# نسبة لما يجرى في العالم من أزمة اقتصادية أصبح على إثرها الاقتصاد الرأسمالي مهدداً بالانهيار خصوصاً الاقتصاد الأمريكي الذي يتعامل بالربا ومحلياً بوادر مشكلة اقتصادية خلقها تجار العملة وإيقاف البترول وعائداته والتوسع في الاستيراد البزخى مما أحدث كبسيبة ودفسيبة كبيرة. طالبنا الكثيرون بالتطوع لشرح معنى الكبسيبة والدفسيبة والرفسيبة، حول هذا الموضوع انعقدت ورشة عمل بمعهد (استراتيجيات الشفتنة) في الشرق الأوسط لتحليل هذا الأمر حيث قدم البروف (تفتيحة) ورقة عن الكبسيبة وعلاقتها بالنظام العالمي الجديد في ظل العرقية، والأستاذ (كلتشان) ورقة إضافية عن الدفسيبة بعنوان (الرزق ابنص والدفسة في شارع النص) أما العالم الجليل (دونكشوت) فقد قدم ورقة عن الدفسيبة بعنوان (الأمريكان ورفسة الحصان). # وبعد جلسات التداول خرجت الورشة بالتعريفات والتحليلات والتوجيهات التالية: 1) الكبسة: ويقصد بها الأشياء المليانة شديد، مقفولة وعصية الفتح «وكبسا لكم المسرح كبسا» والكبسة عند حبوباتنا توقع لأحداث غير سارة أو تشاؤم زي كبسة النفساء و»بت الطهور»، والكبسة يقصد بها الأكلة الشعبية الخليجية وهي شبيهة بالبوش عندنا ويقولوا فلان كابس من فلان يعنى زعلان منه شديد و»محبك»، ومعروف أن السنة الكبيسة 366 يوم والسنة البسيطة 365 يوم والسنة الكبيسة تأتى كل أربعة أعوام والشخص الكبسة هو الشخص النحس الذي يتشاءم الناس منه واعتقد أن «أبو كباس» اشتق من هذه الكلمة لأن أبو كباس هو حلم مزري ومخيف يكبس على الشخص ويقوم مذعوراً منه «ومناهد» والمكنيكية يقولوا ليك يدخل كبس معناها بصعوبة والكبسة قد تكون مداهمة البوليس أو رجال الأمن لجهات خارجة عن القانون بالبلدي «كشة» اقتصادياً ممكن نقول البنوك وبنك السودان عملوا كبسة على التجار وطالبوهم بالسداد. 2- الدفسة: ويقصد بها الزحام الشديد وغير المنظم ومدفوس لي عينه معناها إلى آخره، ودفس بطنه يقصد بها الشخص الذي ملأ بطنه بأكل كثير حتى تضايق، وهواة الدفسة هم الذين أطلقوا شعار «الزحمة فيها الرحمة» وهم معجبون بأغنية الكاشف صابحنى دايماً وابتسم وحولوها إلى «دافسني دايماً وابتسم» هناك أشخاص كانت عندهم مقدرة على المدافسة والمنافسة والقدرة على أخذ التسهيلات بضمانات وهمية. 3- الرفسة: وهي عبارة عن ضربة الحصان او الحمار او الجمل او الزراف او اى حيوان بأرجله الخلفية، الإنسان كذلك يدخل في موضوع الرفسة اذا استعمل إحدى رجليه «الكيك بوكشنج» ومعناها الملاكمة بالرفس. والبنطون الذي يعمل بماكينة ترفس الماء يسمى «الرفاس» رافسنجاني الإيراني رفس الأمريكان وعمل ضد سياستهم وأعلن عن تخصيب إيران لليورانيوم وامتلاك القنبلة الذرية، وفي حقيقة الأمريكان اسمه «رفسا جاني يا الامريكاني». # الراجل حماره رفس المرة كتلها عرس واحدة تانية برضو الحمار رفسها «قرضها» الثالثة الحمار رفسها «لحقا أمات طه» الجماعة يجوا يشيلوا معاهو الفاتحة وهو «يلوح» في رأسه علامة النفي، صاحبه سأله قال ليه بتلوح راسك مالك مع ناس الفاتحة؟ قال ليه كلهم دايرين يشتروا الحمار وأنا بقول ليهم براسى لا! واحد سأله قال ليه انتو النسوان البموتوا ديل بتلقوهم وين؟. الورشة توصلت للآتي: 1- ان الرابط بين الكبسة والرفسة والدفسة هى «الزنقة والمضايقة» التى تحدث للشخص المكبوس او المدفوس او المرفوس (الزومى مضايقى يا سيدي علي). 2- الثلاثة كلمات تنتهي بقافية واحدة وهى السين والتاء المربوطة. 3- الكبسة والدفسة معناها الشئ المليان: ناس او عربات او أكل والحمار عندما يرفس يكون مليان غيظ. 4- كلهم يلتقون في عنصر المفاجأة مثلاً كبسة البوليس تأتى مفاجأة دون إخطار والحصان يفاجئ ضحيته بالرفسة على غفلة والدفسة تجد نفسك مورط فيها دون إرادة وكذلك في كبسة الطعام تاكل وتاكل حتى تتضايق في التنفس. ضاقت ولما استحكمت حلقاتها فرجت وكنت اظنها لا تفرج. هدايا الحلقة: 1- حنكوش لقى مكتوب في حيطتهم طظ في الحناكيش مشى لى جيرانهم سألهم انا عايز اعرف مين كتب على الحيطة طظ في الحناكيش؟ رد عليه واحد عضلاته «تبش» قال ليه دا انا في حاجة؟ قال ليه لا كنت عايز أقول ليك خطك حلو!. 2- واحدة قاعدة تبكي خطيبها سألها بتبكي مالك قالت ليه شفته في منامي أمير وسيم بحصان ابيض خطفني منك «وكتلك» قال ليها دا حلم ساكت قال ليه دا المبكيني!. 3- بمناسبة الأخوان والسلفيين في مصر واحد سأل واحد معاك 10 جنيه سلف؟ قال ليه لأ معاي خمسة أخوان!. 4- واحد أهبل خطف واحدة هبلة ماشين بالعربية قعدت تكورك قال ليها تسكتي ولا أنزلك قالت ليه خلاص سكته!. 5- ديك وفرخة مشوا سوبر ماركت اشتروا بيض الراجل قاليهم انتو «ما بتبيضوا» الفرخة اتكسفت ودورت وشها الديك قال ليه نحن مخطوبين لسه ما عملنا العرس!. 6- عجوز قال لصاحبه خلاص عجزنا رد عليه ياخي انت شباب قال ليه حأديك خمسة جنيه لو قلت الكلام دا قدام مرتي قال ليه خليهم 10 جنيه وأنا أطلعك «شافع»!. 7- واحد من أصحاب الخيال مشى يشترى «ساعة» لقاها غالية اشترى «5 دقائق»!. 8- واحد عمره 90 سنة مشى يأمن على حياته موظف التأمين قال ليه انت كبير وشايب ما بنقدر نأمن عليك قال ليه امبارح أبوي امن على حياته ولم يرفضوا ليه، قال ليه خلاص تعال بكرة نشوف ليك حل قال ليه بكرة ماشي احضر زواج جدي قال ليه جدك لسه عايش وعايز يعرس قال ليه بصراحة هو ماكان داير يعرس بس أمه وأبوه ضغطوا عليه!. 9- شايقي اشترى شاي الغزالتين وبحب الشاي تقيل مرته عملت ليه الشاي خفيف قال ليها دا شنو انتي عملتي غزالة واحدة ولا شنو؟!. 10- الراجل ساق مرته سعد قشرة عشان تشترى شبشب البائع أداها شبشب كعب عالي الراجل قال ليه أديها شبشب واطي قال ليه خليها تختار إنت الحتلبسوا؟ قال ليه ما بخليها إنت الحتنضرب بيه؟!. خاتمة: # اقتصادياً ممكن نقول إن الكبسة والدفسة والرفسة التي حدثت لإقتصادنا كانت غفلة إذ أننا تركنا الزراعة ومنتجات الصادر واعتمدنا على البترول - الزراعة متمثلة في القطن والمواشي والسمسم والجلود والزيوت والذهب مطلوبة في كل أنحاء العالم وبعملة صعبة ياريت نتعلم من تجاربنا.
