أولاد الأصل نحن السودانيين ماناس دهنسات وكلامنا ناشف وشين لا فينا البخون لا فينا اب وشين وكان عاشرتنا سمحين و نملا العين *** سلفاكير جبان مادايرة ليها اتنين خاين للعهود معدوم فهم مسكين قال داير حرب حاربنا لينا سنين وقال داير انفصال قلنالو في ستين *** أديناك بلد والله خاتي القول كان درت الزرع مليان سهول وحقول وكان درت الروا الموية شاقة سيول وفوقن عن ده كلو كمان معاو بترول *** مالك تاني قايم للحرب بتفتّش ياخ شوف ناس بلادك في الفتات بتهبّش شعبك ياخ فقير أشعث عديم و مغبّش شوف الليلة كم خسران و حسب و نبّش *** ويا الجيش مابراك الليلة في الميدان ناس اتوحدت مازي زمان كيمان في وش العدو الليلة نحن اخوان وكان قرّبت تاني تطردك النسوان *** واختم قولي ليك باشكر ليك يا «سلفا» شان بي غلطتك بقيتنا حلفاً واحد من خلف البشير واقفين جميعاً صفّا صفّاً مستقيم لافي زقاق لا لفّة