قبل أن يجف مداد الصحف الزرقاء في الغزل الصريح والعفيف والعذري في اللاعب الوك فاذا بالمريخ يسجله ويكمل اجراءات التحاقه بالكشف الأحمر ويصبح اللاعب الوك كينج ضمن كتيبة الزعيم وبطل الكأسات المحمولة جواً . *وقبل ان يفيق إعلام الضلال ومعه الكاردينال من صدمة وضربة الوك يلعب الكاردينال بالنار في محاولة للثأر ورد الاعتبار ويخطف الكاردينال لاعب المريخ شرف شيبوب وقبل ان يكمل الكاردينال وفريقه الهندسي تشييد كبري الملكية في دولة جنوب السودان فاذا بالمريخ يتدخل ويوقف عملية تشييد بناء الكبري ويعيد اللاعب الى كشوفاته طائعاً مختاراً تاركاً للهلالاب العذاب ومخلفاً للصفراب احلام ظلوط والسراب. *نشكر الزملاء خالد عزالدين والرشيد علي عمر وفاطمة الصادق وكل كتاب الفيس بوك والواتس أب من الهلالاب والصفراب والوصيفاب الاعتراف بموهبة شيبوب حراق القلوب واعتقد الانصاف الذي وجده شيبوب "شواي القلوب" من قبل الهلالاب لم يحظ به لاعب مريخي من قبل. *اعتادت ادارات الهلال على الضرب من دون رحمة وعلى تجرع الهزائم الادارية بلاهوادة من ابناء المريخ العظيم واعتاد اعلام الهلال على البكاء والنحيب على اللبن المسكوب في كل مرة وأثبتت التجارب أن المقارنة بين العمل الاداري في المريخ تخطى مرحلة الدكتوراة في الوقت الذي مازال فيه العمل الاداري في الهلال في مرحلة ماقبل الروضة وتحديداً في تمهيدي الروضة. *سنتوقف عند الدروس التي لقنتها ادارات وابناء المريخ لادارات الهلال التي كان يرأسها الاحياء من الرؤساء ولن ناتي بسيرة الاموات من رؤساء الهلال لأن أخلاقنا لاتسمح لنا بذكر الاموات الا بالخير رحمهم الله رحمة واسعة وستكون بدايتنا بفاروق جبرة الذي فتح له احمد دولة وطه علي البشير حساباً في بنك ايفوري وحولوا له المبلغ المحدد والمطلوب ورغم ذلك نجح ابناء المريخ في تلقين الهلالاب الدرس بضربة موجعة ظل الصفراب يتباكون عليها حتى يومنا هذا. *اما صفقة اسامة أم دوم فقد خسرها الهلال وإعلام الهلال وهي تكاد تكون من أشهر وأقوى الصفعات التي وجهها مريخاب الحارة ورجال الاحمر الوهاج واصحاب العيون الحمر للهلالاب ولإعلام الضلال. *وفي كل سنة يحاول الهلال الرد يتعرض لضربة موجعة ومؤلمة وأشد قسوة فكان مسلسل الملك فيصل العجب سيدو الذي دوخ الهلالاب جمهوراً وادارة واعلاماً لدرجة ان الأمين البرير رصد مبلغ 50 مليون من الجنيهات في تسجيلات عام 1997 لمن يدل الهلال على مخبأ العجب السري وهذا المبلغ يعادل الان نصف المليار علما بأن العجب كان يتجول ليلا بصفة يومية مابين بحري والخرطوم وأمدرمان برفقة مزمل حسن صديق ومدني الحارث وعدد من ابناء مريخ الضرب المبرح. *ولا ننسى صفقة وصفعة اسعد التوم وطارق جاديكا وعملية خلع الضفر ومن ابرز مفارقاتها ان وفد الهلال عندما دخل الى داخل نادي نيل الحصاحيصا كان اللاعب احمد عبد الله ضفر قد عبر كبري رفاعة ودخل الخرطوم عبر البطانة بالحاج يوسف وناس الهلال يشربوا في الشاي والقهوة والحاجة الباردة ومنتظرين وجبة العشاء وبعد الفراغ من وجبة العشاء كان ضفر في أمدرمان برفقة اخوان البنات العلمو الجبل الثبات. *اما حكاية بكري المدينة فلايستطيع احد ان يدعي بطولة فيها فهي عملية على مستوى عال من الدقة والكفاءة بدأها وانهاها جمال الوالي بنفسه وعندما يتعلق الامر بجمال الوالي لايستطيع أي هلالابي التصوير او الاقتراب من عملية دخل فيها والي الجمال طرفاً. *بصراحة الواحد يدو ماكلاهو عشان يكتب تفاصيل التفاصيل مع الاثارة والمغامرات التي عشناها مع الاخوة المريخاب في جنوب السودان الذين اثبتوا بأنهم مريخاب لدرجة انهم كانوا جاهزين للصدام المباشر مع أي كائن كان لاجل اعادة اللاعب شيبوب للمريخ فكان لهم مارادوا. *سيصل شيبوب الى السودان بالبر وربما