* لو كانت حالة الغليان التي تسيطر على الوصايفة عندما يحقق المريخ مجداً، تتحول لطاقة بذل إيجابية لفارقوا محطة الصفر الدولي المقيم، فما دخل نادي (أخوان فاطنة) بطولة خارجية إلا وعاد منها بخفي حنين وخرجوا كالعهد بهم (صفر اليدين) ..!! * أجمل مافي حصول (الجوي) على بطولة سيكافا الثالثة توقيتها، وأعظم مافي الجوية الأخيرة أن البلاد عن بكرة أبيها (شعباً وحكومة) خرجت للإحتفاء بها، وأكبر دليل على قيمة البطولة حالة الغليان التي فتكت باعلام الوصايفة الذين لم يجدوا ما يخدروا به الجمهور سوى الهجوم على جمال فرفور ..!! * كان بإمكانكم اتهام فرفور بالتهرب من دفع ضريبة الهلال (أذا انتو جبتو كأس من برا وفرفور أبى يجي المطار ) ..!! * لو ناس محمد عبد الماجد دايرين فرفور يمشي المطار يستقبل ليهم محترف جديد يبقوا غلطانين وما بعرفوا فرفور.. (فرفرة يا مبارك البلال بتاع كأسات كلامكم دا قولوا لصلاح ولي) ..!! * انتوا يا الرشيد إذا الزول ما داير (ضياع الزمن المحلي) تقيفوا معاه بإعتبارو راجل طموح وتجيبوا ليكم بطولة خارجية، ولا تزعلوا وتهاجموه عشان احتفل مع (ناس الجوية) ..!! * عينكم لخليفة تهاجموا في فرفور ..!! * جمعة (يملص) الكورة في القون وناس الرشيد يهاجموا فرفور ..!! * هسه فرفور ذنبو شنو ؟ * يا فاطنة اتكلمي مع الناس ديل ما تسكتي انت مش (الناطقة) ..!! * سامي عبد الله يعمل في (البلنتات) وناس مبارك يهاجمو في (ملك الأغنيات) ..!! * بعدين انتو الكاردينال أول زول قدم التهنئة وقال دا إنجاز كبير للكورة السودانية ليه ما هاجمتوه .. (التهنئة حرام علي جمال وحلال للكاردينال) ..!! * د. علي قاقرين أول زول أحتفل مع (الجوي) وجا المطار .. (تسيبوا قاقا وكردنة وتهاجموا جمال) ..!! * بالمناسبة : انتو زعلانين من (جمال) فرفور عشان مشاركته ولا عشان اسمو ..؟؟ * اسم (جمال) بزعل اعلام الوصايفة يا فرفور ..!! * هتف الجمهور في حفل الخميس : (اقلب اقلب يا فرفور)، فداعبهم فرفور بخفة ظل وحلاوة روح (قربت)، واحد وصيفابي متابع الحفل في الإذاعة سمعها (قلبت) ..!! * فرفور الذي ظل مشاركا مع الجوي في كل احتفالاته وشاديا في كل أفراحه يستحق تكريم القطاع الثقافي بنادي المريخ له في لفتة تؤكد أن عشاق الأحمر أهل وفاء وعرفان .. (ولو ما كنت من الصفوة وا اسفاي وا ذلي) ..!! * جاء تكريم القطاع الثقافي لفرفور بعد الهجمة الشرسة التي تعرض لها من اعلام الهلال مع أنه لم يفعل أكثر من الغناء وقال يومها إن المريخ هو الفريق الوحيد الذي أفرح الشعب السوداني بالجويات .. (لكن يا الرشيد النصيحة حارة) ..!! * حملت شهادات التقدير التي منحت لفرفور دلالات عدة وجاء فيها بالنص : ( نادي المريخ الرياضي .. القطاع الثقافي شهادة تقدير وعرفان الفنان المبدع : جمال مصطفى (فرفور) المحترم يهديكم القطاع الثقافي بنادي المريخ أسمى آيات الشكر والعرفان تقديراً لإسهاماتكم الفنية ودوركم الفاعل في مسيرة الأغنية السودانية، وإجلالاً لمشاركاتكم المقدرة مع الزعيم في كل احتفالاته وانتصاراته متسامياً فوق مفاهيم الإنتماء الضيق ومدركاً لدوركم القومي في التواجد الدائم مع أهل البطولات الخارجية والكأسات الجوية . القطاع الثقافي لنادي المريخ 11/سبتمبر 2014م) * أجمل مافي شهادة فرفور التقديرية عبارة (تواجدكم الدائم مع أهل البطولات الخارجية والكأسات الجوية) ..!! * و(جوي) لا تكلمني ..!! * قال فرفور ان التجربة الأخيرة أثبتت له حقاً أن جمهور المريخ صفوة بمعنى الكلمة وأكتشف أن القصة ليست مجرد لقب للتضخيم أو حديث للتفخيم..(وصفوة لا تكلمني) ..!! * أخيراً : (نزار) ولدنا وفرفور بقضي غرضنا ..!! نقوش متفرقة * مجرد سؤال : إذا أبرمنا مع الوصايفة -لا قدر الله- اتفاقية (جنتل مان) هل ستكون حصرية على اللاعبين أم أنها ستشمل الفنانين ..؟؟ * بشه (يقترب) من القلعة .. والمدينة (جاري) علينا بأقصى سرعة ..!! * يا جماعة .. لموا اولادكم ديل نحنا ما بنسجل أكتر من تلاتة لكن بويا ممكن يشملو الاستثناء ..!! * ارتدى كابتنهم السابق هيثم مصطفى شعار المريخ ولعب في صفوفه تاركاً المئات معتصمين والنحيب والبكاء يسد الفضاء، والآن يسعون لعودته ومصالحته بالإعلام والجمهور ..(وزعلانين من فرفور) ..!! * يا فرفرة .. الصفوة كيف ..؟؟ * يا فرفرة .. حبابك يا ملك و(البمشي قدام تاني ما برجع ورا) ..!! * إترجعي ..!! نقش أخير أثبتوا الراجيكم كتير والبشيل فوق الدبر ما بميل ..!!