(الروح مشحتفة في البلود الفيها ريحتك)...انعشتني منذ الصباح ...وارعبتني أيضا....آدم سيد الدكان لا يلجأ الى الرمزية في احواله العادية... وبالفعل.. وجدته.. (مدمدما) بالبطانية... شكلها قوية المرة دي ...فعندما تستمع الى شعر القدال مصحوبا بغناء عقد الجلاد ...اما عاشق او مجنون او عاشقا بجنون ... وجميعها لاتبشر بخير...فماذا حدث لصديقنا آدم؟؟؟. توقفت طويلا وانا انتظر تحيته المعتادة (كيف هاجة ام عبد القادر)... ويجيبني الصدى... (ماقلتي حتكلمي لينا الفكي بتاعك يا دكتورة)... التفت الى اسحاق الذي كان يخاطبني وعينيه مليئة بالرجاء... هممت بان أقول له... (كنت بهزر معاك) ..فجأة لمعت لمبة عبقرينو في رأسي ...ياخي ما بالغت انا عديل كدا... كيف فاتت علي الفكرة دي؟؟؟ نتصل بي بلة الغايب يحل لينا المشكلة - (ياجماعة اسمه الغايب دا من الغيب؟ ولا كان بغيب ايام المدرسة؟؟؟) ياخي ما يغيب ... أهو نحن الكنا بنحضر وحافظين نشيد الطابور ما حصل يوم عملوا معانا لقاء في الجرايد -...وهو ما شا الله عليه ..بمجرد التفوه بأي حرف ترى الصحف السودانية تترك (الجيش والمماليك) وتحتفي بتصريحات المذكور... أتذكرون عندما صرح بانه يعرف مكان الطائرة الماليزية وانها عند الجن الأحمر وكذلك عرض وساطته لحل ازمة الركاب في تلك الطائرة؟؟؟... الغريبة لم يتم سؤاله عن رأيه بعد العثور على آثار الحطام ؟؟؟. هاهو الآن يعلن أن السودان سيصبح مملكة وان هناك اشارة اتته من عالم الغيب تؤكد له ذلك .... أيه الهنا الاحنا فيهو دا... حيحسدونا يا اخوانا على المواهب الموجودة بين ظهرانينا ونحن ما مقدرنها... هسع كويس كدا؟؟؟...بعدين لما يستعينوا بيهو جماعة (ناسا)... نقوم نتحسر على الكوادر التي نصدرها خارج البلاد... لكن انا سأكون اول من يقدر الخبرات الوطنية وسأستعين بمقدرات بلة الغايب لاشياء كثيرة. أولا: لعلاج آدم سيد الدكان ...فبدونه لا يستقيم الشارع ..ولا المقال اليومي والأغنية الصادرة من مسجله يتابعها الكثيرون معي... ثانيا: سأطلب من بلة الغايب ادخال اسمي ضمن القائمة المرشحة للتنافس على وظيفة العضو المنتدب لشركة كنانة .... واجعله يقول (شخارم بخارم –شمهرووش –حماروفوش --) فيلمع اسمي فجأة ويوصى مجلس الادارة بان اكون خير خلف لخير سلف.... ثالثا: سأطلب من بلة الغايب يتوسط للجن الاحمر يرسل لي اتنين تلاتة جنيين (يا جماعة جمع جان شنو) يكملوا لينا بناء بيتنا ونخلص من قصة السيخ ارتفع والدولار ما نزل والعمال ماجوا الليلة. عارفاكم حتقولوا علي انانية والمفترض كان اطلب من بلة الاستعانة بالجن (الكلكي) لحل مشاكل كبرى مثل الحروب والجهل والفقر واللي مش عارف ايه... وانا ردي كما كان رد عبد المطلب جد النبي عليه الصلاة والسلام (انا رب الإبل ..وللبيت رب يحميه). مرة اخرى وكل مرة (يا ربي عفوك ورضاك والموضوع داك)..... وووصباحكم خير
