صباحكم خير اعتذارك .. ما بفيدك عمي داؤد قرناص ..رحمه الله ..كان مرحا ..يلقي النكات كما يتنفس ..حدث ذات مرة ..ان اراد اجراء اصلاحات في بيته ..جلس هو خالتي رحمها الله مع المقاول ..خالتي (شوف نحن عايزين نفتح الغرفتين ديل على البرندة ..ويبقى هول كبير ..ونقفل بالقزاز ...عايزين نعرف دا بكلف كم ؟؟ ) ...قبل ان يتحدث المقاول ..كان عمي يمسك بالورقة والقلم ويقول (شوف ..انت تعمل طابق تاني ..يكون فيهو تلاتة اوض ..كمان عايزين بلكونة كبيرة ..نشرب فيها الشاي ..ووو) ..خالتي (يا داؤد ..بطل هزار ..وين القروش عشان طابق تاني ..وايه مش عارف ايه ) ..فما كان من عمي الا ان قال (يا عواطف ..مش على الورق ..خلينا نتكلم )..رحمهما الله رحمة واسعة. السيد وزير الاعلام السوداني ..يبدو انه (دفعة) مع عمي رحمه الله عليه ..فقد كان يحسب ان الكلام علي الورق ..و(نخليهو يتكلم) ..فاكتشف ان الكلام على ورق ..وسي دي ..وفيديوهات ..وتسجيلات ..والدليل (ألوللووو)..أصدقكم القول انني وجدت له العذر ..فقد اعتاد المسؤولون عندنا باطلاق تصريحات مستفزة ..تسير بها الركبان ..فيأتي اليوم التالي ويصرح تصريح نافيا الاخبار ..ويحاول اللف والدوران على المعنى ..ومن ثم يقول جملة ثابتة (ان التصريخ افرع من معناها ..وأخرج عن سياقه ) ..وفجأة نبقى نحن المتهمين الذين يمارسون التأويل لتصريحات علية القوم ..وفعلا ..هو احنا حنعرف احسن من الحكومة ؟؟ كنت قد اعلنت قبل فترة عن مطالبتي بدورات تدريبية للفنون التصريحية ..للسادة المسؤولون ..ليه؟؟ نحن هنا خلاص ..اتعودنا علي قصة (مش على الورق خلينا نتكلم ) ..لكن يا جماعة التصريحات خارج حدود الوطن لها قيمتها ..ولها تأثيرها ..لذلك يكون دائما هناك وحدة كاملة مسؤولة عن ترتيب الخطابات الرسمية ..وتوقع الأسئلة التي يمكن توجهيها من قبل الصحفيين ..واقتراح اجابات دبلوماسية ..خاصة للقضايا التي يمكن ان تسبب حرجا للمسؤول ..لذلك تجد من النادر ان تسمع بوزير ..يصرح تصريحا من بنات أفكاره ..ليضطر بلاده ان تحاول ايجاد مخرج له ..والمضحك المبكي ..ان يكون هذا الوزير ..وزير الاعلام ..فأنطبق عليه المثل (جيتك يا عبدالمعين تعيني ). ها انا اعيد مطالبتي مرة أخرى ... كل من له درجة وظيفية تخول له اعتلاء المنصة ..وقول اي كلمة ..الرجاء الاسراع بالتسجيل في دورة تدريبية للتصريحات الدبلوماسية ..وبالمرة كدا راجعوا ياجماعة مخارج الحروف والكلمات ..والنحو والبلاغة ..والحاجات دي ..فقد حضرت مؤتمر وزيرة التربية والتعليم لاعلان الشهادة السودانية ..فعرفت ان الشغلانة (خربانة ) من كبارها ..فالسيدة الوزيرة كانت تخطئ في النطق بين كل كلمتين ..تلحن في كلمة ..وهاهو وزير الاعلام ..يصرح تصريح اضطره للاعتذار ....والاعلان انه (لن يستقيل) ..مع انو ما زول جاب سيرة الاستقالة ..فهي حلم بعيد المنال ..وانت ظلمتنا ساكت يا سعادة الوزير ..نحن بس عايزينك تتذكر لما تسافر خارج الحدود ..وتحب تصرح تصريح (شخصي) ..انك في تلك البلاد لا تمثل شخصك ..وانما تمثل امة بأكملها ..ووو(حليلو الكان بهدي الغير ..صبح محتار يكوس هداي ..من ناس ديل واااأسفاي ..من زي ديل وووا أسفاي ) الجريدة ______
