تؤكد الشرطة أنها لم تعد في خدمة شعبها، ولكن على العكس هي في خدمة عدو الشعب والأمة المشير المتجبِّر عمر البشير.. الذي يفعل كل شيء في سبيل أن يبقى على سدة الحكم ولا تهمه مصلحة الوطن ولا المواطن. وتنساق أجهزة الدولة التي يتقلد مناصبها العليا المتملقون وضعيفو القدرات خلف رئيس تعيس فاشل يقود بلاده كل يوم إلى مزيد من الإنحدار والتردي غير آبهٍ ولا مبالٍ. والعيون التي كانت موضوع الكثير من الأشعار والأغنيات التي أثرت وجدان شعبنا أصبحت تهمة يستجوب صاحبها في عهد فخامة المشير عمر البشير.. وهو أمر طبيعي ففي عهود التسلط والقهر تنحط الآداب وتضمحل الثقافة ويقل الوعي.. فعلى صفحتها بفيسبوك كتبت الأستاذة شمائل النور: قبل أيام معدودة، تعرضت الصيدلانية نجلاء نورين للتوقيف بسيارتها من قبل منسوبين للشرطة في إحدى تقاطعات شارع الصحافة زلط طالت العديد من السيارات، وخلال التوقيف تعرضت لتفتيش قبيح ومهين جداً، وكتبت ما حدث لها على صفحتها بفيسبوك ومن ثم اتخذت الإجراءات القانونية بتسليم شكوى لآلية الشرطة وهي المعنية بسلوك وتصرفات منسوبي الشرطة، استمعوا لها تماماً ثم اتصلوا بها اليوم للحضور في ظرف ساعة، بالفعل ذهبت لمكاتب الآلية وفي بالها مواصلة التحقيق أو ما شابه ذلك، إلا أنها تفاجأت وذهلت بعد أن أخبرها أحد الضباط بأن الشرطة سوف تفتح بلاغاً ضدها على خلفية ما نشرته في صفحتها. تمشي "شاكية" تلقى نفسك "متهمة" وتفاصيل ما كتبته نجلاء جاء كما يلي: الله بالشفتو الليله دا، قانون الطوارئ و قلة أدب البينفذوهُ ح يبقوا سبب في امتلاء شوارع السودان بملايين البشر و اقتلاع البشير و عصابتو قريب جدا و إلى الأبد! نظاميين بزي الشرطة في تقاطعات شارع الصحافة ظلط يوقفوك و يفتشوا العربية عدله و قلبه، يفتشوا على القروش! قروشك! يقلعوا شنطة اي زول فيها قروش يجيبوها للضابط يمدوها ليهو شايل قروش يا سعادتك! و سعادتك يلفحا! عشرات العربات قلعوا شنط أصحابها! و أي زول شالوا شنطتو جنب و وقف منتظر شنطتو الفاضية غالباً! و ما معروف الحصل معاهم شنو وراي! انا فتشني ضابط برتبة ملازم سألني بقلة أدب شديدة اول ما فتحت باب العربية شاربه شنو؟ و قرب مني جدا بطريقه أقرب للتحرش و سألني تاني سكرانه؟ قلت ليهو بعد حنست نفسي شديد لا قال لزمايلو و هو بيفتح في الأبواب الخلفية بيره، شاربه بيره! شال اي كبايه في العربية شماها و طلع اي قارورة مويه فتحا شماها و معاها سؤال باستفزاز شديد دا عرقي؟ و انا ساكته بعاين ليهو قال لي عيونك دي مالا كدا؟ ما رديت، قال لي ساكته مالك؟ انا بسألك عيونك دي مالا كدا؟ قلت ليهو بتسأل من شنو تحديدا؟ خلقة الله؟ قال لي عيونك دي ما طبيعية قلت ليهو انا ما شايفاها، الشايفا انت، لو قلت ما طبيعية معناها ما طبيعية، و عشان ما اتأخر اعملوا لي مخالفة العيون الما طبيعية امشي بيها للجهة البتحاسبني على المخالفة دي عشان امشي بيتنا! المهم الحوار طويل لكن حبيت اطمنكم اكتر بانو النماذج النزلوها الشارع تحرسو دي، هي ال ح تعجل بي رحيلو و ماهو عارف و كل يوم جديد ح ينضموا (سبعين واحد و واحدة) جداد للثورة بسبب الظلم و نهب الشنط المسلح دا! و أشهد الله ما حصل يوم اطمنت على نجاح الثورة دي زي الليلة يعني عااادي ممكن تتبادلوا التهاني من هسع! #حكومة اللص و اللصة ح تسقط هسه
