قال لي صديقي : يا استاذ إنتا ما ملاحظ إنو السودانيين ديل كووولهم بقوا بتاعين لف ودوران؟ حاجة كده ممكن تتعمل عديل ما في .. إلا الزول (يلف ويدور) . أجبته : والله ياخ كلامك صاح ..هسه (الحوار) ده لزومو يكون (90) يوم شنوو؟ يعني هسه ناس (الحكومة) ما عارفين (المعارضة) عاوزه شنوو وللا ناس (المعارضة) ما عارفين (الحكومة) عاوزه شنووو ؟ أجابني : والله يا أستاذ كلامك صاح .. حوار لشنو ؟ القصة كووولها (لف ودوران) والحاجات واااضحة وما عاوز ليهو حوار. قلت له : إنتا عارف إنو (اللف والدوران) ده عند السودانيين منذ (الأزل) ، فالانسان السوداني عندما يولد وقبل مرحلة المشي يستخدم يديه ورجليه دائراً حول نفسه ثم عندما يحاول تعلم المشى تجده يلف ويدور حول (أمو) ممسكاً بفستانها (عشان تشيلو) ثم عندما يكبر قليلاً ويتجاوز هذه المرحلة يبدأ فى (اللف والدوران) حول والده ،طالباً منه أن يشترى له (لعبة) أو (حلاوة) ثم إذا ما دخل المدرسة يبدأ فى ممارسة عملية اللف والدوران على أساتذته : - يا ود ما كتبتا الواجب مالك؟ - ما أصلو يا أستاذ نسيت الكراس فى البيت (ويكون ما عندو كراس من أساسو) وما أن يتجاوز مرحلة المدرسة ويدخل أحدى جامعات (الفكة) ويبدأ فى عمل علاقات مع الجنس الآخر حتى يبدأ فى ممارسة (اللف والدوران) حين تسأله زميلته قائلة : - ياااى يا هانى القميص ده يجنن .. إشتريتو من وين؟ فيجيبها : - ده من محل كده فى لندن إشتريتو لمن كنا مع (بابى) فى الإجازة السنة الفاتت (يكون ما دخل عفراء فى حياتو) ويتوظف صاحبنا (لو محظوظ) ويبدأ إستخدام خبراته اللفلفانية الدورانية التى تكون قد تراكمت لديه فيسأله رئيسه المباشر : - جاى متأخر ساعتين مالك؟ - أصلو الكبرى كان فيهو حادث ولحدت ما جا (الونش) وشال العربات حتين الحركة مشت ! ويتزوج صاحبنا فتسأله زوجته : - إنتا الليله السبت إجازة.. بتتلبس وتتشنط كده ماشى وين ؟ - (وهو ينظر للساعة) : المدير أدانا شغل قال لازم نسلمو ليهو بكرة (وينسى أنه بالغ في استخدام العطر) والشياكة . وهكذا ينمو المواطن (السوداني) فى هذا الجو المليء باللفلفة والدوران فتجد أن : - التاجر يلف ويدور على الزبون عشان يقنعو بأنو بضاعتو أحسن بضاعه مع إنها (مهربة) و(مقلده) ومنتهية الصلاحية . - الطبيب يلف ويدور على المريض ويطلب منو يعمل مليون صورة شي (مقطعية) وشي (رنين مغناطيسى) وشئ (أشعة سااكت) ومليون تحليل شئ (الفسفور فى الدم) وشئ (البوتاسيوم فى البول) وشئ (البكتريا فى اللعاب) وشئ (الطحالب فى الفسحة) طبعا من المختبر (الفلتكانى) ثم يطلب منه مراجعته بعد أسبوع ليدفع نص قيمة الكشف (مرة تانية) ! ده لو ما قال ليهو أعمل الحاجات دى تانى من أول وجديد ! - الصيدلي اذا طلبت منه دواء بعينه وما كان عندو ما بيقول ليك الدواء ده ما عندى لكن ح يمشى الرف ويتناول ليهو دواء (تانى) وح يقول ليك : - ده نفس الدواء الكتبو ليكا الدكتور بس عاملاهو شركة تانية والإسم التجارى بس هو الإتغير الدواء الكتبو ليك الدكتور إسمو (سلامستين) وده إسمو (باى باى آمين) لكن مكوناتهم وااااحده ! - لاعب الكرة : مما تجيهو الكورة يقعد يلف ويدور بالكورة لحدة ما يقطعوها منو .. وفريقو يطلع مهزوم 6 صفر ومجلس ادارة النادى يجتمع و(يلف ويدور) وفى النهاية يطلع (المدرب) غلطان !! وهكذا الحال حينما تبدأ فى بناء منزلك يبدأ (المقاول) فى اللف والدوران فيظل المنزل في مرحلة (العتب) حتى تصل أنت إلى مرحلة (الكهولة) ، وإذا ذهبت لإصلاح عربتك يبدأ الميكانيكى فى اللف والدوران حيث يخبرك بأن العطل من (الدينمو) وما أن تأتي إليه بدينمو (جديد لنج) حتي يخبرك بأن العيب من (البطارية) وتستمر الحكاية وكل (اللف والدوران) ده عشان (يشيل أتعاب زيادة ) ، وإذا ذهبت لإجراء معاملة يبدأ الموظف فى اللف والدوران وإذا مشيت وين يبدأ الما عارف مين فى اللف والدوران ... وأكتر ناس بتاعين لف ودوران هم بتوعين السياسة الواحد يعمل ليك الإنقلاب ويقول ليك : اذهب إلى القصر رئيسا وسوف أذهب إلى السجن حبيساً. قلت لصديقي وأنا أختم حديثي معه : وكمان لو عاوز تعرف اللف والدوران (العلى أصولو) أمسك ليك قضية من قضايا الفساد ! كسرة : ليا ساعتين بلف وأدور عشان أقول السطر الأخير الفوق ده كسرة ثابتة (قديمة): أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و +و كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+و التيار
