نحن السودانيين حبنا للرسول صلى الله عليه وسلم شديد ودون تحفظ . ادبنا ومدائحنا تغزلت في الحبيب المصطفى كثيراً: احمد يا حبيبى سلام عليك يا مسكي وطيبي سلام عليك # محمد المهدى المجذوب شدا برائعته المولد الفنان الرقم كابلى: صلي يا رب على المدثر وتجاوز عن ذنوبي واعنى يا الهي بمتاب اكبر # اولاد حاج الماحى، الشيخ البرعى، جيش من الشعراء مدحوا الرسول الكريم صلى الله عليه وسلم ووصفوه وصفاً دقيقاً، ووصفوا اصحابه وآل بيته حتى جمال السفر والطائرات والمدينة المنورة كل هذه شملها الوصف حباً في رسول الله الكريم صلى الله عليه وسلم. الجعلى قال «حرّم الرسول لو كان مات عندنا لحدى اليوم ما كنا رفعنا الفراش». # في هذه الحلقة نحتفي بمولده ونحكي هذه الحكايات: # قال العتبي: كنت جالساً عند قبر النبي صلى الله عليه وسلم فجاء اعرابي فقال السلام عليكم يا رسول الله، قال تعالى: (وما أرسلنا من رسول إلا ليطاع بإذن الله ولو أنهم إذ ظلموا أنفسهم جاؤوك فاستغفروا الله واستغفرلهم الرسول لوجدوا الله تواباً رحيما) (64) سورة النساء. وقد جئتك مستغفراً ربي ذنبي مستشفعاً بك الى ربي ثم انشد يقول: يا خير من دفنت بالقاع اعظمهُ فطاب من طيبهن القاع والأكمُ نفسي الفداء لقبر انت ساكنهُ قبة العفاف وفيه الجود والكرمُ # ثم انصرف الاعرابي فغلبني النوم فرأيت رسول الله صلى الله عليه وسلم فقال لي: «يا عتبي الحق بالاعرابي فبشره ان الله قد غفر له». # هذا الموقف له دلالات ايمانية في رحاب الحبيب المصطفى الشفيع صلى الله عليه وسلم، جاء في الحديث (من زارني بعد موتي فكأنما زارني في حياتي). وقال صلى الله عليه وسلم ايضاً «من حج ولم يزرني فقد جافاني». امدرمان والمولد زمان: الزفة: # الزفة التى تسبق المولد كانت تتكون من الموكب الرسمي للحكومة عساكر الشرطة والسواري والفرقة الموسيقية يتقدمهم المسؤول الحكومى، اما بقية الموكب يتكون من الطرق الصوفية واصحاب ا لاعمال والصنايعية، كل فئة تجهز عربة بوكس او عربة كارو وفيها مجموعة منهم يحملون شعار عملهم، النجارين مثلاً بالمناشير والشواكيش وهم يرددون (العز لمين للنجارين،) والجزارين بسكاكينهم وفراريرهم وسواطيرهم وهم يرددون (العز لمين للجزارين) وهكذا. الخيم والدكاكين وسوق الزلعة: # زمان في المولد الخيم تتكون من خيمة الحكومة وخيمة الانصار والختمية، والطرق الصوفية المختلفة ويتوسط المولد الصاري بلمبات من النايلون البيضاء والملونة ودكاكين الحلاوة تحيط بالسور من الداخل والخارج وهى ما كانت تجذبنا كأطفال، اما خارج سور المولد كان هنالك عالم آخر ترابيز الطعام تباع فيها اشياء كثيرة فول وطعمية وسلطة الروب وابو دمام بالشطة وتحلية اسمهما البالوظة شبيهة بالجلى الوانها حمراء وصفراء وخضراء، وكذلك فول الحاجات والترمس والكبكبي وهذا السوق الخلفى يسمى (سوق الزلعة) الغربية. سوق الزلعة شاهدته في اكثر من مدينة خصوصاً مدينة ود مدني وترافقه ترابيز العاب زي لعبة لبس تكسب او الكشكوش. رجالة ودغالة: # في مولد امدرمان كل اولاد حلة بيمشوا مع بعض وفي كثير من الاحيان تحصل تحديات بين الجماعات وتحرشات (ودشمان) وخبت بين اولاد الاحياء، جنس بساطين وعكاكيز وسيطان تدي ربك العجب ، يعني يا تبقى شكال يا تبقى جراي.