برشلونة يلعب متنكراً خلونا نتكلم عن الكان لما صاحبي ضرب لي وقال أول مرة أشجع البرشا قلت ليه ده المريخ حلف بالتقطعو انو دي برشلونة خلوه صاحبي ده في واحد قال لي قلت لاولادي وقفوا البلي استيشن وشغلوا لينا كورة المريخ قالوا ليه دي كورة المريخ ما صدقهم الا طلعوا الايادي برة والايادي جوة الاستاد كانت بتولع نار أطول صفقة في الملاعب الفنانة تقول الصفقة وين في الحفلة في استاد المريخ تقول (الراحة وين) واحد كان بيرد علي التلفون وهو ماسك التلفون بكراعو قلت ليه ده شنو ده قال لي يديني شغالات صفقة حلفت عليه يوقف واحدة بقي يصفق بيدو و(كضمو) كفت نفسو كفيت ما لقاه حرامي في مولد ولا.. الهلال أمام الترجي ومازيمبي أنا قلت الحاصل شنو علي انريكي مدرب البرشلونا مالو عجز كده؟ طلع غارزيتو غارزيتو المعلم الغلب العلمة قال ليها يلا بلا ع(لمة) غايتو المابشجع المريخ في البلد دي مفروض يفحصوه يعقربوه شفتو العقرب أول أمس شكر(ن) كاردينال رأفت الهجان بتاع المريخ الحمد لله العم (شبشة) قاعد معاهم أهو يعوض مغسة (العقرب) العم (شبشة) ده والله بأثرني من زمن فوراوي قاعد لحد زمن الكاردينال ما شاف عرض زي بتاع أول أمس ولا انتصار زي اللي كان داعش يوم الجمعة ضربت تونس وداعس دعس الجزائر اريتو لو المريخ بتقسم ديديه الله عليه الزول ده بيتمركز تمركز صاح وحريف حرفنة ما حقت نصاح و ضفر حاجة تانية بقي صانع العاب شاط ليه كورة دقت في كيبي اقصد في الماسورة لعبها بطريقة تناول بلحة الافطار لما تشيلها بكل هدوء وتدعو بكل خشوع وتمضغها بكل فن وجابسون كلام تاني. طول زي الطول وعرض ولا عرض المريخ أمام العلمة مباراة انتهت في ربع ساعة من المتعة ما حسينا بالزمن وناس العلمة انتهوا.. انتظروا الاجتياح غايتو أنا شعرت بالارتياح وانتظرت الاجتياح قالوا قاقرين الجزائري دخل بين الشوطين الدبلوماسية دي خربت علينا متعتنا ياخي نحن اتمتعنا متعة أول مرة اشوف لي مباراة كل المعلقين والضيوف ومقدم البرنامج بيمدحوا في فريق واحد سمعت ابو عركي يغني تصحي العقارب في الشوارع قلت لواحد جنبي انت مش المفروض تصحي (الكهارب) قال لي كانت كده لكن عدلوها قالوا الوفاق واتحاد العاصمة يرجفو ساي نحن البنشجع الزعيم رجفنا قلنا هسي لو ده مافريقنا ما كان تعبنا أمس واحد قال لي ناس الهلال ديل فطروا بياتو رخصة قلت ليهم كانوا علي (صفر) الدماعة فرحانين بالتعادل فرحة الود الانقذوه من الغرق اوع تقولوا لي ما سمعنا بالقصة ديك شخصيا ما حا اقدر احكيها هنا لا رمضان ولا المكان بيسمحوا. الخلاصة مجموعة الحمام غريبة خلاص مجموعة افلام محمد سعد بس مازيمبي سمع انه ناس الهلال جنهم درون درن ليهم فريق بتاع قسام بس أغرب حاجة الكاردينال يخرج غاضباً لتعادل الهلال في الدوري مع أهلي شندي كلو من أهل شندي و بغلة عبد الخير نهاية سباقها معروف.
