* هل تدهور مستوى اللاعبين السيراليونيين لدرجة أن يصبح سيمبو أفضل لاعبيهم علي الإطلاق.. ؟ .. (يا عالم ما تبالغوا نحنا إذا ما شفنا مستوى لاعبي السيراليون شفنا سيمبو) ..! * تعرف يا مزمل السيراليونيين ديل واحد من اتنين : (يا ما عندهم كورة يا ما عندهم منطق) ..! * يا حليل خليفة لو كان لسه قاعد كان حسم المهازل دي.. (لكن بعد شطب خليفة بقى الهلال ما فيه لاعب كبير يشتكوا ليه) ..! * ربنا يوفقك مع الأهلي يا خليفة كنت شايل بلاوي.. و(بعدك الفوضى حصلت مرحلة انو الشارة يلبسها مساوي) ..! * شيلت الشارة يا كابتن مساوي.. (معقول دي شارة ولا ضربة جزاء) ..! * غايتو الكابتن الجديد احتمال ما يكون زي الفاتوا وما يعمل مشاكل (لكان ضمان بعمل بلنتي) ..! * هسه يا محمد عبد الماجد تتويج سيمبو أفضل لاعب بالسيراليون ثبت ولا زي جية كروز ..! ؟ * منطق تتويج سيمبو هو نفس منطق تطفيش خليفة ..(ونحنا رأينا خلوه شوفوا رأي مساوي بوضح ليكم أصل الحكاية .. وبالمناسبة الشارة في كتف مساوي زي الزول اللابس الفنيلة بالقلبة أصلها ما جاية) ..! * ما مشكلة كلها شهرين تلاتة و (سيد الشارة) قاعد منتظر.. و(يا كاريكا قوم سخن) ..! * (سيد الشارة) منتظر الإشارة ..! * تذكروا انو فطور قندهار لن ينهار..! * انا لو محل مساوي بقول ليهم يا تلعبوني أساسي (احتراماً للشارة) يا بخلي شارتي معاي في الكنبة..! * ناس الهلال ديل من فات منهم هيثم مصطفى بقوا بتعاملوا مع الشارة زي ناس الإنقاذ لما يدوا مسؤول سفير.. (طوالي بعدها خطاب شكر وكلمتين ثناء، وتسمع جواب الاستغناء) ..! * حالياً مساوي لاعب بدرجة (سفير) وكابتن ينتظره التحليق خارج الكشوفات ببيان ومن بعد ذلك (الطيران)..! * غايتو اي (كابتن) في الهلال بركز مع الشارة ويدخل في شخصية انو مهتم باللاعبين ومهموم، (طوالي طيارتو بتقوم)..! * كابتن مساوي (قيد الإقلاع) وكابتن كاريكا (ربط الحزام) مستعداً ل(الهبوط على المدرج) . * شارة الكابتنية عند الوصايفة مرتبطة بالضرب تحت الحزام..! * انتو (الشارة) بدل الصراعات الخفية دي ما تدوها لسيمبو، وأرتاحوا من المشاكل بالمرة. * غايتو كاريكا لو جاب قون، لا بحلكم سيمبو لا سيراليون (بستلم الشارة قبل الحكم يطلع من خشمو الصفارة)..! * (تهديف) وتسلم..! * هناك تحركات حثيثة لإطلاق حملة لدعم الكاردينال مادياً حتى يستطيع الاستمرار في كرسي إدارة الهلال فالوضع الحرج لم يعد يتحمل هذا التأني ..(لكن يا كردنة انت جيت متين عشان يعملوا ليك مشروع التبرع بخمسة جنيه ... يا أبو الكرادن الموسم ما بدأ ما تشمت الطابوراب فيك انت لسه شفتا صرف)..! * كتب الرشيد علي عمر قبل يومين ما يلي: (أن اضعنا هذا التوقيت ودخلنا على فترة المنافسات فستظل تدفع وحيداً يا أشرف وغداً تتيبس جيوبك اثر ارهاق مواجهات الالتزمات وتبحث عن طريقة تغنيك عن المضي قدماً أمام صرف هذا الغول الجامح الذي يريد الدفع كل يوم جديد)..! * يا الرشيد: لسه بدري علي كلام المناشدات.. الناس عايزة تشوف الفضائية والقلعة الزرقاء وكروز وباقي القنابل والمفاجات . * يا كردنة طلِّع الدولارات الناس ديل دايرنك خير (صرف) لخير سلف..! * (سلف) لا يا كردنة.. بعد شوية بندخل في ديون وأوامر قبض وأدونا القروش العليكم و(عفو) مافي ليكم . * ديون الأرباب حصل فيها شنو.. (يا وصايفة حلوا المشكلة من بدري .. صلاح دا نفسو طويل وما بخلي حقو بس برتب الملفات وكل فترة بجيكم بالكشوفات) ..! * واحد وصيفابي قال لي صلاح مفروض يعفي الديون.. ( قلت ليهو صلاح دا ما بخلي حقو، بس هو هسه ساكت كتكتيك وما خاتي موضوع المطالبة في رأسو .. وبكرة بتكلم ويفتح نار وبرفع ليكم مية شعار) ..! * شعار الأرباب عند المطالبة: (الحديث ذو "ديون" والعفو عند "المقبرة"...). * شعار الأرباب اتعرف.. لكن شعار عصمت في جيبو ..! * سيبكم من الديون خليكم مع مهازل سيراليون..! * قال إعلام الوصايفة أنه بعد اختيار سيمبو أفضل لاعب في سيراليون تمت مطاردة (المدافع الفلتة) من قِبل الزمالك وأهلي بنغازي، وعلى ما يبدو أن المطاردة بهدف الوقوف على مساخر الملاعب ومعرفة سر أختيار سيمبو كأفضل لاعب)..! * سبمبو دا بكون أفضل لاعب في (عدم التطور)..! * مساوي راجل طيب ما يستاهل.. (أدوهو شارة الكباتن باقي ليهو بيان الإستغناء) ..! * شارة.. استغناء .. مقال دامع من قسم و(أذهبوا فانتم الطلقاء) .! نقوش متفرقة * بدأ الكاردينال تشييد الجوهرة الزرقاء بفحص التربة الذي سينتهي بنهاية دورة كردنة الأولى . * نتوقع أن تكتمل الجوهرة في عام كردنة العشرين (أي قبل نهاية فترة زعيم أمة الهلال بخمسة أعوام، وما تستعجلوا الغريق في الفحص قدام). * غايتو دورة كردنة الرئاسية الأولى دي بتقضوها فحوصات..! * السنة دي ركزوا مع فحص التربة لسة الحالة صعبة. * تربة الجوهرة محتاجة.. (تفحيص) وتشخيص ..! نقش أخير * يا مساوي سامح دي المحبة في الدنيا مافي محبتين والقالوا ليك عن (البيان) إن شاء الله يوم ما تشوفو عين ..!