برغم الزيف وحر الصيف شجر المنقة بقي لي رصيف بنجم علي قولكم أتونس كلامكم غنا أقيف واقف علي حيلكم وأحكيكمْ كلام سقطْ زي النقطْ من حلقي نطا نط شذا وهيثم أحبكما حتي إنهيارات الأحزان لكما الود كله ولي إبتسامتكما الجميلة وللبواليس الجحيم النص : أنا بتذكر ليل الفرح الدك حصون الألم الفينا نوّر كل شوارع الحلة وغمر الأرض سلام أنا بتذكر ضو عينيك الفاتح بابو في عين الشمس وصفق الشجر اللابس لون خديك حجاب أنا بتذكر ناس الحلة نهار العيد ناس الحلة الكل أيامم عيد أطفال الروضة نسوان الحلة تحت شجرات النيم النايم عز الصيف حنينم للمطرات الصِبنت من عشرين يوم والتاني بعدو في أيام الله راجين متين حيجيهم شهر إتنين يتانسو يضحكو فيهو حد الخوف ينزاح من داخل الجوف الناس بدافر مد البصر الشوف مستنين زفاف القمرة بطبول ودفوف فرحانين يهزو إيديهم مبسوطين بموية الوادي الحد القيف لا متوسطة بينم رملة ولا حارسهم حر الصيف متلقين الناس مبسوطة وجوهم مالدنيا خريف يظلل سقف البيت شمس تدفّي في عين الشمس لا خوف لا نزيف أنا بتذكر يوم لاقيتك صدفة بيني وبينك إلفة مني ومنك بانت بسمة هبت نسمة مسحت عرقاً نازل فجأة غرست شتلة ورسمت لوحة شافع رافع إيدو الأولي وبغرس بذرة بسقي بحبو أعظم فكرة بغني لبكرة مقطع وغنية بأجمل نغمة تمسح حسرة تصبح بشرة لأم بتكابد الحبل السري تدي مساحة لتؤام يلقي براحة يتماسك ويملا الساحة ينمي الحب جواهو بكل صراحة أنا بتذكر يوم ما شفتك بتجالسي البانة وكان قدامك كم أبنوسة تغازلك مرة لمرة زايد نفسك همسك حرّك صمت التيك إتلمس خطو قصادك لمن لامس خصرك غفلة داعب خدك غفلة ضماك غفلة وقبّل صمتك غفلة فتّح رشش عينو وأتحسر وقتين شاهد حزنك غارس غفلة في صدرك خنجر يقتل عشقك ونور خديك أنا بتذكر لمن غيمتك حاضنة النيل وجزايرو ولمن رجعت حنت غفلة للزمن الرايع ولحظة نخلك وبانك كان في حضنك يحكو عن الأفراح الجاية عليك بلهفة جات أبنوسة رسمت لوحة في خدك وعزفت نغمة خلت نخلك يتذكر في أيامو يغير من قبلة بانتك في الفجرية أقام الليل صلوات عد نجومو أعاد ترتيب أرقامو إتحمس وأخدك بين أحضانو ضم إليك البان وأغصانو وقّف غضب النيل وجنانو غازل كل أبنوسك بكل حنانو ودفق شوقو الغمر البر بي أطيانو ووقف إتذكر شامتك في الصبحية أدي عيون أطفالنا نسيمة مع العصرية هدا خواطر القمري عشية هدّم بيوت الحزن المأسوية سالم غيمك في الفجرية وأنا بتذكر لما عرفتك إيديك أطول قامتك أطول فتحت جدول وقفت بين الشمس وعطارد قصاد القمرة وشفق الغيم شامخة سامغة وطود فاتحة جبين الأرض دار للشفع فهمتك إنك همسي سلامي كلامي أنا بتذكر دمعك لمن بلا الصحرا حتن خدرت فيها السدرة بعد ماركت سفينة نوح في الجودي ويوم ما قطت سماء الدنيا رفضت تنقط لي قوم يوسف بعد السبعة أنا بتذكر إنو خدارك عم الكون إنجم في كل براحك من غير لون إتلقي أفراحنا في صدرك مسح الهم والغم أدانا الأمل الأخضر أن نسكن أحضان بعض ونتذكر إنو أيمانا لهذة الأرض نجالا وادي برلي 2008م [email protected]
