الفنان الكوميدي إبراهيم الخضر (كومك) شخصية كوميدية تجبرك على الضحك.. اشتهر باسم (خلف الله) بعد مرحلة الانتخابات حتى كاد أن ينسى اسمه الحقيقي، التقيتاه في هذه الدردشة الخفيفة وتركنا المسرح والتلفزيون جانباً وتعمقنا في حياته الخاصة.. أجاب - بصراحتة المعهودة - عن الحب والزواج وعلاقته بالمطبخ وكيف انه تعلّم الكوميديا منذ أن كان صغيراً في بيت يضج بالكوميديا، فماذا قال في حوارنا معه... } يا خلف الله عذبتنا.. العبارة دي سمعتها كم مرة بعد الانتخابات؟ الشخصية دي أنا حبيتها شديد زي ما كل الشعب السوداني حباها ومن الوقت داك كان استلمت أي شغل بيقولوا لي خلف الله وهسه أنا ذاتي استغربت لمن قلتي لي يا إبراهيم قايلك من بنات أهلي. } انت زول مضحك في المسرح والتلفزيون لكن دايرين نعرفك في البيت جادي ولا برضو بتاع ضحك؟ كل الناس بيقولوا لي إنو أنا زول مضحك لكن نحن بيتنا كلو كوميدي إلا زول واحد أخوي الأصغر مني مباشرة الزول ده شال صمتنا كلو. } قلت البيت كلو كوميدي كلمنا عن بيتكم؟ أمي أول زول اتعلمت منها الكوميديا من زمان وكانت بتقلّد نسوان الحلّة طبعاً نحن ناس ريف الناس بقعدوا ليها وهي زي التلفزيون وهسه بعد شخصية خلف الله قالت لمن تمشي مناسبة تلاقيها واحدة تسلم عليها سلام بارد وبمجرد ما يقولوا ليها دي أم خلف الله الواحدة تعيد سلامها تاني وطبعا بتجي تقلّد لينا الموقف، وأبوي برضو زول نكتة وكان بسوقني معاه الجزارات والدكاكين ويقولوا لي حاكي لينا فلان وفلان ويدوني ريال عن كل محاكاة يعني عدادي رامي من زمان. } الحب وما أدراك ما الحب حصل أخدت شاكوش؟ والصلعة دي من شنو؟ والله هو شاكوش واحد لكن كان قوي شديد لأن حبي كان بعنف وبصدق شديد. } انت اتزوجت عن حب ولا قناعات؟ بقناعة وحب. } علاقتك بالكورة والرياضة عموما؟ المسرح عندو رياضة خاصة وعلاقتي بالرياضة ضعيفة لكني بشجّع الهلال. } في البيت ممكن نلقاك في المطبخ بتطبخ في حلّة؟ أنا بسلق وبحمّر البيض وبقطع السلطة وكمان بحضّر العدّة وبخت العيش في الصينية ومرة قلت دايرة أعمل أكلة جابوها في الأم بي سي حرقت صينية الفرن. } انت زول كوميدي وبتضحك الناس إنت البضحكك منو من الكوميديين؟ جمال حسن سعيد - سمؤال حسن عبد الماجد } عندك هواية القراية ولا ما من ناسها؟ أنا هسه لمن اتصلتي علي كنت طالع من المكتبة وكنت بقرأ في مجلة الخرطوم في عدد قديم من سنة 72م. } في الختام انت زول كسّار تلج في الشغل والبيت ولا لا؟ في الشغل احيانا بكسّر تلج لكن في البيت طوالي وضروري عشان كسيّر التلج بلطف الأجواء. الاحداث
