كلام في الزّمّة علي لسان خريج جامعي عاطل مِن وفي زمن مقطوع الطّاري .. المشروع الحضاري ................................................. مثل شعبي مطابق لِسِيادتو !!:- (الجمل الميت في البلاد ، إن جرّوهو كسّره وإن خلّوهو خسّره).... البلاد :- هي كلمة دارجية يقصد بها البِلدات أي مزارع العيش عند أهل الجزيرة . ..................................................... مسدار الرئاسة :- تُب الرئاسة ..وتُب مرؤوساً بِعِيبو كلامي وتُب رئيساً مروّس في قائمة الأجرامى زي ديكاً زعور طول عمرو جفلان والسّفر كتامي مجرم حرب معلوم لا دفاع لا محامي مُطَارد من مطار لي مطار ده رئيس ده ولا حرامي؟؟ ........................................... مُسادير العطالة :- ضانقيل الهموم الفوق ضهرنا اتردّم لُكنَاهو الصّبر عوَرن في قلوبنا وحدّم راجين الفرج عند الكلامو مفدّم فات فينا الفوات والعمير إتقدّم ..................................... شوال الهموم شلناهو هدّ رقابنا مرّ الخندريس والبنقو أضحي شرابنا حكم أبتكو ضقناهو وضقنا عذابنا مادام ديك العدّة رئيسنا وعمايلو خرابنا ..................................... النّص :- أديني كاس ..... أديني كاس ..... أيوه بسكر وانتشي علي كيفي بعمل كل شي كمان طبيعي بلفّهَا بي كم كرِت ....... برضو ب....كل يوم ما بختشي بسو جميع نوع البدع .. أجدَع إيدي أتل وريدي أرخي حِسِي اتني نُصِي لاني سيد زول لاهو سيدي،، أديني كاس ...... علشان أغيب لعلو ما عاد لي فهم ... أفهم شنو وعشان شنو ؟؟ شن فايدةَ اللّوح والقلم ؟؟ شن فايدة الرّوح والحواس شن فايدة الزّول عندو كُرعين ولا راس؟؟ أديني كاس.. فوق المقاس عشان أغيب وانسَى النّدم ،، أنسي ظلم الدُّنيا أغرق في الوهم ، .............................. غشوني من زمني الصغير قالو لي عندك وطن قالو لي عندك سجم .. وسجم سجم ...... واسع مَهِيل مليون ..ميل ،، شاقيهو نيل منساب جميل فيهو كلَّ الخير وفير !! باكر تَتم درسك تكون مسئول كبير !! كلام كتير... وكلام فطير !! ياريتني ما نعنشت من حُلمي وصِحِيت،، ياريتني ما ساهرت ليل ياريتني ما كِبرتَ وَوعيت ! ياريتني ما اتخرجت من جامعة وقريت ياريت غِشِانِي الموت ..أموت أرتاح من الذّل المميت ، ياريتني لو تنفع ياريت ،، من كم سنة ...... شايل جراحي المحزنة ببحث وافتش عن عمل ،، (فتحت حت خشم البقر !!) ساسقت في كل الدّروب ما بين عطارد وبين زحل في قلبي مات كلّ الأمل قُبّال يموت عشمَ الأهل !! أديني كاس ...... أيوه بَسكر وانبسط وكمان طبيعي بَلِفّها بى كم كرت ، سألني ليه ؟؟ أيوه بعمل كلّ شئ لا بستحي لا بختشي دِقنِي دايره بَحِفّها كُم جلابيتي بكِفّها تحت أباطي بَلِفّها ال.......... حقي !! مالكم ومالي ، أيوا بسكر وانتشي ،، كعب الكعب والمُتكل بالشِعب ،، بايعين ضميركم بالحلال ساكتين وعارفين السّبب دافنين رؤسكم في الرّمال فالحين تقولوا علي سفيه وقليل أدب ؟ يا للعجب !!! ما إنتو عارفين كلّ شئ !! البِعِيش بوجهتين مابختشي لازم يبيع شرفو وضميرو ويرتشي ، أديني كاس شان أستريح أرحم تعب قلبي الجّريح ماللّيل طويل .. علي زول ضعيف متلي وذليل ........................ يتبع .. [email protected]