موسيقى حزينة.. قبل ظهور أسماء الممثلين (المغمورين).. وفي الأطار لقطات من المسلسل اليومي، قبل ظهور اسم المخرج بال(بونط الضخم)..(زي التقول مغالطنو)..!!! والغريبة الناس ديل ماجابو اسم المسلسل (إتخيلوا)..!!! الحلقة الاولى: * ياولد يا(حسن)..هاك الجنيه دا جيب بيهو فول وجبنة من الدكان * انتي يمه..جادة ولابتهظري؟ * أجي..!! بهظر كيف ياولد..؟؟ * كيف شنو يمه..إنتي قايلة روحك في زمن (المهدية)؟؟ الجنيه دا ياتجيبي بيهو فول ياجبنة. * سجمي..!! دا كلام شنو ياولد..؟؟ * اااااي..ولو مااخاف الكضب إحتمال يدوني وإحتمال لا. * وووب علينا..وكُر علينا..دا متين الكلام دا..؟؟ * متين..!! والله يمة لو ما شايفك قدامي..أقول كنتي في (بيات شتوي). الحلقة الثانية: * معقولة يا(التوم)..دي حالة دي..؟؟ * تقول شنو يا اخوي (عثمان)..بس نصبر..نعمل شنو عاد..؟؟ * لا..يعني نحن نبقى (بهلوانات) عشان نقدر (نباصر) المعيشة بالمرتب البدونا ليهو دا؟؟ * والله يا(التوم) البهلوانات ذاااتهم مابقدروا على البنسوي فيهو دا..اتخيل امس انا والاولاد ماكلين (موية) فول بي (موية) جبنة بي (موية) زيت وشربنا (موية) ورقدنا نمنا. * وما(قطعوها)..؟؟ هههههههههههههههههه. الحلقة الثالثة: * عارفة يا(كلتوم) يختي..الراجل دا ماااااامريحني الايام دي. * سجمي..كيفن الكلام دا يا(التينه)؟ * يمين..يقوم من الصباح..وديك ي(الصبغة)..وداك ي(التسبسب)، وديك ي(الريحة)، ويضحك في وشي زي المجنون ويمرق. * وووب علينا..وكر علينا..مالو حاج (البخيت) يايمة أدوهو عين؟ * العين هينة..المشكلة يكون هو المدي عين..!! * كيفن يعني..؟؟ * يكون (لقط) ليهو واحدة من بنات الجامعة ديل. * لا لا يا(كلتوم) حاج (البخيت) مابعمل كدا..دا زول الليل كلو يصلي ويسبح. * مادي المشكلة ذااااتا...بالليل (يسبح)...وبالنهار (يضبح). فاصل اعلاني: صوت جهوري: زيوت (فكا البيرك)..تأخذك في رحلة للسماء.. يأتي بعد ذلك الصوت مباشرة مشهد (قندراني) طائر في الهواء..والسواق بيضحك شديد..وناس المرور بعاينو ليهو في دهشة..(دا يقطعوهو إيصال كيف هسي؟؟). الحلقة الاخيرة: * السلام عليكم..إنتا (غفير) المقابر دي. * ايوا..مرحب.. * عليك الله داير احجز. * تحجز؟؟ تحجز شنو؟؟ * داير أحجز (قبر)..يعني عايز أحجز (فنان)؟؟ * وداير تحجز ليه يااخينا ؟؟ * والله قلنا أخير نحجز هسي..قبل مانبقى بعدين في رسوم (ارضية) وكدا..ولا رأيك شنو؟؟ شربكة أخيرة: المخرج قرر في آخر لحظة أن يصور جزءاً ثانياً للمسلسل..لكن متين؟؟ الله أعلم..غايتو.. لمن يطلع بنديكم خبر..
