كورة: الضجة التسجيلات وظهور اسماء اجانب جدد شن سو الفائتين وماذا اضافوا للكرة السودانية.. حرام هيثم يسافر من الهلال من غير ميعاد مفروض يحترموا تاريخه في الهلال وكان يودع بصورة اجمل.. ما شايف اجانب فيهم فائدة للكرة السودانية لكن نقول شنو ديل السماسرة.. واللاعب السوداني اجدر. رحيل وتكريم وتواصل: رحلت من توشحت بالعلم حواء الطقطاقة بعد أن تركت سيرة ومسيرة واغنيات وقد بكاها الشعب السوداني لانها صاحبة بصمة وتواصلت سوداتل مع مبدعة اخرى من بلادي عادت بعد رحلة علاجية من الاردن فائزة عمسيب قالت ديل اهلي وفعلا اثبت دكتور هاشم البدري بسوداتل انو اهلنا من المبدعين كتار ولمسة وفاء كانت رائعة. لمة ناس الدامر: من زواج بنت اخينا وصديقنا عمر روكة بالمايقوما تولدت فكرة لقاء تفاكر لابناء الدامر للوقوف عند نداء المدينة وتقديم الدين علينا وجاءت الدعوة من اللواء مدني الحارث بحي ساريا السكني وجاء ناس الدامر يتقدمهم العمدة الحاج علي صالح حبيب الله والدكتور احمد بابكر الطاهر واللواء الدكتور عبد القادر احمد ناصر والدكتور يونس عبد الله مختار، وناس كتار جوا من كل حتة من الدامر عمر كليب ومن جياد اولاد شاروقة وعبد الخالق مجذوب عبد الوهاب.. وناس احمد سعيد سيد احمد وشنقل الفنان.. وناس مارسات محمد علي عبد الماجد واخوة عثمان وكان لقاء عن ارض الحضارات وعن الدامر انسان وابداع وكونا لجنة للمتابعة للقناة الفضائية الوليد وهي مساهمة بين الولاية وناس مارسات ويا نهر النيل بقت عندك قناة يا سلام ابراهيم علي ساعد والنصير ومعتصم الحاج ومدني الحارث وامير صالح جبريل ويوسف حسن النعيم ،فقد كانت ونسة بطعم الدامر وألق الدامر وشكراً مدني على المطائب... ومبروك ناس الدامر حولية الشيخ محمد المجذوب بن قمر الدين السنوية. تخريمة: تعجبني نكات احمد دولة في «الصحافة» وهاك دي: واحد من ناس المزاج العالي ابوه مات اولاد عمه اكلوا الكشف لامن امه ماتت جاب ناس الهدف يمسكوا الكشف. وجمعة سعيدة
