الناس بتسأل الموضوع دا يتم كيف وبي ياتو طريقة .؟؟؟ طبعا يا جماعة القروش دي ما بجيبو ليها طشت غسيل ويبركو ليها زي نانسي عجرم وهاك يا آه ونص اديكم مثال من الواقع عشان تقع ليكم اللعبه.. سمعتو قبل أسبوع المشكلة بين مأمون حميده وحميدتي زعيم الجنجويد .. حميدتي عايز يعمل مستشفى خاص ، وحميدة رفض ليهو .. حميدتي طبعا لواء تاجر حرب جنجويدي ودخلو الجيش ادوهو لواء.. جاب قروش المستشفي من وين؟؟!! من الحرب ؟؟!! ما بتكفي .. عندو شركة وقعت اتفاقية مع جهاز الأمن ينقب عن الكرته في منجم ذهب جبل عامر .. قروشو دي ما يقدر يدخلا دورة الاقتصاد السوداني .. ح تخضع للمراجعة والضوء وكشف الفساد.. ما يقدر يطلعا بره السودان، قروش كتيرة ملايين الدولارات مراقبة مراقبة شديدة التحويلات المالية الضخمة وح تتعرض للتجميد .. يعمل ايه بقي ؟؟!! يحولا، يغسلا، يبيضا في مبنى، عقارات، أراضي زراعية .. فكر في المستشفى الخاص .. ودورت المشكلة مع ارباب المستشفيات الخاصة ، خايف يسحب منو البلاط ، وليهو حق دي ملايين من الدولارات .. اها عرفتو غسيل الأموال يتم كيفن؟؟؟!! 2 نستمر في غسيل الأموال يا جماعة الشباب ما يضايق بدل تسمعو بغسيل الأموال زي قصص ود ام بعلو والسماء اللحمر ، حاجه كدا ما تقدر تعمل ليها تصور ، اديكم شعاع من غسيل الأموال وطرائقه واهو النظافة من الإيمان .. واحدة من وسائل الغسيل والتبيض للأموال حاجه يقول عليها ( تحويل الملكية ) كيف؟! مثلاً :- سوبر ماركت الجنيد ، عباره عماره من 3 طوابق ، في الورق ملك لي قريب ( حميدتي ) ، وهو في الحقيقة ملك لتاجر الحرب ، وصدفة يقوم حميدتي يشتري الأرض المجاورة للسوبر ماركت ..!!! والصدف تعيش نفس الشركة بتاعت حميدتي الوقعت عقد مع جهاز الأمن في جبل عامر اسمها ( شركة الجنيد ).!! حميدتي نفسه يشتري القطعة الناصية في تقاطع البيبسي في حي جبرة بي 9 مليار جنية ( واطه فاضية يبقيها بي سعر ملياري شنو ؟؟!! سعر الأرض في الخرطوم أغلي من واشنطن ودبي !!!!؟؟؟؟ الاراضي ذاتو تبقي سلعة ليه ؟؟! فكر فيها تلقي الموضوع غسيل وشطيف للأموال قريب حميدتي ذاااااتو بتاع السوبر ماركت عندو عماره في جبره حي الشهيد طه الماحي ...!!! هل أنا حاسد حميدتي ؟؟؟ صدقوني لا وألف لا .. حميدتي عندو تسجيل موثق مع إعلامية سودانية مشهورة وقتو الجنجويدي قبل سنين قليلة تائه في صحراء دارفور وذكر فيهو أنو داير من الحكومة قروش وانو ما ح يوقف حرب لو ما أدتو قروشو ، التسجيل موجود .. مصدر سخطي عليهو أنو دي أموال الشعب منجم جبل عامر دا ملك عام ملك للشعب السوداني يتفسح فيها الصعلوك دا ليه ؟؟ ( صعلوك دي ما نبز ، افتحوا معجم مختار الصحاح ) أرجل من منو حميدتي ولا جن أحمر دا ..؟؟!! المدهش والملفت للإنتباه في موضوع غسيل وتبيض الأموال في السودان ، انو المجال الملتوي والكلو خبايا وأوعية مسمومة ، ليس حكراً علي ( الرجال )، توجد ( سيدات ) نساء ..!!! توجد غسالات أموال . وح نجيهن .. ونجيبن ... فيسبوك