يكون قد وصل فجراً عبر طائرة الخطوط الكينية او على متن الاثيوبية او عبر طائرة الخطوط الجوية الاوغندية او عبر السودانية القادمة من جدة او القطرية القادمة من الدوحة او المصرية القادمة من عاصمة المريخ جوبا المهم ياجماعة الخير عندما تشرق شمس هذا اليوم سيكون شيبوب في الخرطوم ليلحق بركب أسامة أمدوم وأسعد التوم والملك العجب سيدو وجاديكا. *لن نفصح عن أي مخطط او تكتيك الا بعد انتهاء العملية وسنقوم بتنوير جمهور المريخ بكل صغيرة او كبيرة وسنملك الشارع الرياضي الحقائق في الوقت المناسب. *باختصار سيصل شيبوب الى الخرطوم عبر شركة الوالي للطيران وبعد ما يصل الخرطوم سيركب بص الوالي وحايزور مكتب الوالي وسيقوم بالتوقيع على العقد الاحترافي امام الوالي لكن ياتو والي ولاية الله يعلم. *رئيس سودان المريخ هو والي المريخ ورئيس أمة المريخ وهو جمال التاريخ وجمال المريخ وجمل الشيل في مسيرة المريخ ومهما نظمت جماهير المريخ من مهرجانات لوالي الجمال فلن تستطيع ان توفيه حقه. *ضربهم في المدية وشيد كبري جنوب افريقيا الماخمج لهيثم طمبل وقلع بكري المدينة قلع رجالة وحمرة عين. *يا اخوانا نسينا أخونا حسن عبد السلام برضو لقن الارباب وكل الهلالاب درساً في عملية صلاح الامير وبدر الدين قلق ونور الدين عنتر سيظل خالداً في ذاكرة التاريخ. *المريخ شيد كبري جنوب افريقيا لهيثم طمبل والهلال حاول التقليد بتشييد كبري بجنوب السودان ولكنه فشل فشلا ذريعا في التقليد وأثبتت التجارب انهم لايتعلمون ولايستفيدون من الدروس والكورسات المجانية. *في عهد البرير كانت الضربة بالملك فيصل وفي عهد الارباب عنتر وصلاح الامير وقلق وفي عهد مجدي شمس الدين بأم دوم كانت الضربة مزدوجة باسامة امدوم وفي عهد طه علي البشير الضرب كان مبرحاً شيء فاروق جبرة وشيء اسعد التوم وشيء جاديكا. *اما في عهد الكاردينال وفاطمة والرشيد ولاة الأمر في الهلال فكان الضرب موجعاً ومبرحاً وأكثر ايلاماً وتوالت الصفعات بداية ببكري الفقري ومروراً بالوك وانتهاء بانتزاع واستعادة شيبوب حراق القلوب. *التاريخ في التسجيلات للمريخ والبطولات المحمولة جوا للمريخ والذي حقق الدوري من دون تعادل او هزيمة هز المريخ والذي هزم الهلال 8 مرات متتالية هو المريخ والصفوة بيشجعوا المريخ والجنوبيون بيشجعوا المريخ وناس جنوب افريقيا برضو بيشجعوا المريخ مش نحن ناس العرضة جنوب وولدنا اسمو شيبوب حراق القلوب. *شكراً سعادة اللواء مريخ حرب كمال. *كمال منو خلوهو في سركم بس احفظوا الاسم دة كويس. *عندنا دكتور الكرة السودانية كمال عبد الوهاب وعندنا دكتور الدفاعات الافريقية كمال عبد الغني وعندنا مدافعنا المعروف كمال شناق وكمال المقصود الذي وجهنا له الشكر اسمو قريب من كمال شناق عرفتوهو . * اسمو كمال شقاق وهو من رجال وابناء المريخ الذين يقتحمون العمليات في الوقت المناسب وهو رجل من قوات التدخل السريع. *شيبوب سيصل بالاثيوبية برفقة عادل ابوجريشة وربما يصل بالبر برفقة محمد المرتضى محمد احمد وربما يصل بطائرة كارغو برفقة صلاح خضر والله اعلم . * المهم هو شيبوب حراق القلوب . *في واحد أخينا قال نسافر الجنوب. *حكمة والله وحكاية تسافر وين يا أخوي. *وممكن يصل الخرطوم عن طريق هولندا او لندن . *ديل المريخاب سبب العذاب. *في زول عاقل بيمشي للاسد في عرينو انتو مجانين واللا شنو. *خليك مع أصفارك وممكن تسافر تونس عشان تتونس وتستعد مع لعيبتك لصفر دولي جديد. *عرفتو الهلال معسكر في تونس ليه عشان النجم الساحلي في طريقو المرة دي. *السنة دي المخارجة من عصراً بدري. *الصفر الدولي موديل 2016 متحمد الجماعة. عصام هجو هذا البريد الإلكتروني محمي من المتطفلين و برامج التطفل، تحتاج إلى تفعيل جافا سكريبت لتتمكن من مشاهدته
