يا جماعة .. لينا كم يوم كدة ممعوطين بصورة وزير السياحة أبو بدلة مفتولة .. في الواتساب .. في الفيسبوك .. في الانستجرام .. في السناب شات .. ما فضل الا يجيبوها في قناة الجزيرة .. والموضوع دة خلاني افكر .. شنو يعني زرارة ركبت غلط ؟! ما البلد كلها زرايرا مركبة غلط .. وكان قعدت اعد ليكم كمية الزارير المركبة غلط وفتلت كتف البلد ووسطا ويديها وكرعيها ما حنخلص من هنا للسنة الجاية .. لكن كدة النذكر الناس بحبة زرارير يمكن الذكرى تنفع المؤمنين ويقوموا يجلوا موضوع زرارة الوزير المشهور .. اها نبدأ بالزرارير المهمة البتعتمد عليها حياة الناس وبتعتبر مقياس لتقدم ورفاهية البلد .. متذكرين زرارير التعليم في السودان زمان كانت مرصوصة كيف ؟! رصة بت كلب .. مظبطة زي حقت البدل العسكرية .. ستة سنين ابتدائي .. تلاتة سنين ثانوي عام .. تلاتة سنين ثانوي عالي .. اها الجماعة ديل هفت ليهم فجاة كدة انهم يقطعوا زرارة من زراير التعليم ويقفلو عروتا .. ما سهواً ولا نسياناً .. بل مع سبق الإصرار والترصد .. بتروا سنة كاملة وخلوا سلم التعليم مفتول زي بدلة الوزير دي .. وبعد ما كنا بنتفاخر بالتعليم الحكومي ( المجاني ) وكنا بنخلص الثانوي وراسنا ملان .. هسة تعال اتفرج وشوف خريجي ( بعض ) الجامعات الحالية البطلع منها الطالب وهو ما ناقش كوعو من بوعو وحدود ثقافته وفهمه ولغته اقل ما توصف بانها مخجلة ..اها هسة لو وزير التعليم الاخد القرار دة كان فط زرارة ولبس بدلته مفتولة موش احسن من فتلة السلم التعليمي لبلد كامل ؟! خليكم عميقين شوية ياخي .. الزرارة الجاية دي مهمة شديد .. زرارة العلاج والصحة .. ودي كمان ادهى وامر .. واخير منها بدلة الوزير بمليون مرة على الأقل البدلة التي أصبحت شهيرة جداً بفضل زرارة ركبت غلط اهي نقدر نقول عليها مغطية وساترة .. لكن زرارير العلاج في بلدنا الهامل بقت ميح .. مافي .. لا مركبة غلط .. ولا العراوي مقفولة .. الجماعة ديل الظاهر لقونا شعب ثقيل .. دمنا بارد .. ما بنحس .. قدر ما عملوا فينا ابينا نتخارج بالحسنى او بالقوة او باي طريقة .. قاموا قرروا انه الطريقة المثلى للقضاء علينا انه يقطعوا كل زرارير العلاج المجاني ويقفلوا العراوي ويخلوا غالبية الشعب المسكين المحتاج قاعد في السهلة .. بصراحة كدة عاوزينكم تموتوا من المرض .. باعوا مستشفيات .. قفلوا مستشفيات .. خلوا مستشفيات .. وحتى الخلوها دي انت كمريض ملزم تجيب حقنتك وقطنك وشاشك ولو في طريقة تجيب دكتور برضو ما بطالة معاهم .. دحين هسة لو كانو خلو كم زرارة كدة حتى لو مفتولة موش كان أخير من الحاصل دة ؟! .. خليكم عميقين شوية ياخي .. اما عن زرارير الخدمات فحدث ولا حرج .. زرارة الكهرباء الممحوقة .. زرارة الموية الوسخانة .. زرارة الرسوم والجبايات على خدمات مفروض تكون مجانية .. زرارة البنى التحتية المشققة ومكسرة ومشاترة .. الشوارع القذرة برغم رسوم النفايات التي تؤخذ قسراً من المواطنين .. زرارة الخريف المفاجيء البطمبج الشوارع وبحولا لبحيرات مليانة بالبعوض .. كان أخير شنو .. زرارة واحدة مركبة غلط ولا مافي زرارير خالص زي الحاصل هسة دة ... خليكم عميقين شوية ياخي .. اها كلو كوم والزرارة الجاية دي كوم براها .. زرارة الفساد الطال الجانب الاقتصادي والاجتماعي والأخلاقي .. ودي زرارة بقت شبه معدومة في بدلة البلد الا من رحم ربي .. والمشكلة انه زرارة الفساد دي كعبة شديد .. فضيحة عديل لانها خلت حتة حساسة كدة ظاهرة للعيان .. وكل يوم نعاين للحتة دي ونرجع نغض البصر خجلاً من المنظر .. يعني بس لمن تشوف سرقة الاقوات البتحصل ليل نهار .. لمن تسمع انه اغلبية المصالح الحكومية مرهونة .. لمن تفاجا بانه المشاريع بتتباع .. لمن تلقى انه كل يوم الفقير بيزداد فقراً والغني بيزداد غنى .. لمن تشوف اهل العلم والشهادات في اسفل السلم الاقتصادي.. وتلقى ناس يادوبك بتفك الخط بتتعامل بالمليارات .. لمن تلقى الشعب كلو بحلم بالهجرة وعاوز يطفش .. الحاجات دي كلها بتحسسك انك محتاج لزرارة تقفلا وتغطي بيها عورة البلد الماشة من سيئ لاسوأ .. فعليكم الله سيبو بدلة الوزير المفتولة وخليكم عميقين شوية ياخي .. هسة بدلة الوزير دي ذكرتني كم سؤال كدة .. هي وينا السياحة العندنا عشان يعملوا ليها وزير ؟! يعني وزارة السياحة دي مهمتا شنو ؟! .. غايتو انا ما سمعت بسياحة في السودان .. انتو سمعتوا بيها ؟! هسة راتب الوزير المن غير مهام واضحة ومعروفة دة كم ؟! اكيد ملايين .. والله ما حاسدين ولا بقرانين لكن يعني الراتب دة موش كان أولى يمشي للشعب المتعفف الما لاقي ياكل دة ؟! موش كان أولى يشتروا بيها محطات توليد كهرباء وتنقية مياه بدل ما قتلو الناس بقطع الكهرباء والموية وخلوهم قاعدين في الحر وبشربوا الموية العكرانة في شهر رمضان ؟! موش كان أولى يصلحو بيها الشوارع المكسرة .. أو يدعموا بيها السكر والبنزين .. او حتى يوزعوها مكرمة عيد للموظفين التعبانين .. خليكم عميقين شوية ياخي .. غايتو بعد النقة دي الواحد حاسي انه شرط صيامو عديل موش جرحه بس .. عشان كدة عليكم الله يا جماعة بلاهي فكونا من زرارة وزير السياحة المركبة غلط .. فكروا في باقي الزراير التانية .. خلوا نظرتكم بعيدة .. صح هو الوزير بالغ .. وحرمه المصون بالغت الخلته يطلع من البيت بالطريقة دي .. والمذيعة بالغت الما انتبهت للزرارة المفتولة دي .. والمخرج زاتو بالغ .. لكن نعمل شنو .. قدرنا كسودانيين اننا ما بنشوف كويس .. وقدر الوزير انه يقع فينا ناس نباشين وشيالين حال ناس ما منطقيين ولا حقانيين .. عينا للفيل الكبير ونطعن في الضل الصغير .. فعليكم الله خليكم عميقين شوية ياخي .. فيسبوك
