طبعا لا مساوي ولا اي لاعب في الهلال حا يتخيل نهاية مشواره مع الهلال ما تشوفوا الكلام الرنان والصور بتاعة المصور الفنان والسيرة علي الاعناق لحد امدرمان كل ده بيتحول فجأة ويرمي اللاعب عظماً هيثم مصطفي وضعوه في منزلة (برنس).. اليوم عندهم (المشطوب)! عمر بخيت كان اسمه (المعلم).. اليوم (الماسورة)! بكري كان (العقرب) اليوم اسمه (اروش –اهوج) وبالمقابل لم يكتب اي إعلامي عن الشغيل وفيصل موسي ووليد علاء الدين اي كلام مافي محلو ان لبست شارة القيادة او ادعيت السعادة فلا حصانة لك حتي نزار حامد يوم شكوا مجرد شك انه سيذهب للمريخ اخرجوا له مقالات تشكك في مقدراته امس شفت مساوي متصور بضحكة والشيبة تتلاصف أخاف بكرة مكان الشيبة دي يبقي شعر اسود والباقي يتبيض الايامات دي شغالين مهمة (وداع كاريكا) مسكين كاريكا لن يرحموا ايامه الاخيرة كما يفعلون كل مرة كل من تسلم شارة الكابتنية في الهلال وزنو نقص شارة الكابتنية في الهلال تعني (قميص برتقالي) كالذي يلبسه من تريد داعش اعدامهم لذلك كان العوم حتي شواطئ المريخ يعني النجاة كما يفعل المهاجرون غير الشرعيين نحو اوربا غرق مهند الطاهر في الطريق وتاه المعلم زمانا ووصل البرنس وديدا وبكري وعلاء هيثم مصطفي ده عمرو كلو ما انتظروه في المطار شايل كاس الا لما جاء المريخ وبكري المدينة لعب مع شالكا وعلاء لعب ضد البايرن والمعلم ينتظر الكاس الافريقية الكبري احسن ليه يجاور في المريخ من دار العجزة في الهلال هناك الوفاء بدل بالوفاة واصبح اي لاعب هناك لا يترك مليما لبكرة لن ينال (مليم) ولو أكل النيم مسكين مساوي سيلفظ غداً وسيسمع مالن يخطر له علي بال لو قال المريخ انه يريده فقط لشطبوه الم يشطبوا عمر ومهند ومعز لان المريخ قال يريدهم ان قالوا عايزن المريخ لقتلوا ومساوي يقول (الهلال بيتي) الهلال ليس بيت احد بل هو بيت اشباح كل من سكنه طرد منه بالارواح الشريرة هيثم مصطفي اكمل فيه أكثر من عمر الكاردينال وصلاح ادريس والبرير وشيخ العرب وعبد الرحمن سر الختم في حكم الهلال ومعهم (هلال) وفي النهاية اسموه (المشطوب) تجي يا مساوي تقول الهلال بيتي الهلال بيت ايجار وليس لاحد مضيفة الحي فندق النزول فيه لايام معدودة اسأل مهند الطاهر الف مرة قلب لهم الهوبا.. وآخر الامر أدوه طوبة اسأل عمر بخيت كيف ضحي فاذا به عندهم (ألفة) وقد كان لقبه هناك (المعلم) ان الشطب والاعتزال من سنن كرة القدم لكن انكار الفضل لؤم باكمبا عند اهل المريخ لا يزال احد ابطال مانديلا لكن مجاهد لا يستطيع زيارة موقف امبدة بجوار استاد الهلال ولاجل ذلك فان ترحيبنا بعمر بخيت سيكون كبيراً لان كل من لبس قميص المريخ ارتد اليه البصر والبصيرة