تحدثنا في الحلقة الماضية عن البذخ في بعض الاماكن في فراش البكاء وتحدثنا عن الطيارات بتاعين الميتات كما تحدثنا عن قشرات النساء ودقات الذهب الجديدة وحنة البكاء التي يعمل لها النشادر والصبغة عشان تلحق المناسبة. هذه الحلقة تتم بناء على طلب ومساهمة بعض الاصدقاء لإلقاء الضوء على جوانب جديدة في البكيات لا تخلو من الدهشة والحيرة. تحدثت مجموعة من هؤلاء عن الجوانب الايجابية التي تعمل مثل: 1- التبسط في الاكل والشراب (فول وطعمية وفتة وموية وشاي) والخدمات يقوم بها ابناء الاسرة. 2- ختم القرآن بواسطة مجموعة او خلوة والدعاء للميت. 3- اعطاء المساكين الذين يحضرون دمورية او دبلان ومساعدات مالية. 4- عدم النواح والثكلى وكشف الرأس وذر الرماد او التراب عليه. 5- عدم الحد ولبس الخشن من الثياب (فردة فنجة او ثوب فوطة مثلا). عادات دخيلة: أ/ ظهور حانوتية يتولون الدفن زي المصريين ويمشوا ورا الجنازة ويرددوا (وحدوه. ما دايم الا وجه الله). ب/ استئجار نائحات: اهداني صديق مداوم على اليوميات مقالا اقتطف من كتاب (عجائب الخرطوم السبع) يتحدث المقال عن ظاهرة استئجار (نائحات في البكيات من بعض الاسر). يقول الكاتب في عزاء صديق له في وسط الخرطوم ظهرت امرأتان في حالة بكاء وعويل وهما تدوران حول المبنى الداخلي وبقريحته عرف انهما ليستا من اقارب المرحوم ولا من معارفه ولما اشتد به (الشمار) سأل شابا من اقارب المرحوم عن المرأتين فقال له (ديل يا عمو بكايات) يعني ببكن بالقروش، المروق بيأجرهم كل ايام المأتم والعاجز بيكتفي باليوم الاول فقط. السيناريو: تحضر النائحة الى منزل العزاء وتطلب ال ( c.v) أي السيرة الذاتية للميت من زوجته وابنته الكبرى.. 1- العمر: 70 سنة، 2- المهنة: ضابط بالمعاش وله وكالة سفر وسياحة. 3- المستوى التعليمي: دبلوم الحربية زائد بعض الكورسات في الترجمة والحاسوب. 4- اسماء الابناء: فيصل ، إحلام، رابحة، عواطف. 5- هل قام بأي عمل بطولي: نعم محاولة انقلابية فشلت في فترة الرئيس نميري. تأخذ النائحة المعلومات وتعقد اجتماعا عاجلا بزميلاتها وبعد التداول والبروفات يخرجن للملأ وهن يرددن: الليلة يا أب دقنا دايرة، وخدوداً نايرة، وقدرتا فايرة، وشيكاتاً طايرة ، قتلنا فيك الليلة دي.. يا أبو احلام.. يالشالوك للصالح العام.. وحكموا عليك بالإعدام ما دايم إلا الله .. الليلة يالسايق الكراوان، يا اب مدفعا (هاون) وينك لينا أروروووووك.. وهنا يهيج البيت ويفور بالعويل والنواح وتميل النائحة يسارا ثم تنحني ضاغطة بيدها اليسرى على انفها ثم تنظر الى ابنته الكبرى نظرة ذات فحوى ولسان حالها يقول: (لقيتيني كيف...؟!) .. وتواصل في الوصف وتعدد مآثر الفقيد.. الليلة يا الساكن ديم لطفي، اب كلمة بتشفي، يا الما متزوج عرفي، زايلة وخربانة، البجيك بتجيرو، والواقع بتشيلو، يا السايق الباجيرو، فقدتك السكرتيرة، والتربيزة المستديرة والمارسيدس الخنزيرة.. خليتنا لمنو يا خوووي يي يي إهئ.. لاحظ العربة قبل دقائق كانت كراوان. بعد ذلك تذهب النائحات الى غرفة قصية ويؤتى لهن بالأكل والبارد والساخن وعند الانتهاء من هذه المأدبة تعطي البنت الكبرى النائحات مبلغ «300.000» جنيه وتقول لهم همسا ضروري حضوركن بكرة المغرب عشان ناس السعودية والبلد جايين - كويس؟ متفرقات عن البكيات: زي ما في رجال (طيارات) يحبوا السفسفة والاكل وبتاعين ميتات قالوا في نسوان طيارات بتاعات (سفسفة) يأكلن ويشربن واذا لقن حاجة مطرفة بيشيلنها..! الضحك في بيت البكاء: - قالوا عوض دكام الله يرحمه مشى لمأتم وزير امه ماتت جابوا ليه الشاي بارد والموية سخنة طوالي قال للوزير دي خدمات بطالة very bad service تسخنوا الموية وتبردوا الشاي (كلام يا عوض دكام).. - رباطابي مروق وبحب البكيات والونسة كان مسافرا جاء لبكاء واحد قريبه لاقاه يوم الرفع نادى ود المرحوم واداه 3 مليون وقال حرم ما ترفعوا ابوكم ما كان راجل هين افرشوا 3 ايام تاني على حسابي... - جعلي اخته معرسة شايقي الوالد جاء للجعلي وقال ليه ابوي مات، الجعلي رسل لاهله وجوا كلهم، المرحوم بعد البرود (عطس)، الولد قال لي خاله ابوي حي وفرفر، الخال قال ليه: حرم بعد الجعليين ما جوا مش لو فرفر، ابوك مدفون مدفون يا اندفن انا بدله...! - واحدة بتحب البكيات واكل البكيات سمعت بي مرة ماتت في الحارة (19) قالت امشي اقيل افطر واتغدى وآكل لقيمات الصدقة وارجع، قامت راحت من بيت البكاء وصلت بعد الساعة 30:3 وهي على لحم بطنها قالت لي ناس البكاء المرحومة الله يرحمها ويغرف لها عرفوها جيعانة وغرفوا ليها الغداء طوالي.. - الرجل الحاسد كان يبكي وراء الجنازة بكاء شديدا، قالوا ليه انت ما كنت بتحب المرحوم مالك بتبكي بكاء حار كدة؟!! قال ليهم مش قالوا البكاء على الميت بيعذبه في قبره...؟!! - المرة العشمانة في الزواج لما راجلها اتوفى مرقت مع الجنازة وقدام الرجال قعدت تبكي بي صوت عالى وتقول: الليلة يا الخليتني وحيدة، في شقتي الجديدة، وسجلت لي العمارات وخليت لي الدولارات ، منو تاني البسوق العربات ومنو البجيب الايجارات، واحد من اصحاب الخيال قال ليها: «رسالتك وصلت»...! - واحد بخيل جاه واحد برد ليه قام جاه واحد قال ليه جيب 50 ألف نديها لي الزول الغسل ليك ابوك ده، البخيل عاين ليه كدة قال ليه: اصلوا غسل «BMW» . - الشافع في ركن الاطفال قالوا ليه اسمك منو قال ليهم: حمادة وبدلعوني بقولوا لي عبدالباقي. - واحد هلالابي موهوم قال اسمه الطريفي وبدلعوه بقولوا ليه صلاح ادريس. - الراجل عنده زوجتين واحدة حلوة ورشيقة والثانية شينة وسمينة نقناقة قال مرتو الحلوة ملقبه «بالدلوعة» وقالوا ليه الثانية لقبها منو قال: «البالوعة» وقال هو محتفظ بيها لي حليفة الطلاق..! خاتمة: قال رسول الله صلى الله عليه وسلم النائحة اذا لم تتب قبل موتها تُقام يوم القيامة على سربال من قطران ودرع من جرب اي يسلط على اعضاء جسمها الجرب والحكة ويُغطى جسمها بالقطران وهو ما يمسح به الابل في حالة المرض وهو اسود ورائحته كريهة وقابل للاشتعال. حمانا الله وحماكم، ابكوا ساي وامسحوا بمناديل الورق «التيشوس» واستغفروا ..
