والله يا حبيبو بيني وبينك الكلام ده.. اصلا اكتشاف المقبرة كان قبل حوالي شهر وشوية.. واتصل بي طوالي الصديق مولانا المحامي ( ط . ع ) وطلب مني يكون الموضوع سري لحدي ما يقدروا يأمنوا الموقع لانهم ما واثقين في ناس كتار من العسكر ومعاهو حق..وانا اصلا ما اتكلمت ولبدت بالموضوع ..وهو قال لي انهم ما واثقين في الاطباء الشرعيين في السودان من حيث العلم والكفاءة وكما انهم قد يكونوا ملوثين كيزانيا وكده..وقال عارف ظروف مرضي لكن لازم اكون معاهم بالراي والمشورة والحضور..اها وريتو الحل الانسب بتاع انو يستعين بالاممالمتحدة لانها عندها تيم متخصص في نبش مقابر الدفن الجماعي حول العالم ومكون.من اطباء شرعيين وعلماء في علم الاجناش العدلي وعلم الاثار العدلي وكمان عندهم معينات واجهزة متطورة وعندهم دعم لوجستي لا محدود..وانا عرضو علي في 2015 الانضمام ليهم عن تادية مهمام وميشن لكن المرض حال دون ذلك..وقلت ليهو..بالاستعانة بالاممالمتحدة حتضمن نتايج علمية دقيقة وعدم التشكيك في حيادهم من اي طرف ..ووريتو انو النائب العام ممكن يطلب من حمدوك الاتصال بالاممالمتحدة على مستوى عالي وكمان يشرح ليهم خطورة وحرج الموقف واهمية الامر للشعب واسر المفقودين والشهداء ربنا يرحمهم..واكيد ستسجيب الاممالمتحدة للامر.. اما الحل التاني هو استجلاب خبراء من الخارج بصورة خاصة ويكون معهم اتيام محلية ..لانو زي ما قلت ليك الطيب والنائب العام ما عايزين يعتمدوا على الاطباء الشرعيين الهناك عشان ضعفهم العلمي والعملي وكمان الشكوك في اتجاهاتهم.. انا لما قال لي تجي تشرف على العملية اعتذرت ليهو لاني والله لا زلت تحت العلاج من السرطان اللعين بعد الانتكاسة الاخيرة وشغال علاج مناعي بعد خلصت الكيميائي للمرة التالتة والله المستعان ..وقلت ليهو حتى كان قدرت اجي حتكون ما اكتر من 3 يوم نسبة لارتباطي بالعلاج والجرعات.. اها يا ود اسحق عشان ما بقدر اكتب في الموضوع ..لانو الجماعة ديل اديتهم كلمة وكمان قد اشارك في العمل ولو في المراحل النهائية بعد استخراج الرفات.. إنتهت رسالة الراحل المقيم دكتور عليّ الكوباني وقلبه على وطنه وهو يصارع المرض اللعين. وفاءً له كان لابد لي من نشر هذه الرسالة، وتربطني بالراحل وشائج كثيرة متى ما تجاسرت وإنزاح عني الحزن الذي سكن دواخلي،سأكتب عن ذكرياتي ورحلة حياتنا التي بدأت منذ أيام الدراسة في جامعة الخرطوم.
