(احمد وسالم وسيد البيت الظالم) محمد علم سالم زول مستور ومسالم كان في الريف واتربي يتيم عندو اخواتو وامو وخالتو سته اخوات جايات في ضهرو رب وعلم ووظف زوج وكان مستور الحال في بلدو شوية معزه وعربة كارو وقوز وعزازه يفلح يزرع يحصد مونتو والماهية تتم الناقصه يواصل يواجب كل الناس منتظره لفرحو قدم كل اخواتو عليهو الحبوبة تقولو تملي : عشايا بتين بتصافح ا سالم ؟؟ انا منتظره اشوفو جديدك قبل المولي يشيلا امانتو وامو : ياسالم ماقصرت عرس انا مشتاقه اشوفو جناك والاخوات : ياسالم جاتنا بنية الشيخ ود احمد بنيه ملانه وداد ومحنه ولايقه عليك تب ا سالم امك قالت: زولة عيشه ومما قامت خاتيه الكلمه فهم القصه اتوكل وعرس بعد ( الضيف الابيض) زار خمسه عقود وشوية اشهر والبكاري وليدا زين وسالم واهلو الفرحه كستهم شب وليدا زي طين ارضو ودخل المدرسه مع اصحابو وكان نوارة الفصل الانضر زاكي وفاهم كل زملانو تمنو مكانو ديمه الاول احمد سالم نجم المدرسه ديمه الاول امو تزغرد ووالدو يكبر وكل المدرسه تفرح بيهو وكل هدايا المدرسه ليهو سالم قرر فجأه يسافر!!!! وكل الحله اترجت سالم شيخ الحله ووالدة احمد والاخوات بالواطه يزحن للاعواد مرات بقلدن كل المدرسه جاتو في بيتو وزملان احمد ببكو عليهو كل الناس يترجو في سالم جماعة المسجد والجيران ناس الكوره ولعبة ضاله وحرفاء الويست حتي بهايمو اليوم داك حزنن وسالم سافر بي خاتر اهلو ساب الحله ورحل البندر اجر بيت في طرف البندر ووقع عقدو وشهدو عليه اتنين ومحامي سالم صنقع دنقر ووقع دفع العندو ودخل عفشو ولعب اطفالو وسالم يعافر في شمس الله كل الناس شقيانه وتكدح تبدا المعركه من صبح الله ناس بتعافر ماشه اشغالا وناس متكله علي باب الله فجأه تمر ايام وليالي وسيد البيت يضرب لي سالم الو يا سالم سلمك الله بعد اسبوع الاجرة تحل دبر حالك وادفع ايجار الشهر الرابع سالم تمتم الشهر الرابع ؟؟؟ ما الايام بتمر في ثواني لل ما عندو البيت وبعاني شهر الاجره يمر زي ساعه وفجاه يجيك الشهر التاني هنا لازول بيقيلك ا سالم لاارحام لاموقف سابق كل البينكم ورقه وشاهد والسمسار القابض وزاغ بت الشيخ ود احمد شالت هم الاجره وحالا اتبشتن ومر الشهر الخامس وسادس وسالم واقف من دون شغله والتلفون طوالي يرن تيييييييييت تيييت تيييت سيد البيت للمحكمه روح شال العقد واستدعو شهودو وفجأه اتحرك كومر وعسكر دقو الباب الساعه حداشر وسالم مافيه دقو الباب ووجوهن تلفح وسيد البيت يتفرج ساكت طلعو كل العفش الفيهو دخلو المطبخ وغرف الجلسه واوضة النوم لاانذار لااستأذنو سالم شنطة احمد وعجلة احمد وجزمة احمد ولعب اخوانو وبزة طفله عصيرا اتدفق لابيراعو شعور الام لا الاطفال الشافو المشهد لا الجيران اتدخلو بينهم ما القانون ماخد مجراهو وامر الاخلاء معاهم يشهد كل الحي اتلم اتفرج سالم حصل اخر لحظه لحظة قفل البيت بالطبله واسرة سالم بره الحوش كل التم دا بس في ساعه واحمد غائب احمد راح المدرسه ماجا كل ها الجوطه وكل ها الذله في شان قرشين في شان قرشين لسيد البيت ابو فعلا شين ختي ضميرو في جيبو وفات بت الشيخ : اووووب يااحمد وبت الشيخ مستنيه احمد وايه حتقولو ؟؟؟ ووين حيفوتو ؟؟؟ ووين حينومو؟؟؟ سالم لبس الحيره وصنقع داري دموعو من ام اولادو وشاف ترحيل الشفع جايي وكل الشفع ودعو احمد يللا يااحمد بكره نشوفك واحمد لسه ماشاف المشهد وما معروف وين بكره يكون؟ وكل الحي بيعاين ويبكي وسالم قالد ولدو وعييط وامو الزينه وشها سود سالم جالت في ذاكرتو معالم طيبة اهلو وسترة بيتو وطين البلد الحر والفود والقيزان الرحبه وزينه وحب شمس الله البينا وبين الريف اشواق قام اتذكر بكا اخواتو وعشم الحله وخاتر امو الكسرو وفات واحمد ولدا زاكي وفاهم: يابا اشتقت لناس حبوبا وكل اصحابي هناك في الحله اشتقت ايابه للبن المعزه اشتقت لرمل الحله وطينه وللتيراب البعد المطره ولي الاولاد البشبهو احمد وكل بيوت الحله بيوت لي احمد سالم دبر حالو وسافر ساب البندر وقسوة حالو وساب البلد الما مشهادو عيشة السخره وذل الاجره واحمد ابوي : انا ماني بقول الناس طردونا بس بنقول اشتقنا لبيتنا ولي حنية اهلنا وطيبهم ولي حبوبة ونسمة تهبهب ماني بقول الناس طردونا بس اشتقنا لطيبة اهلنا ولي حبوبه ونسمه تهبهب [email protected]