يعد الأستاذ محمد نور الوسيلة بابكر رئيس إتحاد أصحاب مدارس تعليم قيادة السيارات من الرواد في مجال تعليم قيادة السيارات في السودان،قام قبل سنوات طويلة بنقل تجربة التعليم النظري من السعودية الى السودان، وقدم فائدة كبيرة لسائقي السيارات من الهواة والمحترفين، والوسيلة من مواليد منطقة الجيلي ،نشأ فيها ،ودرس بها المرحله الإبتدائيه ودرس ايضا بالاهليه الخرطوم وأكمل مرحله الوسطى (سابقاً) 1965،بعدها إنتقل الى المعهد الفني (الميكانيكا ) وتخرج عام 1969م نلتقيه اليوم لنتعرف على دور مدارس السيارات في الحد من او تقليل الحوادث المرورية التي انتشرت وزادت نسبتها في الفترة الاخيرة . *ليه اخترت دراسة الميكانيكا ؟ * وجدت مجال الميكانيكا واسعاً ودرست أيضاً في الكليه المهنيه العُليا ،لكنني لسوء الحظ لم أكملها ،لظروف خاصه ،لدخولي في عمل تعليم قيادة السيارات ومشغولياته وبسببه لم أكمل السنه الثالثه والرابعة ،وكان من المفترض ان انال البكالريوس.. *بدايتك في مجال تعليم قيادة السيارات ؟ * كانت في السبعينيات ،لكن هاجرت إلى نفس المجال الى ليبيا من 1975الى نهايه 1979م في المنطقه الجنوبيه في ليبيا تحديداً ومنها من عام 1980الى 1984 الى المملكه العربيه السعوديه في شركه إسمها دله مختصه في تعليم قيادة السيارات ،ووصلت فيها الى المشرف العام لمؤسسه دله ،واستفدت من دله كثيراً.. * جيت من السعوديه بي أفكار مختلفة ماهو الجديد الذي ادخلته للسودان ؟ * انا أول شخص نقلت الفكرة بكل حذافيرها من دله للسودان وكيفيه عمل تعليم قياده السيارات عام 1984م وأنا اول شخص يدرس الجانب النظري بصوره علميه وادرس المواد الاخرى من السواقه الوقائيه والاعطال والصيانه والميكانيكا وإشارات المرور وقانون المرور ،وحقيقه زمان كان ناس المرور يستغربون في تدريسي للنظري وليه اتعب وكان هنالك استهجان شديد من قادة المرور وليه اتعب نفسي بي محاضرات وكنت شغال بالطبشيره ما كان في بروجكتر ولا لابتوب ولا كمبيوتر ، وانا هسه أكتر الناس فرحاً لانو الناس إلتفتت لقيمه الدراسه النظريه ،وحسيت انو رسالتي بدأت تصل للناس وللعامة وللخاصه وحتى إدارات المرور في الآونه الاّخيره عرفوا أهميه الجانب النظري للسائق . *حدثنا عن شعبة المدارس ومتى تأسست ؟ -هي زمان كان إسمها إتحاد أصحاب مدارس تعليم قيادة السيارات ،وحقيقه الفضل من بعدالله لأخينا وعمنا في اّنِ واحد وبالنسبه ليا الاخ الأكبر والرجل العصامي الذي يقهر المستحيل المغفور له بإذن الله تعالى المرحوم عبد الغني الحاج ،وهو أول من فكر وبدأ تنظيم قيادة السيارات ،وهو الذي أسس الإتحاد وكان أول رئيس للإتحاد ، وانا لما جئت دخلت الإتحاد عبد الغني كان رئيسه ومروراً بي بحيري وعلي الكدرو أو عبد الله عبد الرحمن المفتش وحسن يونس رحمه الله عليهم وخالد عباس وديل كلهم كانوا قدامى ،وانا إتعلمت الشغل ده وكنت سكرتير ،وكان ذلك عام 1970م وكانت بدايته الحقيقية ،ونحن جينا حملنا الرايه ،واصبحت الدوله تهتم بقطاع الحرفيين والمهنيين .. *هل هنالك صعوبات تواجهكم ؟ * نحن أملنا في الله اول ثم في الدوله بعد ذلك في اشياء بسيطه تزيل لينا الصعوبات ،كقطاع هام وعمله يهم المواطن في حاجات بسيطه يحاولوا يساعدونا بيها ،في الاراضي والميادين ،في الضرائب ،في أشياء كثيره ،ونحن بنعتبر أنفسنا اصحاب رساله نحو المواطن ولنا شعار رفعناهو هو نصل الى طرق بلا دماء . * ماهي أهمية شعبة المدارس ؟ * الشعبه هي حلقة الوصل بين الإدارة العامه للمرور والمواطن من جهه وحلقة وصل بين المرور وأعضاء الشعبة ،الحقيقه ولابد ان نقولها وجدنا كل التعاون مع إدارات المرور المختلفه والاحترام المتبادل ،وهم بعتبرونا الساعد الايمن لهم ،ولم يبخلوا علينا بأي مساعدة،وأزالوا عننا كل الصعاب .. *وماذا تقول عن المدارس غير المنضمة لشعبة المدارس ؟ * طبعاً دي سنه الحياة ولا يمكن ان يكون كل الناس سوا ، وفي اي زمان واي مكان بكون في النوعيه الما بتكون مع المجموعة ،ونحن هسه الأغلبيه وعندنا حوالي 53 مدرسه منضمه للإتحاد وحوالي اربع مدارس هي ما عندها الرغبه تنضم للشعبة ونحن بنحاول معاهم ونسعى سعياً حثيثاً لضمهم مهما يكن الامر ،واتمنى ان يفكروا تفكيراً جاداً ويكونوا مع أخوانهم ،وكما قال الرسول صل« الله عليه وسلم :انا يأكل الذئب من الغنم القاصيه، يعني المنفره ، وربنا قال(وإعتصموا بحبل الله جميعاً ولا تفرقوا) والناس كلها لما تكون مع بعض بتقدر تناقش وتحل كل قضاياها ،ومن هذا المنبر بناشد الأخوان الغير منضمين للشعبه ان ينضموا لينا ونحن على أتم الإستعداد للترحيب بيهم .. *هل المدارس الموجودة والمصدقة تقوم بالدور الكامل للتوعية المرورية ؟ * طبعاً وده عملها وشغلها والتوعيه المروريه جزء من عملهم وشئ من اهداف المدارس والطالب البيتعلم القيادة لازم تدرسوا علامات المرور والإشارات،التجاوز والقيادة الليليه ،والاعطال وقانون المرور ، والصيانه (اليوميه والإسبوعيه ) والإسعافات الأوليه لابد منها ،ويجب ان يلم طالب القيادة بكل هذه الأشياء . *وماذا عن إهمالكم للإتحاد أوالشعبة في الفترة السابقة ؟ * نحن ماأهملناهو ،لكن نحن جينا في فترة ولقينا الناس الكبار ربنا يرحمهم ويغفر ليهم ،ماسكين الإتحاد،و أبناؤهم حملوا الرايه من بعدهم ولكن ماكانوا مهتمين بيهو شديد ومافاهمين الشغل كويس ،جاني الراحل صالح عبد المجيد رحمه الله عليه وجلس معاي وبدأ يتناقش معاي ،وقال ليا نرجع روح الإتحاد ده تاني ونبذل قصارى جهدنا ونجمع الناس ونحل قضايا بعض المدارس ونمارس نشاطنا وان لا يتوقف ،وهذا الكلام بث الروح فينا من جديد .. *وماذا عن الجمعية العمومية المرتقبة ؟ * من المفترض ان تكون الجمعية العموميه قبل اكثر من سنه الحقيقة لما إتصلنا بمسجل تنظيمات العمل كانت لهم رؤيه ،بحكم الدستور الإنتقالي لعام 2005م ،اذا حصل انفصال او وحده ،بكون في قانون جديد ،واعتبر هذه الفترة هي تمهيديه ،اما نحن في القريب العاجل انشاء الله ح نعمل الجمعيه العموميه للشعبه وح ندعو مسجل تنظيمات العمل والضباط الثلاثه لمسجل التنظيمات ،و نسأل الله تعالى التوفيق للجمعيه العموميه القادمه وان تختار الرجل القوي المناسب الامين الذي يؤدي العمل المطلوب . *هل سوف تترشح مرة اخرى لرئاسة الشعبة ؟ * والله أتمنى ان يترشحوا الشباب ونحن قاعدين وح نساعدهم ،وانا مابقدر اقول ليك سوف اترشح والقاعدة هي التي تحدد وتحسم عمليه الإختيار * وماذا عن علاقتكم بالإدارة العامة للمرور ؟ * نحن نكمل بعضنا البعض ،وهي الجهه المشرفه علينا والمخططه لينا ،علاقتنا مع المرور علاقه وطيدة ويسودها كل الإحترام المتبادل بالرغم من بعض الهفوات من البعض الا انها ليست حكماً للأغلبيه وعلاقتنا معهم مستمرة ولن تنقطع وحتى علاقتنا مع رجالات المرور إمتدت على مستوى الاسره وبرسلوهم لينا نعلمهم القيادة وناس المرور واثقين فينا ومن شغلنا وماشايف في ثقة أكتر من كده ! ونحن والمرور يد واحده من أجل سلامه المواطن ونحن نتمى ان تكون العلاقه للمستقبل أكبر في وضع المناهج والإمتحانات وحتى في الفترة الزمنية للإمتحان نتداولها لنصل لحل يكون أفيد . *وماذا عن التنسيق بينكم والمرور ؟ * تناقشنا مع سعادة اللواء عابدين الطاهر في كثير من الامور وهو رجل من أكفأ ضباط الشرطة وخلى بصمات واضحة ،ومن سوء حظنا كانت دورتنا في آخر ايامه ،وكنا نتمنى ان نكون في تقارب من وقت قديم وكانت هنالك اياد تقف بينا وبينه ، وربنا سبحانه وتعالى ازال هذه الايادي ، وتفهم نحن شنو وقضيتنا شنو ؟ وقام بالدور الفعال وعابدين نظم الشغل . * والمدير الجديد للمرور ؟ * سعادة اللواء عبد الرحمن (حطبة) جلسنا معه وتناقش معنا وتجاوب معنا ونحن في تنسيق دائماً معهم .. *هل انتم كشعبة ملتزمون بالقرارات الاخيرة والواجبات التي طلبتها الإدارة العامة للمرور في الجانب النظري؟ * كانت لنا رؤية بان الجانب النظري حقنا نحن وفي البدايه الإدارة العامه للمرور كانوا خائفين وانا كنت متحديهم ، ونحن مؤهلين وناس عندنا خبره تراكميه ونحن اليوم عندنا أكثر من 14 مركز في توزيع جغرافي في الخرطوم (الشجرة والمقرن والساحة الخضراء ،والخرطوم بحري في المنطقة الصناعية ، شارع المعونه ،شارع المرغنيه ،في المهندسين ،شارع الاربعين ،بيت المال ،الهجرة غرب المغتربين ) وهنالك كثير من المراكز الآن جاهزة. * قرار المحكمة العليا بإغلاق الأكاديمية وفض الشراكة مع وزارة الداخلية ؟ * الحقيقة لما جاء الجسم الغريب (الأكاديمية ) وجدناهو محمي من الجهة التي من المفترض ان تكون بعيدة عنه هي العامله ليهو الحمايه ،إتصلنا بي مستشارنا القانوني :الاستاذ الضليع غازي سليمان ،هو في البدايه استغرب واندهش وقال كيف وزارة الداخليه تحتكر العمل بتاعكم ؟