٭ دافع الشاعر والصحفي ود المسلمية عن أغاني الفنانين الجدد، وقال ان ما يقدمونه ليس هبوطاً بل هو ما يطلبه المستمعون، كما اشاد برحلات الفنانات العشر الى نيجيريا للغناء لشريف مايدوغري. واعتبره توطيداًللعلاقات السودانية النيجيرية، وهذه بعض إفادات ود المسلمية السلمية. ٭ ود المسلمية لقب فني صحفي؟ - لقب قديم اشتهرت به عبر مجموعة صحف منها «قلب الشارع والأضواء والخرطوم والدار والشارع السياسي وألوان» عبر عمود الوخز بالكلمات، وأنا السماني ابراهيم محمد ابراهيم من أسرة قرآنية صوفية، ووالدي درّس البروفيسور علي شمو رئيس لمجلس القومي للصحافة والمطبوعات في الخلوة بمدينة الجنينة. ٭ ود المسلمية شاعر اختار الفنانين الشباب ليه؟ - أولاً مافي فنانين شباب في السودان غير طه سليمان وشكر الله عز الدين، مع بعض الاجتهادات من محمد حسن قرقوري. ٭ شكرّت طه سليمان عشان غنى ليك كلماتك؟ - لا طه سليمان صاحب رؤية واضحة وماشي بخطة محددة، ومتطور كلمات والحان واداء. وشكر الله أشيد به دائماً وهو ما غنى لى، وقروري فنان مهذب وخلوق وصلاّى. ٭ وين رؤية طه سليمان وهو يغني سنتر الخرطوم يا عوض دكام وقنبلة قالوا احتمال تنفجر وماشه معاك عسل ماشه معاك باسطة.. ودي اغاني عابطة؟ - وين الهبوط دي كلها أغاني مكتملة، والهبوط إلا في الدورة الدموية، وطه يحمل ثقافة جيل كامل عندو ادواته الخاصة، ودي الأغنيات المطلوبة الآن، وبرقص عليها في بيوت الأعراس الكبار والصغار. ٭ طه سليمان غنى شنو من كلماتك؟ - (دايرك براك في كلمتين اختاري انتي متين ووين نقعد نحدد موقفك.. يا ريدة جد جد ولا بين). ٭ وحددت موقفك مع حبيبتك دي؟ - كالعادة طلعت ريدة بين بين. ٭ شكلك أخدت ليك مجموعة شواكيش؟ - شواكيش بالجملة والكوم والردوم، وأنا حبيت وانجرحت من أول حبيب. ٭ عشان كده بقيت تشلت المرأة في أشعارك؟ - انا حالياً معادي للمرأة، وما عندي علاقة عاطفية مع أى واحدة، وبنات الزمن ده ما زي نسوان زمان. ٭ الفرق شنو؟ - زمان حشمة وذوق وأدب واحترام بين الحبيب والحبيبة.. لكن الآن الحب بقى كلام فاضي وعلاقة مادية مية مية بسبب الرأسمالية.. والماعندو قرش زي ما قال الشاعر حسن الزبير بفكوه عكس الهواء. ٭ وإنت قلت شنو في حب بنات الزمن ده؟ - أغنية بتقول: شفت كيف الحب بقى منية سنين ما تحققا تخلص تريد تلقى الشقا في الريدة بت ماااا تصدقا ٭ مافي حتى بصيص أمل؟ - في مرات حب حقيقي، وأنا كتبت قصيدة غناها لى الفنان طه سليمان بقول نصها: ناس تشوفهم مرة واحدة يبهروك بى حاجة فيهم ولو كان طلوك وفاتو تبقى تشتاق لى مجيهم القلوب ليهم تغني والعيون مشتاقة ليهم والرموش بتقيف تسلم قبل ما تسلمي عليهم ٭ أشعاركم دي بقولوا منلوجات ساكت؟ - دي أغاني خفيفة، وهى المالكة الساحة الفنية الآن، ووجدت رواجا في جمهورية مصر العربية، واشتهر الشاعر ايمن بهجت قمر بأغنية أنا مش خرنق والحان وليد سعد وأداء الفنان ابو الليف. والفنان طه سليمان عندو اكثر من «05» أغنية جادة ممكن يقدمها في اذاعة وتلفزيون السودان وعالمياً.. لكن الناس في حفلات الاعراس بتطلب أغاني خفيفة وسريعة، الشعراء يكتبوها عشان بتجيب دخل مادي افضل. ٭ وغنوا ليك شنو تاني؟ - غنى لي الشاب معتصم خلف الله أغنية «يا خلف الله عذبتنا» وكلماتها بتقول: ردناك كتير ما ردتنا صدقناكم عذبتنا عامل تقيل ما عرفنا يا خلف الله ياخ عذبتنا ٭ وتاني الشباب غنوا ليك شنو؟ رافع القزاز مالك عامل تقول سيدا غايتو في حاجات أنا قلبي ما بريدا ٭ رأيك شنو في انتشار الفنانين الحمادات البغنوا أغاني البنات؟ - في حمادات عندهم أداء جيد زي حمادة جبرة وحمادة المربعات، واجتهادات حمادة الرحيمة.. لكن حمادة بحري وغيره ما عندهم علاقة بالغناء. ٭ إنت مع سفر الفنانات إلى نيجيريا والغناء لشريف مايدوغري؟ - أيوه أنا مع سفرهن لأنه بتربطنا علاقات وثيقة وجميلة بالشعب النيجيري، فهم اخواننا في السراء والضراء، وجاليتهم جزء لا يتجرأ من سوداننا الحبيب. ومن قبل سافرت الى الخارج عشة الفلاتية ومنى الخير وندى القلعة. وسفر الفنانات اضافة حقيقية للاقتصاد السوداني، لأنهن يعدن بالعملة الصعبة للبلاد، وكل الذين ينتقدون سفرهن لا علاقة لهم بالساحة الفنية، واتمنى أن تسكت أقلامهم. ٭ رأيك شنو في الفنانة عوضية عذاب؟ - استمعت ليها وهي تصدح بأغنيات جميلة في مستشفى التيجاني الماحي مع مجموعة «نغني ليهم» التي يقودها الإعلامي الفنان وليد زاكي الدين، واكتشفت انها فنانة تمتلك مقدرات تطريبية عالية. ٭ ومونيكا التي تحولت من الإعلام إلى الغناء؟ - نعم هي فنانة صوتها مميز ورخيم، وسيكون لها شأن في مسيرة الأغنية السودانية. ٭ ما عندك أغاني جادة؟ - كتبت أكثر من «08» أغنية خفيفة تغنيها مجموعة من الفنانين الجدد والفنانات في حفلات الأعراس.. وعندي أكثر من «001» أغنية جادة تم تسجيل بعضها في تلفزيون السودان. ٭ زي شنو؟ - أغنية تدعو الى السلام في دارفور غنتها الفنانة حواء رمضان بالتلفزيون، واشتهرت في معسكرات النازحين، وتقول كلماتها: بندقية هوى كفاك اسكتي وليدي داك كتلتي ومالي كم هلكتي وصغيري ما رحمتي ٭ وغيرها؟ - غنى لي الفنان آدم حمودة شعار إذاعة وتلفزيون دارفور الذي يقول: دارفور ما شبه الحروب دارفور اكبر من كده ٭ ما غنى ليك فنان كبير؟ - غنى لى د. عبد القادر سالم رئيس اتحاد المهن الموسيقية السابق أغنية تقول: (نار الحروب يا عيال تشريد وخراب ودمار فرقانا صبحت صي لا فيها جد لا خال ٭ إنت مع الوحدة ولا الانفصال؟ - أنا مع البشير ومؤتمر وطني قاطع، ومع وحدة البلاد.. وغنت لي الفنانة لوشيا جبريل أغنية للوحدة بعربي جوبا بتقول: تعالوا نتوحد قوتنا في وحدتنا قلناها بالإجماع سودانا واحد وبس سوداننا ما بتباع