(هاك كاكي والميدالية الذهبية دي). كما كانت هناك اصطدامات بين البوليس والاحزاب المعارضة. # وفي حادثة المولد الشهيرة اصطدم رجال البوليس مع مجموعة معارضة في المولد في امدرمان وتم فيها اطلاق نار ومات من مات. في اليوم الثاني للحادث ضربت لمبة نيون في المولد وأحدثت صوتاً مثل صوت الطلقة، وفي ثوانٍ كان المولد فاضيا تماماً «صحي الروح حلوة»..!! # الآن بعد اتساع امدرمان صار في كل محلية مولد يعنى الثورة مولدها في الحارة الثامنة، وهناك مولد امبدة، وسامع تحت تحت انه الانصار قالوا ما عايزين مولد في بيت الخليفة. هدايا الحلقة: 1/ واحد نخناخ وقع في بير بقى يكورك علشان واحد يطلعه جاء واحد نخناخ قال ليه «اطنعك» قال ليه ايوه «طنعني» قال ليه بتحاكيني طيب شوف ليك واحد «يطنعك»!. 2/ واحد من اصحاب الخيال قاعد في الشمس مع دودة سألوه ليه قال ليهم الدكتور نصحنى اقعد تحت الشمس دقائق معدودة!. 3/ واحد متشاكل مع زوجته، وكانوا مارين بالسيارة على مزرعة ابقار قال ليها «ديل قرايبك» قالت ليه ايوه اهل راجلى!. 4/ واحدة حنكوشة مشت الحج لقت زحمة شديدة حول الحرم قالت ليهم ياي مافي فرع تانى!؟ 5/ عسكرى من اهل الخيال كلما يدخل المطبخ يضرب تعظيم للثلاجة لانها ماركة «جنرال»!. 6/ واحد من اهل الخيال كان بردان جداً قام شغل الدفاية ارتاح شوية وقال ربنا ما يحرمنا منك لا في الدنيا ولا في الآخرة. 7/ الشافعة قالت لامها ماما انتى ابوي بعرف يعوم؟ قالت ليها ليه يا حبيبتي؟ قالت ليها اصلى سمعته بقول للشغالة انا غرقان في حبك...!. 8/ جعلى بيدعو ربنا يديه ولد بعد 15 سنة اكتشف انه ما متزوج!. 9/ واحد وولده من أكلة لحوم البشر شافوا هيفاء وهبي في الغابة الولد قال لابوه نوديها البيت وناكلها، ابوه قال ليه ناخدها البيت وناكل امك!. 10/ واحد قالوا ليه لو امك هيفاء وهبي حتعمل شنو؟ قال ليهم ما حأخليها تفطمنى!. 11/ شافعة رباطابية قاعدة تاكل مع ابوها في الصينية قالت ليه بابا اديني عيشة. ابوها حب يشاغلها قال ليها بتدوري بيها شنو؟ قالت ليه بدو ارضعها!. 12/ رباطابي في عازومة لاحظ انه في زول نائم نوم عميق جداً بس في لحظة ختوا صينية الاكل تترب صحى وبدا (يلهط). الرباطابي قال ليهم انتو زولكم دا كنتوا خاتينو في الشاحن؟!. 13/ واحد بلدياتنا ختوه على جهاز كشف الكذب، وقالوا ليه لو كذبت اللمبة حتولع.. فهمت؟ قال ليهم فهمت اللمبة ولعت!. خاتمة: # يا حبيبنا يا رسول الله نحن بنحبك يا رسول الله. وكل عام وانتم بخير. تنويه من الشفت: # ارجو ان اعلن بكل شفافية ان مطعم سما الموجود بشارع الوادي بالحارة الثالثة لا صلة لي به (بس جاري من الناحية الشمالية) واقول لمروجي الاشاعة ان كان ملكي فسأعلن الاكل والاستضافة مجاناً. مع تحياتي،،،
