النملة الأولى: سجمي سجمي سجمي اشان شنو بتقري في الوظائف بالخارج؟؟ النملة الثانية: انا خلاص يا بت البلد دي بقت ما بتنفع معاي.. مجتمعنا ده فيهو فئة العيش معاها صعب عدييل. النملة الأولى: انتي الظاهر مواقف كتيرة مزعلاك.. احكي لي. النملة الثانية: يا بت يوم داك بتاع عربية كبيرة فوق الشارع ضرب ليك عمود الكهرباء.. اها مش مفترض ينزل ويعتذر للناس الاتجمعت ويساهم معاهم ويشوف نتيجة عملتو.. جرى ليك بالعربية سريع سريع.. الا انا برضو بسراع اخدت ليك رقم العربية «كيتاً تكوي قلبو ومصارينو». النملة الأولى: تكوي قلبو؟؟؟ النملة الثانية: وتكوي قلب أي زول قلبو مو حار وما بهتم لمصلحة اهلو وناس بلدو النملة الأولى: يا اختي دا المزعلك كدا؟ النملة الثانية: ها والله مواقف كتيرة تسد النفس عديل.. يوم داك ماسورة مكسورة في الشارع والمكان كلو مليان مويه! اها الشباب واقفين يتفرجوا ساكت يومين، يعني منتظرين كبار السن يصلحوها ولا الحريم؟ البلد دي اذا كل زول اتعامل بحسن نية واتحمل المسؤولية كان بقت احسن بلد وكنا بقينا احسن ناس.. ربنا دا ذاتو كان فتحها علينا.. هسع الاساتذة يشيلوا ويتعبوا ويخرجوا في الاجيال اشان شنو؟؟ مش اشان المجموعة اذاً مفترض الجميع يعمل من اجل المجتمع والمجموعة.. والله العظيم والله العظيم اسلوب «وانا مالي» دا يخلينا ما تقوم لينا قايمة اصلو.. النملة الاولى: صحي والله ما كذابة. النملة الثانية: الله يجيب نتيجة اللوتري كمان ايجابية المرة دي.. النملة الاولى: عاد«(تفارق كيف تخلينا»؟ النملة الثانية: اها يا بت اها احسن الواحد يطير كدا ولا كدا ما يجيبوا لينا ضغط ولا سكري ساكت.. يا بت وحات الرسول قبال ده طالبة ثانوي مريضة اها جريت للصيدلية جبت ليها الحبوب من منطلق انهن عالم الله زي اخواتنا وحتى ضغطنا ليهن اشان مصلحتهن.. اها البنية الظاهر جاها تأنيب ضمير اعترفت لي وطلبت العفو اشان السنة الفاتت اشتكتني لي امها اها الام مشت وسافرت عديل.. دفعت ليك مبلغ خرافي للفكي اشان هلاكي.. تصدقي؟.. وانا مسكيينة.. اتراهو لي زمن اشوف ليك الصور حقت الناس رهاب رهاب.. قلت ضعف في النظر من القراية الكتيرة «لبست النضارة».. ومرات اقول عوامل ارتفاع السن.. النملة الأولى: ارتفاع السن؟ ما تقولي كده.. انتي مو فالحة ولا شنو؟ النملة الثانية: أي زول كم وتلاتين ده كبير في السن.. انتي دايره تبقي زي النسوان تغشي في الأعمار ولا شنو؟. النملة الأولى: هي يا يمه هو الغش يعني في موضوع الاعمار براهو؟ النملة الثانية: بمناسبة الغش ذكرتيني عاد.. النمشي على السوق بدور لي شوية حاجات.. يلا معاي انتي ذاتك. النملة الأولى: النودع الجماعة ديل.. أها ودعناكم لي الله.. العفو والعافية ياكم اهلنا الغبش «والضُفُر دا مو بتقلع من اللحم»..