الزمن هو عمر الانسان ساعات وايام وشهور وسنين، لذا كان الرسول صلى الله عليه وسلم يوصي بالاستفادة من العمر المحدود والزمن الموقوت للاستعداد ليوم الميعاد كان هو صلى الله عليه وسلم وصحبه يحرصون على الصلاة في اوقاتها وسائر العبادات والمعاملات. ان الزمن والوقت والاجل واللحظة والساعة اسماء لها رباطها الوثيق بالانسان منذ نشأته وخروجه للدنيا الى يوم وفاته. اذاً فلابد من قياس الزمن وصحبته والاستفادة منه. يقول الاستاذ عبد الحميد محمد حمد في كتابه (الزمن في القرآن) يقف الزمن في مقدمة علامات ومعالم الحضارة الانسانية اذ هو تاريخ وميقات ووعاء يضيق ويتسع فيه عمر الفرد والجماعة والامة والبشرية باجمعها فيستوعب الاحداث ويوثق لها فينسجم مع الواقع والحاضر ويحفظ الماضي ويخطط للمستقبل وتبقى نفثات الامم تاريخاً وثقافةً وعلماً وعليه كان من المفروض ان تكون الامة الاسلامية اكثر التزاماً بالزمن وان يكون المسلم عنواناً صادقاً للاخلاق والالتزام للزمن وليس مقولة مواعيده مضبوطة زى الخواجات. الاستاذ/ كمال عبد اللطيف وزير وزارة التنمية البشرية في خطابه لاجتماع مجلس الجودة الشاملة تحدث للاجتماع بعد تأخر انعقاد الاجتماع لمدة نصف ساعة لتأخر المدعويين فقال ليس هناك جودة والناس لا تحترم الزمن لانه مقياس كل شئ واعلن ان من ضمن جائزة التميز والجودة انضباط المؤسسات من مديرها لخفيرها. في مباريات كرة القدم الزمن مهم والحكم هو المقيات الوحيد اي فريق يتأخر نصف ساعة يعتبر فاقداًً للمباراة واللاعبون الذين يأخرون الزمن بالتحايل يعطون كرتاً اصفراً وربما يطردون بالكرت الاحمر. اي زول يتأخر في السفر بالطيارة ستفوته بالتأكيد. الزمن في الشعر والغناء: 1. يازمن وقف شوية واهدي لي لحظات هنية وبعدها شيل باقي عمري شيل شبابي وشيل عنييّ (ابراهيم عوض) «المريخاب منتظرين هلال مريخ عشمانين يشيلوا الكأس» 2. من زمان انا كنت عارف الزمن لي ما بسيبك ورغم ريدي كنت حاسس اني زي الماحبيبك «هاشم ميرغني» «جماهير المريخ مع كأس الممتاز» 3. اقابلك في زمن ماشي وزمن جاي وزمن لسع اشوف الماضي فيك باكر اريت باكر يكون هسع «وردي» «جماهير الهلال متشوقة للقاء المريخ» 4. من زمن مستني عودة قلبي راحل كنت بكتب ليه بي دمي الرسائل «ابو داود» 5. بالله يا الطير المهاجر للوطن زمن الخريف طير بسراع ما تضيع زمن «وردي» «حكم كورة راجع بغير عربة» 6. لا زمني ابتسم ولا فارقت هم اصله الريد قسم مقسوم لي الم «الخالدي» «حسن محجوب يناجي في الكأس» «النصيحة ليك والله طريقة مافي» 7. يا زمن جيب كل احزانك تعال جيب المحن «الجابري» «الجماعة اذا انغلبوا في المقبرة» 8. زمني الخائن ما بدور له شهود ظلمك باين «حقيبة» «فريق مهزوم وهابط بيخاطب في حكم المباراة» 9. الزمان زمانك اهدي لي من فضلك نظرة من رمانك «حقيبة» «ده شماسي بيخاطب في فكهاني» هدايا الحلقة: 1. ايام حظر التجول وكان الحظر محدداً بالساعة 6 مساءً في نقطة تفتيش في امدرمان جاء مواطن الساعة 5:30 العسكري راح مديه طلقة الضابط قال ليه، ليه ضربت المواطن ولسه زمن الحظر متبقي له نصف ساعة قال ليه يا سعادتك انا عارف الزول دا ساكن «الجخيس» ونصف ساعة ما بتوصله!. 2. اثنين عبطة واحد قال للثاني لمن تعرس حتعرس واحدة حلوة قال ليه البت الحلوة زي كرة القدم 22 راجل جارين وراها قال ليه طيب لو بت شينة قال ليه البت الشينة زي كورة التنس كل راجل برميها للثاني. 3. في طالب بليد دخل الامتحان وهو ما قاري ولا ناقش اي حاجة ولحسن حظه الاسئلة كلها اجب بلا او نعم قام طلع شلن من جيبه بقى يرمي الطسة طرة صاح كتابة غلط انتهى في زمن وجيز وقياسي عاوز يطلع لقى لسة زمائله ما خلصوا رجع تاني طلع الشلن وعمل الطسة قال عايز يراجع الاجوبة. 4. طيارة ضمن ركابها في عدد من المجانين مرحلنهم لي مستشفى في مدينة اخرى عملوا ازعاج الطيار قال لمساعده حاول تسكتهم بعد شوية الطيار اكتشف انوا الازعاج انتهى سأل مساعده قال ليه عملت شنو؟ قال ليه فتحت ليهم الباب يلعبوا بره!. 5. الزوج سأل زوجته القروية قال ليها ان شاء الله الببغاء الذي اشتريته ليك قد اعجبك؟ قالت ليه آآي لكن طعمه في الملوخية ما حلو!. 6. اثنين فشارين قاعدين تحت جبل الاول قال للثاني شايف النملة الفي رأس الجبل الثاني قال ليه ياتا؟؟؟ 7. الشافع جا جاري لامه وقال ليها يمة اديني قروش اديها للراجل المسكين البكورك في الشارع الام فرحت لعطف ولدها وادته القروش قالت ليه الراجل بكورك بقول شنو؟ قال ليها بكورك آيسكريم.. آيسكريم!. 8. بقرة فريزيان الدكتور البيطري قال عندها جفاف عشان كدة نزلت لبن بدرة لمن حلبوها. 9. واحد سكران وقع من الدور الرابع الجماعة اتلمو فيهو سألوه الحاصل شنو؟ قال ليهم والله ما عارف انا جيت هسع دي!. 10. رباطابي راكب في البص كل ما يطلع الحقة عشان يسف في طالب بيقول ليه جيب سفة ياعم قام الرباطابي قال ليه انت بتقرأ وين ياولدي قال ليه في جامعة الجزيرة قال ليه انصحك تكمل في جامعة الفاشر!. خاتمة: اغتنم ثلاثة قبل ثلاثة (شبابك قبل هرمك، صحتك قبل سقمك وغناك قبل عدمك) دي كلها مربوطة بالزمن وخليك مع الزمن واصحى يا بريش واوعك تلعب في الزمن بدل الضائع. مع تحياتي،،،
