السودان بلد مترامي الأطراف، متعدد الأعراق والثقافات، وله علاقات واسعة مع دول الجوار ومتداخلة فيما بينها ، رحّب السودان منذ وقت طويل بالمهاجرين اليه من دول الجوار ، وضيفتنا اليوم هي شابة في مقتبل العمر ، صومالية الجنسية ، سودانية الملامح ، شامية اللهجة ، اتت لتدرس في جامعة الاحفاد ، احبت السودان والسودانيين ، تحمل آمالاً وطموحاتٍ لا تحدها حدود ، انها فاطمة على عبدون ، التقيناها في ونسة رمضانية فخرجنا منها بهذه الحصيلة . * رمضان كريم يا فاطمة ؟ -الله اكرم تصوموا وتفطروا على خير ان شاء الله * ده اول رمضان ليك في السودان ؟ -لا ، ده رمضان التاني لي في السودان . * اها السنة دي الرمضان بارد مش ؟ -ايوة رمضان السنة دي ابرد من رمضان الفات ، وكمان الامطار الجات في الايام الفاتت دي بردت الجو شوية . * نرجع بيك ورا شوية ، ماذا تعني كلمة الصومال ؟ -الصومال اسم حديث لبلاد قديمة قدم التاريخ ، كانت تسمى أرض بُنت (أرض الآلهة والعطور والبخور) لدى المصريين القدامى، وبلاد البربر لدى الإغريق والرومان نسبة إلى مدينة بربرا التاريخية على خليج عدن في شمال الصومال ، ثم بلاد زيلع لدى المسلمين، نسبة إلى مدينة زيلع التي لا تبتعد كثيرا عن بربرا المذكورة، وأخيرا هي الصومال ، ويأتي هذا الاسم من عبارة صومال أي «أذهب وأحلب» بالصومالية وهي تقال عند تقديم الحليب للضيوف . * قالوا عندكم موز كتير في الصومال ؟ -ايوة الصومال مشهورة بانتاج الموز شهرة طافت كل ارجاء المعمورة ،ويوجد العديد من مزارع الموز في انحاء شاسعة من الصومال ، بالاضافة الى ذلك لازم الموز يكون موجود في كل مائده صومالية ، لو زارك ضيف وما ضيفتوا بي موز تكون قصرت في حقوا شديد ، وما اكرمتوا ، واضافة الى الموز عندنا برضو المانجا والجوافة والباباي والحمضيات بكل انواعها . * طيب انتي من وين في الصومال ؟ -انا من اقليم اوجادينية ، وانا خلطة من اشهر قبيلتين في الصومال ، ابوي من قبيلة ايساق وامي من قبيلة داروض . * بس لهجتك سورية ( ايش ، زلمة ، موهيك ) الحكاية شنو ؟ -( ضاحكة ) انا عشت فترة طويلة في الشام نسبة لظروف عمل الوالد هناك ، لذلك تأثرت باللهجة الشامية ، وكل البيشوفني مش بيفتكرني صومالية ، لأني بحكي شامي كتير . * لكن بتشبهي السودانيين ؟ -ناس كتار لاحظو الحاجة دي ، وفي ناس اول ما يشوفوني بيفتكروني سودانية ، وعندما اخبرهم بأنني صومالية لا يصدقوا ، وش اعمل لهم ، خلاص بقول ليهم سودانية سودانية ، وجعلية كمان ههههههه ، حتى في صوماليات بيفتكروني سودانية ، لكن لمن اتكلم اللغة الصومالية يصدقون بأني صومالية . * الصومال مابين الحروب والجوع ؟ -الحمد لله وكفى ، فمن المؤسف حقيقة ان يختفي بلدي الصومال الجريح عن العالم مابين الحرب والجوع ، لكن بعد كل عسر يسر، فانني متفائلة واسال الله العلي القدير ان تعود الصومال سيرتها الاولى ، وذلك عن طريق ابنائها ، ونحن اذ نتعلم حتى نفيد بلدنا ، كلنا يطمح في ان تعود بلادنا الى ماكانت عليه من دولة مؤثرة في العالم وفي محيطها الاقليمي ، وان يرجع الشعب المتناثر في العالم الى بلده الام معزز مكرم . * اخترتي الدراسة في جامعة الاحفاد ليييه ؟ -اخترت جامعة الاحفاد لأنها جامعة عالمية ، وسمعتها طيبة ، وفيها يتم التدريس باللغة الانجليزية ، بواسطة نخبة مميزة من الدكاترة والاساتذة المؤهلين ، وهذا ما يميزها عن الكثير من الجامعات في الوطن العربي ، بالاضافة الى انها جامعة عريقة ورائده في تعليم البنات ، لكل ذلك اخترت الدراسة بجامعة الاحفاد . * بتقري شنو في جامعة الاحفاد ؟ -انا بقرأ ادارة اعمال * ليه ادارة اعمال بالذات ؟ -لأنها رغبتي من زمان ، بالاضافة الى انني اريد ان احضر الماجستير في العلوم السياسية ، دايرة في المستقبل ابقى وزيرة او نائبة في البرلمان الصومالي ، المهم دايرة اكون كادرة من كوادر السياسة في الصومال . * طيب ما عندك طموح تبقى رئيسة للصومال ؟ -( ضاحكة ) يا زول ، شوف حكاية ابقى رئيسة دي شوية صعبة ، انت قايل الرئاسة دي حاجة هينة ، الرئاسة مسؤوليات واعباء وتكاليف ، والحساب بتاعها مع ربنا عسير ، لأنو لو في زول ساي نام جعان ربنا حيحاسبك . * طيب برنامجك في رمضان كيف ؟ - برنامجي في رمضان ثابت ، بالصباح بكون في الجامعة ، برجع الساعة تلاتة ، اخد راحة ، بقرا قرآن بعد العصر لحدي موعد الافطار ، غالبا بكون بي حاجات خفيفة ، زي الشوربة بالسمبوسة ، او ماكرونة بالباشميل او عدس او بازيلا ، بعد داك بجهز عشان امشي صلاة التراويح ، وبعد ذلك اذاكر دروسي الى الساعة 12 . * وين الاكلات السودانية ؟ - مرات مرات باكل اكل سوداني ، لكن اكتر حاجة بنعمل الوجبات الصومالية مثل السمبوسة ، العنجيرة ، عنبولو ، موفو ... الخ . * الفرق مابين السمبوسة الصومالية والسمبوسة السودانية ؟ -السمبوسة ، أكلة شعبية صومالية، لا تكاد تخلو منها موائد الافطار الرمضانية ، وتجتمع على حبّها الاسر الميسورة والبسيطة الحال على حد سواء ، مكوناتها عديدة ، اهمها العجين واللحم المفروم ،المخلوط بالخضار الطازج والبهارات الخاصة، ويتم حشو هذه الخلطة في شطائر ثلاثية الأضلاع، وتوضع في مقلاة الزيت لتخرج منها ملونه بلون الذهب ، لكن السمبوسة السودانية ما بعرفها . * ما هو الشئ الذي لا يعجبك في الشعب السوداني ؟ -لاحظت انو في كتير من السودانيين ما بيهتموا بالمادة الغذائية في الوجبات ، الوحد داير ياكل وخلاص ، عندكم حاجة اسمها ( بوش ) بتحبوها شديد ، اكلتها مرة واحده وما عجبتني . * مابين الشعب السوداني والصومالي ؟ -الشعبين متشابهين بصورة كبيرة ، من ناحية الملامح ، وبعض العادات والتقاليد . * من المواقف التي مرت بيك في السودان شنو ؟ -اول مرة اجي السودان وانا في مطار الخرطوم ، دخلوني في صف الوطنيين ، لمن الضابط شاف الجواز بتاعي ولقاني صومالية قال لي ارجعي صف الاجانب هناك ، طبعا زهجت وكان الصف طويل ، واول ما دخلت صالة الوصول اتصل بي الضابط الذي اخذ بياناتي وبدون اي مقدمات قال لي ( انا داير اتزوجك على سنة الله ورسوله ) ، ما عرفت اقول ليهو شنو ، بعد مسافة قلت ليهو معليش يا سعادتك انا جاية علشان اقرا مش عشان ادور على عريس ، وكمان في اسبوع المرأة بجامعة الاحفاد شاغلوني . * رأيك في الشباب السوداني ؟ - شباب مجتهد ومثابر ، بس ملاحظة انو كل السودانيين دايرين يسافرو برة السودان ، عندهم هاجس السفر ، بلدكم حلوة وجميلة ، انتو لمن تسافرو وتخلوها طيب مين اللي حيعمرها ليكم ، مين اللي حيبنيها ، السودان محتاج ليكم يا شباب . * والبنات السودانيات ؟ -أنا حبيت البنات السودانيات شديد ، بيعجبني فيهن رغبة التعليم ، طموحاتهن كبيرة ، بس المشكلة انو ما قاعدات يلقوا وظيفة مناسبة لهن في مجالهن غالبا ، بالإضافة الى انني لم اشعر بالغربة في السودان ، لان صديقاتي السودانيات دائما ما يقفن بجانبي ، خاصة اهداء وعلا وايمان ، ديل من اعز صديقاتي ، وكم مرة عزموني في بيوتهم ، واكرموني شديد . * المصطلحات السودانية ؟ - عندكم مصطلحات غريبة ، في الجامعة بسمع البنات يقولو ( واحد في الكف وواحد في الرف وواحد للف وواحد للسف ) وكمان بسمع كلمات زي ( ووب علّي ، كر علّي ، سجمي ، ويازول ، شنو ، بري ) . * بتمشي السوق ؟ - أيوة بمشي السوق ، انا احتياجات رمضان كلها جبتها من السوق الشعبي ، بس الحاجات كلها اسعارها ولعت نار ، حتى ايجار الامجاد بقى مضاعف ، زمان كنت بمشي المشوار من امدرمان للخرطوم مثلا بي 15 جنيه ، هسي بقي بي 50 جنيه ، مرة بتاع الامجاد قال لي الاجرة زادت عشان البنزين زاد ، قلت ليهو انا عندي اي حاجة زادت ، الجامعة رسومها زادت ، الكهربا زادت ، الاكل اسعارو زادت ايجار البيت ، فقلت ليهو ما تشكي لي عشان انا حأبكي ليك من الوضع اللي انا فيه . * بتعرفي الأماكن في الخرطوم ؟ -كيف ده كلامك ، بعرف الخرطوم وامدرمان ميح ، عندكم المهندسين وبانت والفتيحاب ، اركويت والمعمورة الرياض والطائف ... الخ، انا عرفت الاماكن في الخرطوم عشان ما اضيع . كلمة أخيرة ؟ كل سنة وأنتو طيبين . الصحافة
