٭ المأكولات الجاهزة اصبحت ظاهرة العصر، اغلب الناس يتناولون وجبتي الافطار والعشاء كوجبات جاهزة: فول، بوش، والمروقين: سمك، بيض «تمر هندي».. الخ. ٭ الجديد ان وجبات الغداء التي كانت تعملها ربات البيوت اصبحت الآن من الممكن طلبها او شراؤها وتسمى Take Away بمعنى شيلها اكلها بعيد وما عندنا ليك محل تقعد فيه، اما النوع الثاني فهو طلب الاكل بالتلفون وارساله بواسطة الموترجي وتسمى هذه الخدمة «دليفري» Delivery يعني توصيلة حتى باب البيت. هذه الخدمة الاخيرة انتشرت انتشارا كبيرا وسريعا في العاصمة. في القاهرة يعطونك كروت الدعاية بي تلفوناتها وشملت الخدمة حتى الاجزخانات ومحلات السوبر ماركت، كمان يجيبوا ليك فكة باقي العملة ولو عاوز تبدل دولار برضو ممكن. ٭ ما لفت نظري في الزيارة الخاطفة التي قمت بها الى القاهرة في الايام القليلة الفائتة، ان هذه الخدمة اي خدمة «الدليفري» شملت الاكلات السودانية: اي نوع من الاكلات السودانية يمكن ان يصلك بالتلفون مثل ملاح ام رقيقة، «ملاح ورق» بامية مفروكة، طبائخ، زائد الكسرة طبعا. ٭ ميزة هذه الخدمة انها الغت قصة بيضبح الشائل وسهلت وصية اجدادنا بتاعت «ضيف الهجوع عشو» بي قلب قوي ممكن تعزم اي عدد في اقرب وقت للوجبة. هذا النهج الجديد طبعا يوافق بناتنا الحناكيش اللاتي يتخوفن من قصة «الدوكة» والصاج والطاووق الذي يمسح به الصاج حتى يسخن وتطلع الكسرة بسهولة وناضجة «هاك الكوجين ده». هدايا الحلقة: 1 الزوج اتصل بزوجته من الشغل بالتلفون وقال ليها: انا جاي البيت سخني الموية بسرعة. وقفل التلفون. زميله في الشغل قال ليه دي الرجالة ولا بلاش شايفك متشخصن على الولية. رد عليه: يعني دايرني اغسل العدة بي موية باردة. 2 طبيب الاسنان قال للمريض: انت مالك بتكورك وتتجرس انا لسه ما جيت لي ضرسك. قال ليه: عارف لكن انت واقف علي اصبع رجلي. 3 القاضي قال للمتهم: حكمنا ببراءتك لعدم كفاية الادلة، المتهم: وانا متأسف لاني تعبتكم بدون فائدة. 4 القاضي قال للمتهم: هل انت معترف انك دخلت البيت في منتصف الليل؟ المتهم: ايوه يا حضرة القاضي قايلو بيتنا. القاضي: طيب له ادسيت تحت السرير لما شفت ست البيت جاية عليك؟ المتهم: افتكرتها مرتي! 5 واحد اصلع كل مشكلته انه مش عارف يعبر عن شعوره. 6 في واحد وقع من الدور الرابع، الناس اتلموا فيه وقالوا ليه: الحكاية شنو؟ قال ليهم: والله ما عارف انا جيت هسع! 7 رسم واحد من الظرفاء على قميص زميله رأس حمار، صاحبه ما زعل، قال: الثقيل القشه وشو في قميصي ده منو؟ 8 في واحد كسلان جدا صحبانه عايزين يعذبوه سرقوا كل اجهزة الريموت كنترول منه. 9 في المطعم الزبون قال للجرسون: الجدادة دي بي رجل واحدة ليه؟ الجرسون قال ليه: رجلها اتكسرت في شكلة مع جدادة ثانية. الزبون قال ليه: طيب شيلها وجيب الجدادة الغلبت. 01 في واحد جزمجي زعل جاته «جزمة نفسية». 11 بياع احذية ابوه مات عايز يعمل ليه الاربعين طلع الزمن ضيق عمل ليه «42». 21 واحدة نايمة مع زوجها سمعت صوتا في الحوش قالت لزوجها: قوم شوف يمكن ده حرامي. قال ليها قومي انتي يمكن حرامية. خاتمة: موضوع الدليفري والتيك اواي مطروح للنقاش يمكن ان تدلوا فيه بأي مقترحات. ويا حليل حلة الملاح والنسوان اليديهن طاعمة. مع تحياتي