عرفنا الشتارة في حلقة سابقة واعطينا امثلة للمواقف الحارة في حالات حدوث حوادث الحركة: هنالك جانب منهم وهو العادة السيئة المتمثلة في القطيعة في الناس والحديث عنهم من وراء ظهورهم بما لا يرضون وتأليف القصص غير الحقيقية للنيل منهم هذا الأمر وصفه القرآن الكريم بأكل لحم الأخ وهو ميت «أيحب أحدكم ان يأكل لحم أخيه وهو ميت فكرهتموه» صددق الله العظيم. موقف زول القطيعة والكلام السيئ بيكون ضعيف جداً عندما «يتزره» وينكشف أمره. 1) قطّاع جداً وقع «نبذ» شديد في صديقه اللدود وأسمه عثمان شمس الدين ? ما خلا ليه صفحة يرقد عليها امام جمع غفير من الناس وما درى ان شمس الدين يقف خلفه تماماً وهو لا يراه وسمع الشتيمة و»النبذ» بي «إضنينه» وما جابو ليه ? وعندما التفت صاحبنا القطّاع تفاجأ بعثمان شمس الدين، فقال له «عثمان شخص الدين شمسياً» ما قلتو... 2) واحد قطّاع درجة اولى ولسانه خفيف يوزع التهم يمنة ويسرة ولا ترمش له عين ? كان قاعد في حفلة «قاجة» والبنات يرقصن ? قام التفت للشخص القاعد على يمينه وقال ليه «شايف البت البترقص دي ? آي اللابسة التوب الاحمر- البت دي خفيفة وعينها طايرة» فقال له الشخص دي ما اختي!! وهنا اُسقط في يده وقال بصوت خافت «والله الايام دي انا بقيت «كضاب جنس كضب»!. نرجع لأمثلة المواقف الحارة في حالات الحوادث والخلعة واللخبطة والجهجة: 3) واحد جا في لوري من الشمالية يقال انه شايقى ? انقلب اللورى وقام صاحبنا السنجك يلملم في العمم ويلف في رأسه حتى فاقت العشر عمم فسأله الناس بعد ان تجمعوا ان شاءالله ما فقدتو شئ؟ فقال لهم ابداً بس عمتى ما لاقيها- ما قلتوا ناس عسكرية وطورية!!. 4) واحد بخاف من كلبة الجيران التي يطلق عليها اسم «نمرة» حضر صاحبنا من السفر بعد مدة وذهب للجيران لتحيتهم فوجد ان الكلبة قد وضعت اكثر من جرو، دخل منزل الجيران وهو يسير جنب الحيطة خايف من الكلبة وعندما شاهدها مع الجريوات قال لها بصوت خافت «نفسة نمرتي» فزمجرت الكلبة وهوهوت خوفاً على ابنائها وظهرت انيابها فقال لها «والله تضربيني الا اعضيك». 5) اهلنا القدام بقولوا ليك الزول ده بتكلم برا من رأسه التقول راميه جمل، طيب الزول لو وقع من جمل بيتجهجه خلى لو اتقلبت بيه عربية، الراجل بعد انقلب اللورى وشاف الجماعة ميتين وواحدين «كرعينهم» مقطوعة قام اتنفض وسلم على كل الناس الذين تجمهروا حول الحادث. 6) سائق لوري شاحن بضاعة قام ركب ركاب فوق البضاعة واحد من الركاب حظه سيئ لاقاه فرع شجرة كبيرة قطع رأسه، البوليس قبض السائق، قام السائق حلف بالطلاق ان هذا الرجل ركب معاه بشكله ده!. هدايا الحلقة: 1. صرصور بيضحك لأن الكان بيضرب فيه احوص!!. 2. غنامية بتتمكيج قدام المرايا، قالت والله حرام كل الجمال ده يروح لواحد تيس!!. 3. واحد من اهل الخيال مسخن، حضن الزير قال ليه وين يا مرطب!!. 4. واحده عانس قبلت بي واحد احدب قالوا ليها ليه رفضتي ناس كتار ورضيتي بالأحدب؟ قالت ليهم انا عايزة اعرسه ولا اسطر بيه؟!. 5. واحد صاحب خيال قال لي صاحبه «حاجة من برة خضراء ومن جوه حمراء وفيها حب اسود واول حرف فيها (ن) صاحبه قال ليه دي اوصاف بطيخة لكن (ن) دي ما عرفتها قال ليه دي نص بطيخة يا بليد!!. 6. واحد من اهل الخيال ودا ولده المستشفى الدكتور قال ليه ولدك شرب لبن مدته منتهية قال ليه تكون رضعته حبوبته!!. 7. ضب سكران قال لأصحابه انا لو ما السكر ومبارات الجكس كان بقيت تمساح!!. 8. عريس اتفق مع فنان يحي ليه الحفلة بي مليون جنيه الفنان بدأ بأغنية (مرضان باكي فاقد ثم اغنية يا حبيبي انا عيان ثم اغنية تجرحني ليه وختم بالبنسلين يا تمرجي) العريس اداه 250 جنيه وقال ليه نحن مشتركين في التأمين الصحي!!. 9. شايقي عنده فرن جاهو مسكين قال ليه لي يومين ما ضقت طعم الرغيف قال ليه ياهو طعمو ذاته ما اتغير!!. 10. شايقى ورباطابي اصحاب من زمن المدرسة اتلاقوا بعد 30 سنة الرباطابي رأسه شيب بقى قطنة، الشايقي قال ليه يا زول الحاصل ليك شنو راسك بقى ابيض كده؟ الرباطابي قال ليه قلبت هوبة في طاحونة!!. 11. سألوا حنكوشة مقدمة لمعاينة مذيعة قالوا ليها سمعتي بي رمضان زايد، قالت ليهم يعني 31 يوم صيام!!. 12. واحد من اهل الخيال اخوه سأله قال ليه تفتكر يوم الجمعة حيوافق اول الشهر ؟ قال ليه والله لو ضغطنا عليه شوية يمكن يوافق!!. 13. رباطابي شاف ليه عتود اسود واضنينه بيضاء قال العتود دا عامل زي البنطلون القالبين جيبو!!. 14. واحد بايرة عايزين يعرسوها وها هي ما مصدقة قالوا ليها العقد متين؟ قالت ليهم بعد صلاة الغداء!!. 15. مسمار عمل رجيم بقى دبوس!!. خاتمة: اللهم نجنا من الحوادث ووعثاء السفر، وهون على المسافرين مشقته واطوي عنهم بعده واحفظ بلادنا واتمم علينا السلام الذي ننشده جميعاً وطنا حدادي مدادي وما بنبنيه فرادي وطن شامخ وطن عاتي حنبنيه البنحلم بيه يوماتي مع تحياتي،،،
