يحدث كثيرا ان يكتشف البعض فجأة وبعد سنين عددا خطأ الاسس التى بنيت عليها نظرياته بعد ان تتضح (بلاوى عجيبة) كنتائج لتطبيقها فى حقل التجارب البشرى ليعترف قائلا ماكنت عارف ماكنت متصور ثم يحاول تصحيحها بعد فوات الاوان بادخال تعديلات قد لاتجدى نفعا ومن ذلك الاساليب الخاطئة فى تربية الابناء كالتسلط او التدليل والحماية الزائدة او التفرقة بين الابناء او الاهمال بعد ان تترك اثارها السالبة على شخصياتهم ( بعدما الفاس تقع فى الراس ) ومن امثلة ماكنت متصور : الفتاة التى تتفنن فى رفض الخطاب بحجة ان داك شكله ماوجيه وده كلامه كتير الى ان تصل مرحلة ان لايتقدم لطلب يدها احد ومثل هذه ينطبق عليها المثل القائل ان كانت المطرقة هي كل ما بيدك فسترى كل الأشياء مسامير والشاب الذى قد تتخلى عنه فتاته والتى لسوء حظه شغالة طموحات بلا حدود فتغادر الحدود ( ده نظام كنتا فاكرك لى ناسى الزمن واحكامو ) ، رجل الاعمال الذى يخسر امواله فى التعاملات المالية لخطأ حساباته وتوقعاته واماله العراض فى الربح الوفير ليتحسر على ضياع ماله ( لمن تفوت انتا فى الدنيا بس شن لى ) وقد يكتشف البعض فى دول العالم الثالث انه كان مخطئا عندما منح صوته لمرشح وعده بتحسين مستوى الحياة ( ليس ذنبه خطأ سوء فهم من المعنى بتحسين مستوى الحياة ) فقد تضع ثقتك فى البعض لتكتشف فجأة انها لم تكن فى محلها و ان ( ناسى الزمان اتغيرو ) وعلى قول الكاتب المصرى الساخر جلال عامر : معظم الهاربين بفلوسنا كانوا يقيمون لنا موائد الرحمن وأتارى إحنا اللى كنا عازمينهم . الطريق للخروج : واحد سايق بسرعة شديدة خالص وقفو شرطى المرور قال ليهو انتا ماشى بسرعة 180 كلم والمسموحة 60 رد : لا معليش انا ماشى فوق 60 بشوية تدخلت زوجته : لا ماشى فوق ال 160 عاين ليها بزهج : حاديك مخالفة تانية لانه اللمبة مكسورة : ماكنت عارف انها مكسورة تدخلت زوجته : عارف وابيت تصلحها عاين ليها بزهج : وكمان مارابط حزام الامان _ كنت رابطو لكن لما انتا وقفت العربية فكيتو تدخلت _ لا لا ماكان رابطو عاين ليها بزهج وكورك فيها _ انتى مابتعرفى تسكتى : طوالى بيكورك فيك كده _ لا الا يكون سكران : كمان سكران ؟ _ لا لا ماتصدقها _ المشروب لقيناهو فى العربية بعد ماسرقناها : كمان العربية مسروقة _ ماتشتغل بكلامها دى بتقول اى كلام ! ويلتفت اليها _ ماتخلينى اطلقك : طوالى بيهددك بالطلاق ؟ _ خليهو يتزوجنى اول بعدين يطلق ! ماقبل الخروج : انا كنت دايما بصبر مهما البعاد اضنانى فى قلبى انت بتكبر تكبر معاكا معانى والهجر مهما يألم يرجع حنانك تانى مدخل للخروج : النضج الحقيقى التراجع عن الخطأ والنقص فى الاصرار عليه . [email protected]
