مسرحيه؟ والله كان مسرحيه ماعارف. انتو الناس دي حكايتا شنو مع قيادات حزب الامه؟ اي خطوه يقومو بيها يشوفوها مسرحيه. وزي ماكتب واحد في النت الصادق مشكلته كبيره. يصالح ووب , يحارب ووب, يقاطع الجبهه الثوريه ووب يتفق معاها ووبين. يكون مع الحكومه تلاته ووبات ويهاجما مليون ووب. حتي الندوه النظمته المعارضه في لندن لي فاروق ابوعيسي رئيس قوي الاجماع الوطني عشان يورينا هم منو وبعملو في شنو وحسب قولو كمان دايرين يعرفو راينا كقوي مستنيره في كيفيه تشكيل المستقبل, اتحولت الندوه دي لي هجوم لاذع لي حزب الامه والجبهه الثوريه كانهم هم الحكام للسودان الان. فاروق ابو عيسي قدر ماحاول ينظف لسانو من الكلام البيسئ للسيد الامام فشل في ذلك واتعامل مع اتفاق باريس كانه اتفاق مع المؤتمر الوطني وليس بين اكبر قوي مدنيه معارضه وعسكريه لازالت هي المقاتل الوحيد في الميدان العسكري. بعدين هي قوي الاجماع الوطني دي ذاتا شنو غير مجموعه من الاحزاب بعضها لا تزيد عضويته عن اصابع اليد الواحده. يجي السيد فاروق ابوعيسي يحاول يقنعنا بانو داير حزب الامه القومي يرجع عضو في قوي النتجمع وداير واحد من الاحزاب دي يكون رئيس عليه كمان؟ دي يفهموها كيف ياحضره الاستاذ. غايتو الناس ديل مغصونا وساهرو بينا لغايه ماقرب القطر الاخير يفوتنا. برضو في الندوه دي ريحة المسرحيه كانت طاقه. اسطوانة المسرحيه المدوره من امبارح في خبر اعتقال الدكتوره مريم كانت فعلا سمجه وممله. ياخ مسرحيه شنو والدكتوره جات نص الليل لقت ناس الامن مستننها وراحو ماخدنها من جوه الطياره لي مكاتبهم وهاك ياتحقيقات لغايه تاني يوم وبعد داك ودوها سجن امدرمان. انتو الناس دي فاكره التعامل مع ناس الامن شئ ساهل ولا القعده اليوم كلو نوع من الترفيه, ولا سجن امدرمان خلاص فندق خمسه نجوم؟ المغالط اليسال المناضل محمد ضياء الدين. سجن امدرمان دا لو جيت ماشي بي جنبو بس يحصل ليك اكتئاب. يعني هل ممكن ناس الامن بالتعاون مع ناس حزب الامه يعملو مسرحيه علي ضوءها يسوقو الدكتوره يودوها سجن امدرمان؟ يجوك ناس عشان يقللو من نضال الدكتوره يقولو ليك هم زاتهم في سجن امدرمان عاملوها مازي بقيه المساجين. ياناس المعارضه بطلو سخف معاكم علي الاقل لو ماقادرين تفهمو كيفيه النضال واحفظو للناس حقها. البفرس في ناس المعارضه ديل لواكتهم لي حكاية المسرحيه دي. ياخ ديل نفس الدكتوره دي ناس الامن قبل كده كسرو يدها عديل كده, برضو الرمم ديل قالو دي مسرحيه. غايتو ولا نحنا شعب اهبل ولا الناس المسئولين مننا ناس هبل. بصراحة كده ناس حزب الامه حسب ماشايفينهم لا بتاعين مسرحيات ولا الله قال. مما جات الانقاذ, الناس ديل خطهم واحد اصلو ما اتغير عكس ناس كتار بس سحليه وشاركو عديل في الانقاذ وامكن كمان يكون هبرو ليهم كم هبره تحت تحت كده. زعماء حزب الامه مكانك سر. الناس الداوشنا كل دقيقه بي حكاية عبدالرحمن الصادق المهدي بنقول ليهم دا ضابط في الجيش ارتضي يدخل الحكومه ودخل. ومن ديك سقطت عضويتو في حزب الامه والكلام دا اعلن علي الملا بس مافي زول داير يصدق والمثل بقول " القاصدك بحدر ليك في الضلمه". نجي للشئ المحير. لاحظنا كلما ناس الامن يقبضو الامام ولا اي واحده من بناتو يجي زول يقول ليك ومال اخوانهم بعملو في شنو ماواحد في الامن والتاني في القصر كيف يرضو يقبضوهم. هسع دي بلاي تتحسب لي ال المهدي ولا عليهم؟ لو اتدخل اي واحد منهم, القيامه حاتقوم خصوصا من انصاف المناضلين امثال المدعو مادبو والذي يمثل عار في جبين حزب امه وحسين خوجلي الاتعود يبني بطولاتو علي حساب الحزب الكبير. الشايفنو نحنا غايتو كل زول في ال المهدي بياكل في نارو. المناضل بخش السجن والمنبطح بمشي القصر وسيظل حزب الامه ثابتا علي مبادئه الاتعمل من اجلها. اخيرا نصيحه للمعارضه. الشايف دخول مريم السجن مسرحيه خليو يمشي ينسجن بدون مسرحيه عشان يعرف المسرحيات الجد. والشايف التوافق بين حزب الامه القومي والجبهه الثوريه نوع من (الغوصنه) اليورينا شطارتو ويسقط لينا الحكومه دي. اهو ديل ناس حزب الامه ودي مقدرتهم وداك سجن امدرمان ورونا بدخلو كيف من غير مسرحيه عشان ذاتنا بعد كده نحنا كشعب دايرين نفرز الحملان من الذئاب. الحريه لدكتورة مريم. ونتمني ان لا يعود الامام الي السودان اهو برضو نوع من النضال ونحنا محتاجين ليو بره اكتر من جوه. ولتتوحد صفوف حزب الامه القومي والجبهه الثوريه مع كل المناضلين الشرفاء لاسقاط هذا النظام بالقوه فما اخذ بالقوه لا يسترد الا بالقوه. يعيش مالك عقار..يعيش ياسر عرمان وجبريل وعبد الواحد ومناوي وليحفظ الله لنا سيادة الامام وابنته سيدة نساء السودان وليذهب الكيزان الي نار جهنم خالدين فيها ابدا. Follow me in twitter@elrazi_elrazi [email protected]
