مرثية حمّيد شن حاريات يا بنّوت الحىّْ أبكنْ بى دمّ العين فارس الخلا والصَّىْ وشن راجين يا سُكَّان الحِلَّةْ أبكوا الولد الزّين وسوّوا الووب وقولوا أحىّْ حميّد اتّدلّى من باص الدنيا .. الزايلةْ وفانيةْ لى الدَّار الباقيةْ ودانيةْ الخاتيةْ مذلّةْ يا عالم هُوىْ ايش الحاصل؟ لا قوّمتوا غبار الحزن الدّاكن ولا هدّيتوا عروش الفرح الباطلْ ليش صانّين؟ شن راجِّنُّوا؟ ما الضاحك سِنُّو غافلنا وولّى واتوسّدْ رحم الأرض الأرحم من وشّ الطّين ما الطّين بقى ساكن بُور وحزين لا قمريّةً فوقو تقوقى حنين لا مسكين يلقالو تميرةْ لا ضُلّاً آمنْ فارقنا الضَّىّْ الأمَّاتوا الليهو بهشّنْ ما ورّوهوا البصلو مكشّنْ ولا اضطرَّاهنْ بى نفسو الماهل بل جازاهنْ بالطّيب وساهل من زير الريدةْ سقاهن وبى تمر العافيةْ رماهن حتّى الواحدةْ بي روحا تراهنْ تفداهو بدرق الريد ما كمْ حمَّيد؟ فى الضّيق بطراهنْ؟ الأخواتو قليبِن يفرشن ليهو وسادةْ واقُشَّنْ من ساحاتو الهمّ الماتع الأخوانو بهوشوا ساعة الضيم يلحقبو ينوشو يشرعوا ساعداً سيفاً باتع الخالاتو إمُرقنْ إخُشَّنْ فى أعماقو الرّحبةْ وإرشَّنْ موية الريدةْ الصافيةْ ويوت جازاهنْ بالحسنةْ الخافيةْ ما هو النّخلةْ الجذرها ضارب فوق ضُلَّها قيّلْ سارب ملاذ الماكل وشارب وُ دا العمّاتوا ديمةْ بحشّنْ زرعو الوارف وفايت الحد لا بغشاهو جراد الشُّحْ لا أمواجو بحِدَّها سدْ ما فاتنّو وديمةْ سقنُّوا الصادق وصُحْ ومن كلماتن نبت الشّعر الحاسم مُهنّد مُشرعْ فى وشْ الظّالمْ الدِّيمةْ مع الطيبين ما قط ساوم القولو الجَّدْ دا الأبواتو الليهو ببشِّوا أبداً قط ما فيهو اتفشّوا بسْ غطّوهوا بي هدم العافيةْ ومن ألحان البادية سقوهوا من موّال الساقيةْ الغافيةْ ومن عوعاى الدَّيكةْ الصاحيةْ وصوت البهم السادر والطير الغرّد عايد لي أوطانوا أو منّها هاجر صوتو الشّجن الساكن فى أحزانو لكين شِنْ نعمل؟ فى الزمن القاسى؟ لا الشر بدَّارَى زي في الزّمن السابق وِكِتْ بشّيش بيطِلْ وبيِخجلْ لكنّو اليوم أصبح سافر حلقوم ووشيشْ أصبح قاهر فى كُلْ حارةْ واصبح إسمو شطارةْ بل شنْ نعمل؟ لا لينا مراسي في المستقبلْ نحلم يوم تلفانا بي حب وأمان من الغادر الضيّعْ كلِّ أمانةْ في هون الظلم بي غيظ دقّانا ثُمَّنْ ضرّانا في سموم الضُّر وُقبَّلْ خلّانا سفّفنا هوان أطفالنا رهافة الطّرقة البايتةْ أطفالو سُمان نسوانَّا بكسرو صُوان شان ما تعيشْ نسوانو بفرشن فى الموكيت واتّكّن فوق الرّيشْ آه يا خَىْ كيفن بعد رحُولك يا تُرى؟ بعد غافلت لا ودّعت لا قلت السلام وُتركتنا فى معامع الدَّردرةْ من نار حروف نلقى الإجابةْ على السؤال؟ وكيف رِفَيقَكْ تانى بيطيب ليهو المقام؟ آه وآه ما اتيتَّم القدَّال! فُتُّو قبّال عيونك تكتحلْ بي صولة الضّىْ الهمام تقلع طواغيت الظلام تاريك طُمام بطينتكْ فات وِصل الحَلِقْ؟ بعد شفت دارنا بتحترقْ؟ تاريهو ما عاد يجدي الكلام؟ لا بحت لينا لا لمّحت في لحظة تعب ولا بان في بسمتك ذرة غضب مشيت زي التَّقُول التقاوي بقت شتول والسبايط عراجين الدّهب والسُرَّةْ بت عوض الكريم فرحت وزغردت طول الطريق شاكرةْ للمولى الرَّحيم ما اتيبّس وشيشا من حرّ اللهيب ولا بلادنا غطّاها الحريق واشريرنا الما شعرنا بي حرقة قليب ما اتوانى بي كرم المحب بذر البوادي محبّة لينا وما استكان جانا ومشى ونحن ما زلنا فى نفس البكان مصنقرين صُبح وُعِشا ما اتحرّكنا لمّن قلت قوموا بادروا على المحن رشُّوها بى موية المُحِبْ واطفوا ناركم يا شعوب واتلافوا لي جسد الوطنْ قُبّال تصول فيهو النّصالْ لكنُّو رغم النّصيحةْ قد كان الوهن زمّلنا بي توب الهوان أمسك تلابيبنا والعجز انتشر واصبح فينا ما بجدي المقال والأمل صار نجماً بعيد التَّقُولْ نحن ما نفس البشر الما رِضُوا في عُمر الدّهر أصلهم يبقوا العبيد يا ربّي عاد نقول دا من فعل الظروف؟ ولاّ من كُتر المحن شلاّنا خوف؟