هو قام بكل الإجراءات اللازمه بإسم الشعبه وكان بتاريخ 29/6/2011م حكمت المحكمة بي فض الشراكة بين وزارة الداخليه وشركة رأس الخيمة ،ووجهوا خطاباً بفض الشراكة ،وفي يوم 13/7/2011م تقدمت وزارة الداخليه وللأسف الشديد بإستئناف مازال والى تاريخ اليوم أمام المحكمة الموقره ولم نستلم القرار النهائي .. * حلولكم شنو ضد الاحتكارية ؟ * الإسلام نهى عن الاحتكار ، نحن نرفض الإحتكاريه وخاصه في عملنا ووالله لن نترك حاجه إسمها الإحتكاريه والقانون كفيل ،وأثبت القضاء السوداني نزاهته انه يقف مع المظلوم ويقيف مع الحق والدليل على ذلك اننا إشتكينا وزارة الداخليه وكسبنا القضيه نحن كمواطنين بسطاء وهذه مفخرة للقضاء السوداني وقضاؤنا السوداني قضاء مستقل ومنصف .. *وماذا عن الأكاديمية ؟ * لم تأتِ بي جديد وحتى الدخلتو الأكاديمية نحن أفضل منها بمائه مره ، وأضرب ليك مثل عبدالغني الحاج له الرحمه جاب السلوميتر من الثمانينيات والى الآن عندنا صور منو ،والحاجه الجابتها جديده هي إلزام الناس بالدراسه يعني يلزموك لازم تمشي الأكاديميه الزامية غصباً عنك تمشي ونحن الإحتكاريه دي بنحاربها وهم ليس لهم خبره أفضل مننا .. {وماهو رأيك في فترة القيد الزمني للرخصة الثلاثة شهور ؟ * حقيقة تحدثنا مع سعادة اللواء عابدين الطاهر وتناقشنا في الثلاثة شهور ،الثلاثة شهور دي فيها نكته ،مره نحن قاعدين في مواطن جه شايل الإستمارة وعايز يمتحن الضابط قال ليهو تقعد ثلاثة شهور حتى تجينا ،المواطن قال ليهو انا عندي ظروف وعندي ايتام في البيت وعندي امجاد بسترزق منها وانا كل ما امشي بقطعوني إيصال وانا عايز بي اي طريقة اطلع الرخصه عشان يكون في امان والمواطن من الحرقة قعد يبكي ،وبقينا نسكت فيهو يازول مالك ،الضابط قال ليهو والله ده قانون وماعاملنو نحن والقانون ده من المجلس التشريعي ،وقانون مجاز من المجلس الوطني ،لكن هذا القانون فيهو اخطاء ويجب ان تعالج ،وانا شايف الثلاثة شهور كتيره وهذا القانون فيه إجحاف للمواطن ونناشد السادة أعضاء المجلس لتعديلها وانا أرى الحد الأقصى لها 3 اسابيع .. *ماهو رأيك في تصريحات الناطق الرسمي للإتحاد المستقيل بحيري للصحف عن اسباب إستقالته ؟ * صحيح أن والده من الرعيل الأول وعاصرناه ولكن إبنه ذكر في الصحف وخاصه فيما يتعلق بأسباب إستقالته اشياء غير حقيقية . كلمه أخيره ؟ * بوجها للإخوة السائقين والمواطنين الكرام بقول ليهم الحادث بيحصل في كسر من الثانية وليس له زمان ولا مكان والحادث يمكن ان تكون انت ضحيته الاولى كان انت ولا المواطن ويحدث نتيجة خطأ بسيط ،انا اوجه رساله واقول ليهم عليكم الإلتزام بقواعد السير الصحيح عشان تكون طرقنا بلا دماء وشكراً جزيلا لأسره الصحافة وليك انت على هذا الحوار.
