٭ لأنو الموضوع دارجي اسمحوا لي الليلة اكتب بالدارجي الحقيقة جاني واحد من الناس البعرفني معرفة كويسة وكان زعلان جدا لأنو البت الهو دايرا وهي دايراو ابوها ما بارك الموضوع ، قلت ليه سبب انو ابوها رفضك شنو؟ قال لي: قال انا عمري كبير قلت ليه طيب انت عمرك كم؟ قال لي عمري تمانية وتلاتين سنة.. قلت ليه ابوها دا زول متخلف ساكت يعني كان جيتو انا الاكبر منك.. بي كثير اسوى شنو؟ لكن احتمال يكون معاه حق البت عمرها كم سنة .. قال لي البت عمرها اتنين وعشرين سنة.. قلت ليه ايوااا يعني الفرق ستاشر سنة ما مشكلة ودا ما فرق كتير عموما انت شاب كبير وهي شابة صغيرة طيب يا خي انت ما تشوف ليك واحدة قريبة ليك شوية في العمر قال ما بقدر لأنو البت دي انا دايرا وهي دايراني. قلت ليه طيب موقف بقية الاسرة كيف؟ قال: كلهم موافقين بس ابوها العامل عنكبة .. قلت ليه طيب ابوها ما اتراجع ، حتعرسا بالمحكمة ولا شنو؟! قال لي والله ما عارف لكن اي حاجة واردة. قلت ليه أنا احكي ليك اغرب من موقفك دا .. انا بعرف واحد متزوج واحدة اخت زوجتو خطبا واحد من ناس هو ما بحبهم .. قام الزول دا هدد ناس البيت بأنو لو وافقو للخطيب الجديد ده حيطلق بنتهم عشان ما يبقى عديل الخطيب الجديد..! ده وناس البيت ضربوا اخماسهم في اسداسهم وطردوا الخطيب الجديد .. عشان راجل بنتهم ما يطلق بنتهم..! قال لي: عديلو دخلو شنو؟! قلت ليه عديلو قال: الخطيب دا لو عري اخت مرتي اولاده حيبقوا اخوان اولادي اولاد خالاتم وهو ما داير ناس فلان ديل يبقو اخوان اولادو... ٭ قام على حيلو قنعان وقال لي: يا اخوي موضوعي دا كان كده مطرشق مطرشق... قلت ليه المشكلة ما موضوعك انت وبس لكن المشكلة مشكلة البنات الاهلن بطردوا الناس بي اسباب واهية .. وكل زول من اهلها داير يتحكم فيها .. وداير اشاوروه في عرسا ولو ما شاوروه بفضل زعلان ابد الدهر ولو شاوروه بيكون ما داير يعرف العريس وبس لكن داير يعرف العريس واخوان العريس واخوات العريس وكل اقاربو ومعارفو ولو فيهم واحد بس ما منضبط يقول ليك اسرة منتهية ...اوع تدوهم بتكن.. ٭ عاين لي وقال بصوت عالي وغضبان: البنات لازم يتمردن على الوضع ده ... ده استعباد والواحدة لازم يكون قرارا في يدها في يدها وبس ودور الولي في الزواج انو يعرف وبس وبعداك موافقتو وعدم موافقتو ما بتبطل العقد... ٭ الكلام الما اتقال كتير لكن ما دام الحكاية جابت ليها زعل قدر ده اخير تقيف هنا..!
