* ليس مهماً عندي كسب الوصايفة لثلاث نقاط على أرضهم مساء أمس بعد ولادة متعسرة بهزيمتهم لهلال كادوقلي بهدف وحيد، ولكن المهم حقاً أن جمهور النادي الأزرق بات يعيش على أعصابه ويعاني اضطرابات نفسية و(الدخلا المدرب البلجيكي باتريك في الهلال ما بتمرق) ..! * إن كانت متعة كرة القدم تتمثل في رؤيتك لفريقك وهو يخوض النزال، فإن المتعة عند الوصايفة أصبحت في الأيام التي لا يخوضون فيها مباريات ، و(كان الله في عون المدرجات) ..! * بالأمس كنا نمد ألسنة السخرية في وجه الأهلة من باب العكننة بين ناديي القمة، ولكننا منذ اليوم لن نفعل ذلك فالوصايفة باتوا يستحقون العطف ..و(البلجيكي دا يا محمد عبد الماجد جمّد الهلال وخت الفريق في الرف) ..! * ليست المشكلة في تجميد الهلال ووضعه بواسطة مدربه مغلفاً على أحد الرفوف، ولكن المشكلة في الحالة النفسية التي أصابت الجمهور بسبب الرجفة والخوف ..! * يا جماعة إذا انتوا ما خايفين علي فريقكم نحنا خايفين علي جمهوركم المسكين البدخل الاستاد من العصر، ومفروض باتريك (يخلي عندو شوية دم) ويخاف ربنا فيكم ..! * كنا خايفين على الهلال من الهزائم الخارجية، هسه بعد باتريك الواحد بقي يخت يدو في قلبو لما الوصايفة يلعبوا مباراة محلية ..! * أوصل البلجيكي جمهور الوصايفة مرحلة التهليل فرحاً للفوز على هلال كادوقلي بهدف يتيم بالخرطوم ..(طيب لما تجي كورة الجبال بتغيروا المدرب واللاعبين ولا بتقولوا ما ماشين) ..! * بالطبع ، نستبعد انسحاب الهلال ورفض أداء مباراة الاياب في الدورة الثانية بكادوقلي لأنه لا يوجد فريق كبير ومحترم يمكن أن يُقدِم على فعل ذلك نهائياً ..! * نعلم أن الانسحاب فضيحة (غير مسبوقة) ولكن للأسف التاريخ القريب يقول أن الهلال فعلها بالبطولة العربية أمام وفاق سطيف بعد أن دفنه الفريق الجزائري داخل مقبرته ..(وأكتفى الوصايفة وقتها بهزيمة الفريق الضيف وحلفوا ستين يمين ما يمشوا للجزائر لمقابلة وفاق سطيف) ..! * غايتو يا صلاح إدريس البشوف هجومك على (الكاردينال زعيم أمة الهلال) ما يقول انك قلت للجزائريين (كفاية مهازل الخرطوم تاني لعب معاكم نحنا ما دايرين) ..! * كردنة ممكن يشطب أعمدة الفريق وما يسجل بدائل لكن يا أرباب نحنا النصيحة بنقولا : (ابو الكرادن يا أرباب ما بقبل فضائح الانسحاب) ..! * هسه يا محمد عبد الماجد بصراحة وبراحة كده الأرباب ما يسمعنا (البتسوا فيهو دا ما أحسن منو الإنسحاب) ..! * البسمعك تتكلم عن بله جابر ما يشوف فريقك ..(انت طالما ندمان علي شطب خليفة عندك وش تتكلم بيهو عن بله) ..! * عزيزي بله جابر : سيبك من فرفرة الناس البهناك و(سير وعين الله ترعاك) ..! * سير سير يا (ملك الجير) ..! * حقيقة يا إبراهيم عوض الواحد لما يشوف جمهور الهلال يخاف علي مأمون ..! * ما مامون أبو شيبة .. (ابو شيبة يقدل فوق عديل الصدارة) نحنا بنتكلم عن مأمون حميدة ..! * معقولة : دا فريق بودي العناية المكثفة و(مأمون حميدة يجيب مستشفيات للناس دي من وين) ..!؟ * غايتو طالما باتريك دا في البلد لو عينوك وزير صحة معناها دايرين ينتهوا منك ..! * إضطرابات نفسية ساي تقدم إستقالتك ..! * انتو ناس طيبين من زمن الوزير البستقيل والمدرب البشعر بمعاناة الجماهير ..! * يا جماعة .. ما تشيلوا هم فريقكم دا الدورة التانية بتوازن ..(بطلوا رجفة وسيبكم من الحالات الهستيرية والخوف والإضطرابات النفسية) ..! * إذا كان الاضطراب النفسي يعتبر نمط سلوكي ينتج عن الشعور بالضيق أو العجز الذي يصيب الفرد ..(فحقيقي انتو طوالي متضايقين وما قادرين تعملوا حاجة وواقفين في الملعب عاجزين) ..! * نحنا بصراحة يا باتريك عاجزين عن الشكر ..! * ربنا يمتعكم بخبرات باتريك الفريدة، ويا (بلجكة) نقاط أمس دي دايرا ليها (تغريدة) ..! * إتغردي ..! نقوش بلا رتوش * يلعب الوصايفة مع البليجكي باتريك بثلاثة (صُناع لعب)، وأكثر ما يميز الفريق (التحنيط) لا (التحضير)، و(العواسة) لا (الصناعة)، و(التشتيت) لا ( * (تلاتة صناع لعب) والفريق (عدمان إسم اللعب) ..! * إذا دايرين بوتاكو يقدم كل ما عنده دا إلا تشوفو ليهو مكنة شاورما ..! * بوتاكو دا لو مسك كافتريا برضو حيكون (معبر كبير) والزبائن بجوا مارين فيهو (من طرف) و(يعكسوا) الماركات لحدي ما يرجعوا (الكاشير) ..! * الزبائن لو ما رجعوا بالماركات للكاشير ، معناها يا سلك الأثيوبي دا رجع أديس راسو عديل ..! * قابلت بأديس ابابا أمس شاب أثيوبي مجنون بكرة القدم، وسألته عن إنهاء المريخ لتعاقده مع شميليس وانضمام بوتاكو للهلال بإعتبار أن الأثنين يلعبان في منتخب بلادهما، ليصمت الأثيوبي برهة ثم يجيب : ((شميلس فقد للمريخ وكان يجب أن يصبروا عليه فهو لاعب مهاري، أما بوتاكو فهو ثغرة واضحة في المنتخب، وأعتقد أن إدارة نادي الهلال السوداني تعاقدت معه لتختبر حارس فريقها في كيفية التعامل مع كثافة الكرات المعكوسة من الجانب الأيسر )) ..! * لا زالت بركات البلجيكي باتريك متواصلة بتصدره الدوري - حسب منطوره الخاص - بالحفاظ على شباكه نظيفة ..و(يلا يا بلجكة نضف شبكتك وورينا بركتك) ..! * ناس الهلال ديل أكتر من النضافة دايرين شنو يا مزمل ؟ نقش أخير * (جِرسة) ما منظور مثيلا ..