سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
والدة عمر البشير : امى كانت ماسكاهو قلتا ليها يمة ماتفكيو لو اتفكا بيعمل فينا مصيبة ..امى فكتو شال الحديدة ام راسين البكسرو بيها السكر زمان وضربنى فى عضم الشيطان.
كشفت الحاجة هدية محمد زين والدة الرئيس عمر البشير النقاب لأول مرة عن تفاصيل حياة الرئيس الباكرة وذكرت فى حوار مع صحيفة "الأهرام اليوم" بمناسبة عيد الام ان الرئيس كان ملحاحاً فى الإحتفاظ بحقه وكان دائما مايدخل فى شجار طفولى مع شقيقه حسن .. والدة الرئيس البشير حكت عن طفولة الرئيس قائلة بسودانية جميلة :" عمر كان طبعو كويس لكن مرة دقيتو دقة شديدة عشان نزل البحر وهو طفل والدنيا كانت دميرة وقلت لى امى يمة ولدى بغرق انا ماشة الحقو وطوالى جبتو وكان عندو "قنقر "معانا وقال لى يمة قنقرى وينو ؟ما اشتغلتا بيهو وشلتا القهوة من امى ..قام مسك يدى وقال لى تانى يمة قنقرى وينو ؟ شلتا القهو باليد التانية وبرضو ما رديت عليو ..قام مسك يدى التانية والقهوة اتكشحت ..بعد داك دفرتوا جوة الاوضة انا اضرب فيو وامى تضرب فيو امى كانت ماسكاهو قلتا ليها يمة ماتفكيو لو اتفكا بيعمل فينا مصيبة ..امى فكتو شال الحديدة ام راسين البكسرو بيها السكر زمان وضربنى فى عضم الشيطان وغاب سبعة يوم فى بيت جدو الا بعد داك خجل واعتزر. واماطت الحاجة هدية اللثام عن الحظات العصيبة الى عاشتها عند انقلاب 30 يونيو وقالت ان الإنقلاب وجدها فى صراصر بولاية الجزيرة التى ذهبت اليها فى واجب إجتماعى وقالت أن اهلها فى صراصر اخفوا عنها أمر الإنقلاب وأنها عرفت الحادث بالصدفة عندما قال احد سائقى العربات لزميله :"ان العميد الذى قلب الحكومة أهله من صراصر ،ومضت الحاجة هدية تقول انها لم تقابل الرئيس البشير واختفى عن ناظريها لمدة 4 ايام ودخل عليها فى اليوم الخامس برفقة الشهيد كمال على مختار واضافت الحاجة هدية انها لم تتمن ان يكون ابنها رئيس للجمهورية ولا لأحد من أبناءها . واختتمت الحاجة هديه لقاءها مع الاهرام بتوصية نساء السودان بتربية ابناءهم التربية الصالحة وقالت ان عمر لم يقصر معاها وانها "عافية منو ورضيانة عليو " وعمر قال :" كفاهو ما داير يحكم السودان تانى وقلنا ليو قدم شوية لى قدام قال لاكفاى انا تعبت وانا قلت ياربى البلد دى بلا عمر بتبقى شنو ؟".