد دقيق لاماكن تواجد الكلاب ! قالوا واحد اسمو حامد مرض شديد وكل يوم حالتو ماشة لي أسوأ ودوهو الدكتور قال الزول ده ما عندو حاجة وانا ذاتى ماعندى ليكم حاجة أمو قالت يمكن تكون دي عين يعني الولد (معيون) وكده ودوهو لي الفكي عزم ليه وأداه محاية وبخرات بي لمدة كم يوم وبرضو الحال في حالو..ناس داخلين وناس مارقين فى النهاية قالوا ا.. خلاص ودوهو الخرطوم النشوف الجنا ده مالو..وقبل ما يودوهو الخرطوم جات حبوبتو وقالت لي أمو أسمعي هنا الجنا ده ما عيان ولا حاجة الجنا ده بدور العرس كدي عرسوا ليه.. وفعلاً إتلموا الأعمام والخيلان واختاروا ليه (بنية) حليوة.. وعملو العزومة والعرس والناس كلها منتظرين يشوفو حامد البحصل عليه شنو بعد العرس يا إما بقى تمام ونصح يا إما ... مرة واحدة.. لكن من يوم قالو دايرين يعرسوا ليه صاحبك اتنفض وقام على حيلو زى الحصان وبعد العرس تاني ما قال عندي كدا ولا كدا ... قالو واحدة قريبتو عملت زيو لما دايرين يودوها الدكتور قالت ليهم لالا مافى داعى عندى بس مرض حامد ! مابعد الموضوع :- واحد بعد مااتزوج اصبح كثيرا مايسمع السؤال التقليدى :- اها لسة مابقيتو تلاتة ؟ زهج جدا لحدى ماقال لاحدهم :- لو ماالاجاويد كان بقينا واحد , تزوج رجل امرأة قبيحة الوجه.. وفي صباح اليوم التالي للعرس.. قالت لزوجها: على من تريدني أن أظهر..؟ و ممن تريدني أن أختبئ..؟؟ فقال لها: أنت في حل.. أن تظهري لكل الناس إلا أنا!! وشكا رجل لصاحبة من امرأته فقال له: أتحب أن تموت قال: لا والله.. قال: ولم..؟ وأنت معذب بها..؟؟ قال الرجل أخشى والله أن أموت من الفرح , واحد زوجتو قالت ليو على الحيطة دى ابنيها عشان الجيران العزابة ديل مايشوفونا قال ليها :- كان شافوك براهم بيبنوها , واحد كانت اهم مواصفاته للاختيار ان تكون جميلة و (عيونا كبار) الجميل انو لقى المواصفة المطلوبة المحزن انه لم ينتبه لوجود مواصفات غير مطابقة للاختيار السليم لانو عيونا فعلا كبار لكن لسانا طويل وما اقبح اللسان الطويل , كان لعبوا معاك ب 4-4-2 ولا 4-3-3 يعنى لو تم القبض عليك بطريقة القدح كان بخطة الكلب كان بالاهل ,الحلة ,الاصدقاء , المعارف ,العمل, فيسبوك ,واتساب ولاغيرو لاتتنازل ابدا مهما يكون عن المواصفات السليمة و لضمان ان يكون نصيبك طيبا كن طيبا قال تعالى ((الطيبات للطيبين والطيبون للطيبات)) , لاتتوقع مجيئه كذلك وانت كلك على بعضك مش حلو فما ممكن تكون دايرا تبقى مية فى المية وانتا صفر فى المية من حيث الالتزام بالدين وطبق عمليا الحديث الشريف الذى قال فيه الرسول صلى الله عليه وسلم " تنكح المرأه لأربع لمالها ولجمالها ولحسبها ولدينها فأظفر بذات الدين تربت يداك. أبوبكرهارون على طه كاتب وقاص سودانى [email protected]