من الضانقيل جنوب للكربة أقصى شمال بلدنا غنيّة بالناس والدهب والمال مليار شهري تُجبى بلا حساب وسؤال وتعليم في الحضيض صحتنا أسوأ حال والمقدمة هذه معني بها الحدود الإدارية لمحلية العبيدية والفاروق – سابقاً – قبل أن يسطو عليها ويجعلوها وحدة إدارية تحت حكومة بربر التي تجبي أموال أسواق الجمارك والذهب بالمنطقة .. أكثر من مليار جنيه سوداني بالعملة القديمة تجبى شهرياً دون تقديم أي خدمات للمنطقة . وبعد أن ترشّح أحد أقربائي (يوسف) بدائرة المنطقة كمستقل تحت رمز الجرس ، في ذات الوقت الذي ترشّح فيه أحد أعضاء المؤتمر الوطني (ود البخيت) متخفياً بقفطان مرشّح مستقل كذلك .. لذا جاء في حقهم النص الوارد أدناه : جرسك رنّ في إضنيَّ صحّى منامي هيّج في قوافي .. وزاد علي إلهامي يا يوسف سلام أسمعني هاك كلامي أضربوا للحديد دوبنو طايع وحامي *** موسم الإنتخابات فيهو رخوة ولين وتخدير للشعوب خاتي العبادة ودين أضربوا للحديد خلّو الحقيقة تبين وأسمعوا لي نصايح الراوي عزالدين *** فكرتك العملتها ياخي غير مدروسة كيف تقدر تصارع في أمور مدسوسة شن داير تجيب عندك عصاية موسى؟ أخير تختى الوحل ديل كسرتُن معيُوسة *** معروف من زمان بيناتنا سيرتك طيبة نشهدلك غيور في الحارة عندك هيبة ما كنت بتجامل وما بتعرف الغيبة أبعد يا حبيب سيب الفساد والريبة *** معروف من زمان بيناتنا رايه سديد وفي قول الحقيقة أمانة ماهو شديد مجبول بي كرم جاسر شجاع صنديد ودايرنك تقودنا في ثورة التجديد *** معروف من زمان بيناتنا سيرتو نضيفة ما بياكل الرمم وايديهو ديمة عفيفة من طبع الكلاب تتلمّى فوق الجيفة وإنت كريم أصول لا تغشّك التوليفة *** بايعناك أمير على (دولة) العبيدية من خلفك نسير لا حزب ولا قبلية تتوحّد صفوفنا ونبقى وحدة قويّة لنرجّع حقوقنا الضايعة بالزندية *** إيدك واحدة ما بتقدر تصفّق بيها ديل عصبة فساد يا يوسف أختى الجيهة خلّيك جوّه بلدك وبي دماك أفديها وأوقفوا للجباية اليومي ينهبوا فيها *** وان تسمع نصيحتي أخيرلك أبعد غادي خلّيك في معايشك زول قيم ومبادئ مع رفقة شبابنا نقوم نثور وننادي نشعلا ثورة في عموم الحضر وبوادي *** وأحسنلك تعيش بيناتنا مرفوع راس وما تجالس اللصوص يلعبك الوسواس أفضلك تكون بين أهلك الفرّاس وتزأر وتنتفض بثبات معاهو حماس *** وكلما أقول أجاملك ياخي وأدعم خطّك ألقى حروفي جاطت واللسان إتلبّك أرجع لي معايشك كافح أعبد ربّك اختى دروب فسادُن وفيها لا تتشربك *** وقول (للجعلي) دايرنك تكون قدّام وتتقدّم صفوفنا تصلّي بينا إمام من شبّيت صغير ناشط كريم مقدام ودايرين نبقى قوّة تواجه الهدّام *** من الضانقيل جنوب للكربة أقصى شمال بلدنا غنيّة بالناس والدهب والمال مليار شهري تُجبى بلا حساب وسؤال وتعليم في الحضيض صحتنا أسوأ حال *** وأسواق الجمارك بالدهب مليانة مليارات جبوها أفتونا وينو مكانة؟ تركولنا البلد في هم وسخ وعفانة زي إبل الرحيل شايلة السقا وعطشانة *** وقول لي ود بخيت لعبة وكشفنا دروبا دعموك من قروشنا البغصب مسلوبة أكلتوا أموال بلدنا المن زمان منهوبة في موسم الخريف لا تشكّروا الراكوبة *** ويا ود البخيت بالغفلة جيت تتدبّ همبول نصّبوك غشّوك كسوك الجِبّة أرجع قولهم ناس بلدي كشفوا اللعبة شوفولكم بديل بين أهلي ما بتخبأ *** وسوّولكن همم خلّوا الكسل والنوم ونحن مخدّرين بي غش خداع وهموم حكّام الفساد نهبوا القروش بالكوم وراكبين فوق رؤوسنا غلبنا نحن نقوم *** أنهضوا هيّا هبّوا وفجّروا البركان ولاقوني الفجُر في وادي دربيكان نزور قبر الشهيدة الضايعة ليها زمان تحت شركة رضا مدفون هناك جثمان *** وإستبشرنا خير كان زارنا فرح وسرور بتعيين معتمد قال بكشف المستور ضاع راس خيطه تايه ليهو خمسة شهور وصدّق لينا بس فصلين معاهن سور *** بدا بالترضيات خدّر شباب الكورة قال دا يبني ملعب ويسقف المقصورة بقروش الغلابة الجايعة صامدة صبورة والتعليم هو أولى إن كان سمع للشورة *** خمسة شهور جباية وما حصرت قروشا وأفكارك زمان كان بالدهب منقوشة أرجع لي مواضيعك هناك مفروشة عفواً يا حبيب أنا جاتني صدمة ودوشة *** والزول البصادم نحن نمشي معاهو تتوحّد صفوفنا نكون جنود في لِواهو وإن جاتو الكلاب أرواحنا بي تفداهو نبقالو الترس يحميهو من أعداهو *** وحكّام بربر الدايماً يهمّشوا فينا سرقوا أموال بلدنا ونحن ماهامينا يا ناس صحصحوا صبّت مطرت العينة ردّوها الحقوق كتلتنا نحن غبينة *** والحل عندي واحد ومافي ليهو بديل محليتنا ترجع ونبقى راس مو زيل والقاصدنا بالخير نبقى ليهو دليل ويستوطن معانا في وادي نهر النيل *** ووصلوا لي كلامي حكومة الخرطوم وقولولُن طلاق في بلدنا سد ما يقوم إلاّ نموت جميع ونقابل القيوم نكون تحت التراب في قبورنا ينعق بوم *** وبوصيكم جميع يا اخوانا خافوا المولى لا تتغشّوا في تزوير رئاسة الدولة ديل حكام فساد واجب المقاطعة أولى والشعب الصبور بكسب رهان الجولة *** يا رب يا كريم فرّج همومنا وزيلا والطف بي بلدنا الديمة مهدود حيلا حكّام الفساد ظلموها عِدمَت حِيلة دا لملم عفيشي وأقوم أروح أمشيلا (عزالدين حسن محجوب) [email protected]
